9 حاجات بيعملها الراجل بتخلي اي بنت تحبه ويبقى جنتل مان في نظرها !
في اوقات كتير احنا كبنات بنفكر ان الراجل الجنتل مان ده موجود في الكتب والافلام الرومانسية بس, لكن الحقيقة انه هو لسه موجود في الواقع وان كان اقل من الاول او مش زي زمان, والنهاردة في المقال بتاعنا هنعرف مع بعض اكتر تصرفات بيعملها الراجل تخلي البنت تحبه ويمكن تكون بسيطة جدا ولكن مؤثرة وليها مفعول السحر على اي واحدة.
تصرفات بيعملها الراجل تخلي البنت تحبه:
1- بيفتحلك الباب:
انه يفتحلك باب العربية او باب اي مكان دي من الحاجات اللي بتحسس اي بنت ان الراجل ده جنتيل مان, هو تصرف بسيط ولكن هو بالحركة دي بيبقى عايز يخليكي مرتاحة وحاسه بالامان, واي بنت هتقدر الحركة دي جدا لما تتعمل لها.
2- بيخلي لك من اكله:
كلنا دايما بنقول “ان الطريق لقلب الراجل معدته” والمقولة دي تعتبر صح الى حد ما, فلو الراجل بيخلي لك من الاكل بتاعه ده معناه انه مهتم بيكي وبيحبك.
3- بيقضي وقت كبير مع عيلتك:
لو هو بيحب يهتم بكل حاجة تخصك وتفاصيل حياتك, وبيفضل انه يقضي وقت معاكي ومع عيلتك اكتر من انه يخرج مع اصحابه او يتابع ماتش, دي حاجة اي بنت بتحبها وبتحس ان الشخص ده بيحبها بصدق ومهتم بيها.
4- بيقدمك لكل الناس اللي يعرفهم:
بيقدمك لكل الناس اللي يعرفهم واصحابه والقريبين منه, يعني مش هيحسسك ابدا انك مش مرغوب فيكي او انه مش بيحب حد من اصحابه او عيلته يتعرف عليكي بالعكس هو هيهتم بالنقطة دي جدا وهيبقى عايز يخليكي دايما حاسه براحة.
5- بيقدم هدية من غير سبب:
الشخص اللي مش هيحتاج اي يوم خاص او مناسبة عشان يقدم هدية او يجيب ورد, لكن في اي يوم عشوائي ومن غير اي مناسبة هنلاقي الشخص ده افتكر حبيبة او صديقة مقربة او حتى مامته انه يجيب هدية او ورد ويقدمهم ويرسم ابتسامة وفرحة لاي شخص مفضل عنده.
6- بيحميكي دايما:
الراجل اللي بيحسسك وانتي معاه دايما انه بيحاول يحميكي باي طريقة ولو حتى بحركات بسيطة اكيد ده الشخص اللي اي بنت ممكن تحبه, يعني مثلا وانتي ماشية معاه على الطريق بيخلي نفسه هو ناحية العربيات عشان يحميكي من الخطر او من اي ضرر ممكن يحصل لك, دي اكيد لفته حلوة جدا ومتطلعش غير من راجل جنتل مان.
7- تقبيل الجبين:
لو الراجل بيعبر عن مشاعره للناس اللي بيحبهم عن طريق قبلة الجبين, ده معناه انه مرتبط بالاشخاص دي جدا, وفي نفس الوقت الطرف التاني بيحس بالسعادة والحب والرعاية من الشخص ده.
8- بيملى العربية بنزين:
انه يملى العربية بنزين لحد هو مهتم بيه دي تعتبر مفاجأة حلوة للطرف التاني ومش هيعملها غير الراجل الجنتل مان, لان بكده بيحاول يبين للطرف التاني اهتمامه بيه ومن غير ما ينتظر اي مقابل او ان ده يترد له باي شكل.
9- بيساعدك تلبسي الجاكيت بتاعك:
اكيد انتي تقدري تلبسي الجاكيت لوحدك من غير مساعدة, ولكن هي مش مسألة قدرة, لكن هي بتبقى لفته حلوة منه انه يمسك لك الجاكيت بتاعك ويلبسهولك لما الدنيا تكون برد.
زي ما كلنا شوفنا كده كلها حاجات بسيطة جدا وتفاصيل صغيرة ولكن بتكون لها تأثير السحر على اي واحدة, وقولوا لنا مين في حياتها شخص جنتل مان بيعمل الحاجات دي كلها او حتى بعضها.