7 خطوات بسيطة لتسريع عملية الحرق في الجسم

لو بتخططي انك تخسري وزن وتحسني صحتك بشكل عام, اول حاجة لازم تاخدي بالك منها هي عملية التمثيل الغذائي او نسبة الحرق في الجسم لان لو عملية الحرق بطيئة اي نظام غذائي مش هيديكي النتيجة اللي انتي عايزاها او متوقعاها, والنهاردة من خلال موضوعنا هنقولك 7 خطوات لتسريع عملية الحرق عشان تساعدك انك توصلي للنتيجة المطلوبة وتخسي.

خطوات لتسريع عملية الحرق:

1- اشربي اكتر:

لو مش بتشربي مية بكمية كافية, جسمك هيحرق كالوري او سعرات حرارية اقل, والكبد هيشتغل بشكل اصعب عشان يستعيد توازن المية في الجسم, عشان كده لو عايزة تسرعي عملية الحرق اشربي مية اكتر وشاي اخضر.

2- كلي اكل اورجانيك “عضوي”:

اختاري اكلك بحكمة, وابعدي عن الاكل اللي بيكون فيه مواد كيميائية لانه بيغير من هرمونات الجسم وبيبطء عملية الحرق في الجسم, عشان كده الافضل انك تتجهي للاكلات الاورجانيك اللي بتكون خالية من اي مواد كيميائية وطبيعية مية في المية.

3- اتعودي تصحي بدري:

ضوء الشمس بيأثر على عملية الحرق واستهلاك الطاقة, والصحيان بدري هيساعد جسمك على تنظيم العملية البيولوجية, وده بيعتمد بشكل مباشر على الليل والنهار.

4- استهلكي المنتجات اللي بتساعد على الحرق:

ضروري انك تدخلي في نظامك الغذائي منتجات الالبان, لانها بتمد الجسم بالكالسيوم لحرق الدهون وبناء العضلات, وبيحافظ على المستوى الطبيعي للحديد في الجسم لنقل الاكسجين بشكل احسن, واستخدام الملح المعالج باليود لدعم الغدة الدرقية اللي بتتحكم في الوزن وعملية الحرق.

5- زودي النشاط البدني:

اي نوع من الانشطة البدنية بتساعد على تسريع عملية الحرق, والعضلات دايما بتكون محتاجة طاقة وده هيساعد على زيادة نسبة الحرق, مارسي اي نشاط زي المشي, الجري, الرقص وكل الانشطة دي بتسرع عملية الحرق.

6- اعتمدي على نظام غذائي صحي:

كلي كل 3 – 4 ساعات وجبات صغيرة بدل ما تاكلي وجبة او وجبتين كبار خلال اليوم, قللي من الكربوهيدرات اللي هي الاكلات اللي بتكون غنية بالنشويات زي المكرونة والارز وغيرها من الاكلات, كلي سناكس صحية زي الموز او الافوكادو وابعدي عن السناكس الغني بالدهون او السكريات.

 لان انتي لو قللتي اكلك بشكل كبير الجسم كوسيلة دفاع عن نفسه هيبدأ بسرعة يخزن الاكل اللي انتي بتاكليه, ولو انتي بتاكلي اكلات غير صحية او سناكس ده هيأخر او هيبطء عملية حرق الدهون, عشان كده لو عايزة تزودي نسبة الحرق اعتمدي على نظام غذائي صحي, ومتبعديش عن الكربوهيدرات او تمنعيها بشكل كامل لان ده بيقلل من نشاط المخ لكن قللي بس من الكمية.

7- قولي لا للضغط العصبي والقلق:

لو دايما بتحسي بضغط عصبي ومش بتدي جسمك راحة, ده هيخلي نسبة الحرق بطيئة, عشان كده حاولي انك تقاومي الضغط والقلق واعتمدي على طريقة صحية عشان تتخلصي من الضغط.

اكلات ممكن تاكلي منها اي كمية من غير ما وزنك يزيد