5 علامات بتثبت انك بتخسرى وزن فعلا مش بس وزن المية

لما بتقررى انك عايزة تخسي او تخسرى من وزنك يبقى لازم عندك الارادة والصبر اللازمين، لانه الموضوع مش جيم و تمرينات، لكن تخسيس الوزن بيعتبر عملية تغيير ولو بسيطة فى الـ lifestyle  الخاص بيكى. لانه احيانا ممكن تخسي او تخسرى من وزنك لكن ده يكون مش حقيقي فترجعى تزيدى تانى وده بيبقى خسارة فى وزن المية ومش وزن الحقيقي، و بالتالى ممكن تصابى بالاحباط ! لكن علشان تتجنبى الوقوع فى المشكلة دى بنات حوا فى المقال ده هتقولك على 5 علامات بتثبت انك بتخسرى وزن فعلا مش بس وزن المية ..

5 علامات بتثبت انك بتخسرى وزن فعلا مش بس وزن المية 

• 1- افتكرى امتى آخر مرة وزنتى نفسك فيها :

لو وزنتى نفسك فى اول اليوم و نمتى وصحيتى لقيتى نفسك خسرتى كيلو او اتنين ، يبقى ده على الاغلب انتى خسرتى من وزن المية اللى فى جسمك لكن مش من كتلة جسمك الحقيقية ، لانه جسمك ممكن يخسر لحوالى 2 كيلوجرام من المية وانتى نايمة ومن غير متعملى اى مجهود ! فعلشان تتأكدى انك بتخسرى وزن حقيقي وبتحرقى دهون يبقى الافضل انك توزنى نفسك كل اسبوع مش كل يوم فتعرفى بشكل  دقيق اذا كنتى بتكسبى او بتخسرى وزن. 

• 2- خسارة وزنك بشكل منتظم :

تانى علامة من 5 علامات بتثبت انك بتخسرى وزن فعلا مش بس وزن المية  هى انك لو نمتى و صحيتى لقيتى نفسك وزنك قل و على آخر اليوم رجع تانى زى الاول يبقى ده اكيد خسارة فى وزن المية مش فى وزنك الحقيقي، لانه خسارة الوزن الحقيقية بتبقى منتظمة و بتدوم لفترات اطول من ليلة ! و بتبقى بكيلوجرامات  قليلة فى البداية  على عكس وزن المية اللى بيبقى بكيلوجرامات اكتر ، وعلشان تتأكدى من خسارة الوزن بتاعتك جربى توزنى نفسك الصبح بعد ما تصحى مباشرة وقبل ما تفطرى.

• 3- حاسة بنشاط وطاقة اكبر :

مع خسارة الوزن بتزيد الطاقة، علشان كده لو بتخسرى من وزنك الحقيقي مش وزن المية هتحسي بدفعة طاقة كبيرة و كمان الطاقة دى هتدوم معاكى اطول بعكس وزن المية لانها لما بتتحرق بتاثر على كمية المية فى جسمك لكن مش بتولد طاقة زى حرق وخسارة الدهون ، فلما تخسرى وزن المية مش هتحسي بأى تغيير فى طاقتك .

• 4- حاسة انك اقوى :

خسارة وزن المية مش هيبقى له أى تأثير على قدرتك على انك تعملى نشاط جسدى ، لكن اول ما تبدأى تخسرى وزنك الحقيقي هتلاقى نفسك عندك قدرة على بذل النشاط الجسدى اكبر و هتحسي انك بقيتى اقوى ، يعنى مثلا هتقدرى تفضلى واقفة على رجلك مدة اطول او انك تمشي لمسافات اطول من المعتاد او انك تجرى بشكل افضل واسرع ، هتحسي بالقوة بأنواعها المختلفة .

• 5- الهدوم بقت أوسع :

آخر علامة معانا من  5 علامات بتثبت انك بتخسرى وزن فعلا مش بس وزن المية  هى انك تحسيى هدومك المعتادة اللى كانت على مقاسك بالضبط بقت اوسع او مريحة اكتر، ده معناه انك بتخسرى وزن من كتلة جسمك فعلا مش بس وزن المية الزيادة لانه وزن المية مش هيأثر على مقاس ملابسك  و ده بيعتبر أفضل مؤشر يثبتلك انك بتخسرى من وزنك فعلا.

اعرفى معانا كمان نظام غذائي ليوم هيساعدك على تخسيس الوزن