ازاي تتعاملي مع قرايبك اللي بتكرهيهم !

بقلمريهام محمود فيعلاقات visibility1293

القرايب ليه بنكرههم! اكيد في كتير مننا عنده في عيلته ناس من قرايبه مش بيحبهم او بيبقوا مزعجين بالنسبة له وتقريبا مافيش بيت مافيش فيه قرايب مش مكروهين وبتبقى زياراتهم بالنسبة لنا اسوأ حاجة ممكن تحصلنا وطول ما هما موجودين بنبقى متضايقين وعايزينهم يمشوا, والنهاردة من خلال موضوعنا هنقولكم على نصايح للتعامل مع قرايبك اللي بتكرهيهم!

نصايح للتعامل مع قرايبك التقال علي قلبك:

– ليه بتكرهي قرايبك اوي؟

غالبا احنا بنكره القريب سواء العم او العمة او الخالة او ايا كانت صلة القرابة بسبب كلام بيقولوه او افعال بيعملوها بتضايقنا, هما في الغالب بنلاقيهم بيدخلوا في حياتنا وخصوصياتنا زيادة عن اللزوم وبيبقوا عايزين يفرضوا علينا طريقة او اسلوب حياة معين وبيكون مبرروهم انهم اكبر وعارفين كل حاجة ومروا بالتجارب دي وهما في نفس السن فبالتالي بيبقوا عايزنا نكرر حياتهم هما ونعيش على طريقتهم مش على طريقتنا او باسلوبنا احنا ويمكن دي اكتر حاجة ممكن تزعجنا منهم وتكرهنا فيهم.

– ازاي تتعاملي معاهم؟

1- الموضوع ده نحله ازاي؟ ممكن تتكلمي معاهم بطريقة لطيفة وودية وتفهميهم انك مش بتحبي اي حد يتدخل في حياتك الشخصية وانك هتكوني مبسوطة وهتقدري جدا عدم تدخلهم في حياتك, ولو اتكلمتي معاهم وحاولتي اكتر من مره والطريقة دي بردو مجبتش اي نتيجة, يبقى حاولي توصلي لهم بطريقة مهذبة ولكن بكلمات صارمة وقوية في نفس الوقت ان بعد كده وجودهم مش هيبقى فارق معاكي باي شكل.

وده معناه انك بتبرري تجاهلك ليهم لما بيكونوا موجودين عندك في البيت, وبتبدأي تقللي التفاعل معاهم, وفي الحالة دي ياما بتخرجي بره البيت عشان متبقيش في مواجهه معاهم او تشوفيهم, او بتدخلي اوضتك وتقفلي على نفسك بحجة مثلا عندك دراسة او وراكي اي حاجة بتخلصيها, ودي تعتبر رسالة واضحة جدا ليهم انك مش عايزة تقعدي معاهم او تختلطي بيهم, مع الوقت لما هيلاحظوا ده وانك بتحاولي تتجنبيهم كل ما يجوا هتلاقي انهم بالتدريج هيبطلوا مضايقات ليكي.

2- ممكن تكرري الكلام اللي هما قالوه وضايقك, ودي طريقة تخليهم يسمعوا بيها الكلام اللي هما قالوا ويحسوا بتأثيره على اللي قدامهم وقد ايه الكلمات مزعجة وبتضايق.

3- لو انتي مضطرة تقعدي معاهم ولقيتي انهم بيزعجوكي بشكل مبالغ واتضايقتي, حاولي تغيري الموضوع, او اسأليهم سؤال بحيث تقطعي عليهم الكلام وتدخليهم في موضوع تاني.

4- حاولي وانتي قعدة معاهم تتجنبي المواضيع الحساسة او الاستفزازية زي الاراء السياسية مثلا دي بيحصل عليها خلاف كتير وكل واحد بيكون ليه راي ووجهة نظر مختلفة عن التاني, فعشان تحافظي على السلام بينكم وميحصلش اي خلاف اتجنبي الكلام في الموضوعات اللي ممكن تعمل مشاكل او تسبب كره واتكلموا في موضوعات مفيدة خفيفة, ولو اي حد علق بتعليق سواء كويس او وحش ردي بشكرا من غير ما تجادلي معاهم وانقلي على موضوع تاني عشان تتجنبي الصراع.

نصايح للتعامل مع قرايبك اللي بتكرهيهم
نصايح للتعامل مع قرايبك اللي بتكرهيهم

5- ولو اللي بيتعرض للمضايقة من الاقارب اطفال مش هيقدروا ياخدوا موقف, يبقى الافضل انه يبقى في استعانة بحد متخصص يقعد مع الطفل ويتكلم معاه في اللي مضايقة لان ده ممكن يأثر في المستقبل على نفسيته وتكوين شخصيته.

في النهاية لازم ناخد مع اي حد من القرايب بيزعجنا او بيتدخل في حياتنا موقف وتوضحي لهم بطريقة مهذبة انك بتحترمي ارائهم جدا ولكن مينفعش ان حد يجبرك على اتخاذ قرار او يفرض عليكي تعيشي بطريقة او اسلوب مختلف عن شخصيتك وان انتي ليكي شخصية مستقلة وتقدري تاخدي قراراتك بنفسك حسب شخصيتك وطريقة تفكيرك انتي.

وفي الاخر بنتمنى ميبقاش في كره لاي حد من افرد العيلة ولو في خلافات او اختلاف في وجهات النظر يتحل ويكون في اتفاق.

10 حاجات ممكن تسمم حياتك..وازاي تمنعيها عشان تعيشي حياة افضل

حاجات ممكن تسمم حياتك
حاجات ممكن تسمم حياتك