ازاي تخسري وزن بشكل صحي وانتي تحت ضغط عصبي

الضغط العصبي والاجهاد من الحاجات اللي كلنا تقريبا بنتعرض لها بشكل شبة يومي بسبب الضغوطات اليومية سواء الدراسة او الشغل او غيره, وده بيخلينا منامش كويس ومنهتمش بصحتنا بشكل كافي, ونتيجة لده غالبا بشكل لا ارادي بنتجه للاكل عشان نتجنب التفكير في المشاكل او الحاجات اللي بتسبب لنا ضغط عصبي, ولكن احيانا لبعض الناس بيحصل عكس كده يعني نتيجة الضغط بيحصل فقد للشهية, والنهاردة هنعرف مع بعض من خلال موضوعنا ليه ممكن القلق يسبب فقدان الشهية و ازاي تخسري وزن وانتي تحت ضغط بشكل ميضرش الصحة او الجسم وتحافظي على وزنك.

ازاي تخسري وزن وانتي تحت ضغط:

– تعالوا نعرف الاول ايه اعراض القلق وتأثيرة على الجسم:

1- الاجهاد والهرمونات:

الضغط والاجهاد بيخلي الجسم يفرز هرمون الكورتيزول بشكل زيادة وده بيبطء عملية التمثيل الغذائي, وده كمان ممكن يخليكي تفقدي شهيتك في نفس الوقت, والاجهاد ممكن يأدي كمان لتحفيز افراز الغدة الدرقية وده مش بس هيسد الشهية لكن كمان هيسرع عملية حرق السعرات الحرارية في جسمك وهيخليكي تخسري وزن.

2- القلق بيسبب فقدان الوزن:

بالرغم ان فقدان الوزن تعتبر خطوة كبيرة لاي بنت بس ميبقاش فقدان الوزن ده على حساب صحتك, لان بعض الاشخاص اللي بيعيشوا تحت ضغط او قلق بيميلوا لفقدان الوزن بشكل اسرع من الاشخاص الطبيعين او اللي مش بيعانوا من ضغط عصبي في حياتهم.

3- نقص الشهية:

الشخص اللي بيعاني من قلق او ضغط هيهمل الاكل, او هياكل بكميات اقل من اللي متعود ياكلها, وده مع مرور الوقت ممكن يبطء عملية التمثيل الغذائي بشكل كبير.

4- التحرك باستمرار:

الاشخاص اللي بيعانوا من مستويات عالية من القلق هتلاقيهم مش بيقدروا يقعدوا في مكان واحد فترات طويلة وبيتحركوا كتير وعندهم ميل للحركة بشكل اسرع في كل مكان حواليهم, او يهزوا رجلهم وهما قاعدين, كل دي تعتبر علامات للقلق والضغط العصبي.

5- تغيير اسلوب الحياة:

في بعض الحالات القلق بيخليكي تغيري اسلوبك حياتك لنمط او اسلوب حياة صحي اكتر, وتغيري حاجة معينة كنتي بتعمليها وتستبدليها بحاجة تانية, وتبدأي تمارسي رياضة باستمرار وتهتمي بصحتك البدنية, يعني بتوجهي القلق والضغط العصبي بشكل ايجابي من خلال تغيير اسلوب حياتك للافضل وتساعدي نفسك انك تتخلصي من القلق, وده كله في النهاية اكيد هيخليكي تخسري وزن.

– الحلول الممكنة عشان نحافظ على الوزن:

كل حاجة لما بتزيد عن الحد الطبيعي ممكن تسبب ضرر على المدى الطويل, لان الشخص اللي فقد وزن اثناء فترة القلق او الضغط العصبي مجرد ما هتنتهي المشكلة وهيرجع للظروف الطبيعية هيبدأ انه يرجع ياكل بشكل طبيعي تاني, وده هيكون له تأثير عكسي وهيسبب زيادة في الوزن؟ طيب ايه هي الحلول الممكنة او نعمل ايه واحنا تحت الضغط العصبي والقلق عشان نضمن فقدان وزن بشكل طبيعي من غير اي ضرر لجسمنا؟ وكمان نضمن ان وزننا ميزدش تاني بعد ما نرجع لحالتنا الطبيعية.

1- ممارسة التمارين الرياضية كتير من الحاجات اللي بتتسبب في زيادة مستويات الكورتيزول, عشان كده الافضل انك تمارسي التمارين باعتدال عشان تحافظي على مستويات الكورتيزول في معدلها الطبيعي.

2- اعتمدي على نظام غذائي متوزان, دخلي فيه كل العناصر اللي بيحتاجها الجسم, كمان متتخطيش اي وجبة او تهمليها كلي كل وجبة في ميعادها, والوجبات الخفيفة او السناكس اللي بين الوجبات الاساسية حاولي تاكلي فيها اكلات غنية بالالياف.

3- احسن علاج للتوتر هو الاسترخاء, وحاولي انك تعملي اي حاجة ممكن تخليكي مبسوطة, يعني تخرجي مع اصحابك, تلعبي رياضة مع مجموعة ده بيساعدك تركزي بشكل افضل, واتجنبي بقدر الامكان اي نشاط ممكن يخليكي ترجعي للقلق او الاجهاد.

7 خطوات بسيطة لتسريع عملية الحرق في الجسم