ازاي تعملي علاج الشعر بالبخار في البيت..واتعرفي على فوايده

بقلمريهام محمود فيشعر visibility4943

علاج الشعر بالبخار من العلاجات الفعالة جدا اللي بتساعد على علاج كتير من مشاكل الشعر وبترجعه صحي تاني مع الاستمرار عليه, وطريقته سهلة وبسيطة جدا هنعرفها النهاردة مع بعض بالخطوات وهنتعرف على فوايده للشعر.

– فوايد علاج الشعر بالبخار:

1- بيساعد على نمو الشعر.

2- بيمنع تكسر وتقصف الشعر.

3- بيعالج جفاف وتلف وبهتان الشعر.

4- بينضف فروة الراس, وبيزيل الاتربة والجلد الميت من الفروة.

5- بيحسن الدورة الدموية لفروة الراس.

6- بيخلي الشعر ناعم وشكله صحي.

7- بيقوي الشعر.

علاج الشعر بالبخار
علاج الشعر بالبخار

– طريقة علاج الشعر بالبخار:

1- الخطوة الاولى – تنضيف الشعر:

اول خطوة تنضيف الشعر اغسلي الشعر بالشامبو عشان تشيلي اي اتربة والشعر يبقى نضيف والعلاج يجيب افضل نتيجة.

2- الخطوة التانية – تطبيق علاج الشعر:

تاني خطوة هو تطبيق الزيت اللي هتستخدميه على الشعر قبل البخار, استخدمي اي نوع زيت تفضليه ممكن زيت زيتون او زيت جوز هند ادهني الشعر كله من الجذور للاطراف.

3- الخطوة التالتة – الطاقية البلاستيك:

بعد ما تدهني الزيت غطي الشعر كله بطاقية الشعر او بكيس بلاستيك او ممكن تستخدمي البلاستيك اللي بنستخدمه في حفظ الاكل لفيه كله على الشعر بشكل محكوم عشان يحافظ على البخار على الشعر كويس.

4- الخطوة الرابعة – تسخين الفوطة:

بعد ما لفينا الشعر بالكيس البلاستيك البسي جوانتي بلاستيك في ايدك من اللي بنستخدمه في الصبغة, وهاتي فوطة او تربونة بليها بمية سخنة وبعدين طلعيها من المية واعصريها كويس واتخلصي من كل المية الزيادة.

وممكن كمان نسخن الفوطة بطرق تانية ممكن نحطها في الميكروويف لمدة دقيقتين لحد ما تسخن اوي, او نسخنها على حمام مية يعني حطي حلة فيها مية وفوقيها مصفى كبيرة وحطيها فيها الفوطة وخلي المية تغلي وسيبي الفوطة لحد ما تسخن وبعدين استخدميها.

5- الخطوة الخامسة – لف الفوطة:

لفي التربون الفوطة حوالين راسك, والبسي فوق الفوطة كيس بلاستيك تاني عشان تفضل دافية اطول فترة ممكنة وتقفلي على البخار وتحافظي عليه كله على الشعر.

6- الخطوة السادسة – عملية البخار:

سيبي الشعر ملفوف لمدة من 20 – 30 دقيقة عشان الزيت والبخار يعملوا مفعول مع بعض والزيت يخترق فروة الراس من جوه, ولو لقيتي الفوطة بردت ممكن ترجعي تحطيها تاني في المية السخنة وتلفيها تاني.

7- الخطوة السابعة – فك الفوطة:

بعد الوقت اللي احنا قولنا عليه فكي الفوطة والكيس البلاستيك وسيبي الشعر لحد ما يبرد عشان تقفلي المسام وتحافظي على نتيجة البخار, بعد ما يبرد خالص اشطفي الشعر بالمية.

8- الخطوة الثامنة – تكرار العلاج:

كرري العلاج مرة واحدة كل اسبوع بشكل منتظم عشان توصلي لافضل نتايج وتضمني ان شعرك يفضل صحي وتحميه من اي تلف او جفاف, ومرة واحدة في الاسبوع هتكون كافية جدا لان ممكن لو زودتي عن كده يعمل نتيجة عكسية ويضعف خصل الشعر.

7 زيوت هتغير مظهرك في 7 ايام بس

7 زيوت هتغير مظهرك في 7 ايام
7 زيوت هتغير مظهرك في 7 ايام