5 اسرار هتخلي ايدك تبان اصغر 10 سنين
الايدين عادة ممكن يبان عليها تاثير السن او عدم الاهتمام اكتر او اسرع من الوش وممكن تبان اكبر من وشك ويظهر فيها تجاعيد او بقع بشكل اسرع, لكن احنا ممكن نتجنب ده لو اهتمينا بالايد بشكل صح, والنهاردة من خلال موضوعنا هنقول لكل بنات حوا نصايح للحفاظ على جمال الايدين لفترة طويلة.
نصايح للحفاظ على جمال الايدين:
1- اغسلي ايدك بشكل صح:
غسيل الايد بالصابون بشكل مستمر طول اليوم ده بيخلي الايد تفقد رطوبتها وبيعرضها للجفاف والخشونة وهتلاقيها انها بدأت تقشر, وعشان نتجنب ده نمشي على الخطوات البسيطة دي:
– متستخدميش الصابون المضاد للبكتيريا الا لو كان ضروري لكن ميبقاش هو النوع الاساسي للاستخدام اليومي, اتجنبي البرفيوم على الايد لانه بيسبب جفافها وممكن كمان يسبب تهيج لبشرة الايد, اختاري صابون مرطب تكون في مكوناته زيت زيتون, زيت الجوجوبا, او صبار الالوفيرا.
– اغسلي ايدك بمية دافية متكونش سخنة اوي عشان تحافظي على طبقة الحماية الطبيعية على البشرة.
– اتجنبي المجفف الكهربائي, واستخدمي بداله المناديل لتجفيف الايد.
2- البسي جوانتي:
تعرض الايد باستمرار للمواد الكيميائية, والهوا البارد, والهوا الجاف, كل ده بيأثر عليها بشكل سلبي وبيسبب في جفافها, وعشان نتجنب كل ده ضروري انك تلبسي جوانتي.
– في الجو البرد اوي حاولي تلبسي جوانتي وانتي خارجة عشان تحمي بشرة الايد من الهوا البارد اللي ممكن يسبب جفافها.
– في وقت شغل البيت من غسيل الاطباق والتنضيف وشغل البيت بشكل عام البسي جوانتي مطاط او لاتكس.
– ولو عندك زرع بتهتمي بيه البسي له جوانتي قماش.
3- رطبي ايدك بانتظام:
– اختيار كريم الايد مهم جدا عشان نحافظ عليها دايما ناعمة, ادهني الايد بالكريم المرطب حسب الحاجة لكن ميقلش عن مرتين في اليوم الصبح وبالليل, وخلي دايما الكريم جنب الحوض وحطي منه كل مره تغسلي فيها ايدك, وعشان توصلي لافضل نتيجة ادهني ايدك بالكريم المرطب والبسي جوانتي قطن قبل النوم يوميا.
– الضوافر كمان بتحتاج ترطيب زي الايد, دلكيهم بكريم الايد, وممكن تشتري من الصيدلية فيتامين E لترطيب الجلد اللي حوالين الضوافر.
– الجلد بيحتاج ترطيب من جوه زي بره بالظبط عشان كده اشربي كمية مية كفاية يوميا عشان تحافظي على رطوبة الجلد.
4- افتكري السكراب:
وبصرف النظر عن الترطيب الايد زي البشرة بتحتاج ماسكات, اعملي لها ماسك مرة واحدة في الاسبوع.
– ممكن تخلطي نص ثمرة افوكادو مهروسة, مع صفار بيضة, ومعلقة كبيرة عصير ليمون, حطي الماسك على الايد وسيبيه 20 دقيقة واغسليه بالمية.
– ممكن تستخدمي سكراب عبارة عن زيت زيتون وسكر, افركي بيه الايد بحركات دائرية.
– او اخلطي معلقة كبيرة زيت جوز هند, معلقة كبيرة عسل نحل, ¼ كوباية سكر, ¼ كوباية ملح, عصير ليمونة, اضربيهم في البلندر لمدة 30 ثانية, احتفظي بالخليط في برطمان او علبة فاضية واستخدمي منه مرة في الاسبوع.
– او اخلطي ½ كوباية ملح, 2 معلقة كبيرة زيت زيتون, عصير 3 ليمونات, قلبيهم مع بعض كويس, واحتفظي بالخليط في برطمان واستخدمي منه مرتين في الاسبوع.
– ولو بتكسلي تعملي حاجة مخصوص للايد, لما تعملي اي ماسك للجسم او للبشرة استخدميه لايدك كمان.
5- استخدمي صن بلوك:
واحدة من العلامات الرئيسية للعمر هي فرط تصبغ الجلد ولكن بيكون السبب فيها مش الشيخوخة بس زي ما هو معروف لكن تأثير الشمس عليها ممكن يخليها اكبر من عمرها وتظهر فيها التجاعيد والبقع وتصبغ الجلد.
– وعشان نتجنب كل المشاكل دي ونحميها لازم تطبقي واقي الشمس على الايد قبل الخروج زي بشرة الوش بالظبط.
– الفواكه الحمضية تعتبر مبيض طبيعي للبشرة, ممكن تخلطي معلقة كبيرة عصير ليمون, معلقة كبيرة لبن, معلقة صغيرة عسل نحل, قلبيهم مع بعض كويس واستخدميه كقناع لتبييض الايد مرة في الاسبوع.
وصفات طبيعية لعلاج جفاف وتشققات الايدين
