افكار مبتكرة تجددي بيهم هدومك القديمة
عندك هدوم قديمة بطلتي تلبسيها او حاسة ان موضتها قدمت؟ بدل ما ترميها جدديها وارجعي البسيها تاني, وده اللي هنشوفه النهاردة مع بعض في موضوعنا, هنقولك افكار تجددي بيهم هدومك القديمة بطريقة مبتكرة وبسيطة وتحوليهم وتلبسيهم بشكل مختلف.
افكار تجددي بيهم هدومك القديمة:
1- حولي التيشرت لمريلة مطبخ:
لو عندك تيشرت قديم ممكن تحوليه لمريلة مطبخ بطريقة سهلة.
هاتي التيشرت قصي الجزء اللي قدام زي ما هو باين في الصورة كده.
اتني الجزء اللي تحت منه وخيطيه, وقسميه لجيوب صغيرة باي احجام انتي عايزاها, عشان تستغليها وممكن تحطي فيها اي حاجة.
الجزء اللي ورا من التيشرت, قصيه ل 6 شرايط بنفس الحجم 2.5 في 24.
خيطي كل 3 شرايط مع بعض.
وصلي الشريطين في بعض وخيطيهم بالشكل ده يبقى عندك شريط واحد طويل.
خيطي الشريط في جزء التيشرت اللي احنا قصناه.
وكده تبقى المريلة خلصت وده الشكل النهائي بتاعها.
2- اعملي كوم دانتيل:
لو عندك توب حمالات ممكن تحولي شكله وتركبي له قطعة دانتيل.
كل اللي هتحتاجيه توب, وقطعة دانتيل بعرض 6 انش تقريبا, ابرة, خيط, دبابيس, مقص.
اشبكي قطعة الدانتيل في الحمالة بتاعة التوب بالدبابيس بالشكل ده عشان تظبطي الشكل قبل ما تخيطي.
ابدأي خيطي الدانتيل في التوب.
بعد ما تخلصي قصي الدانتيل الزيادة, وقفليه من تحت يعني قطعة الدانتيل تبقى واخدة شكل دايرة.
وده هيبقى الشكل النهائي ليه.
3- اعملي تيشرت Backless:
لو عندك تيشرت عادي وزهقتي من شكله ممكن تجربي تغيري شكله وتعمليه Backless, شوفوا الطريقة بالتفصيل بالفيديو.
4- تصميم Kitty Print T-Shirt:
لو عندك تيشرت سادة وعايزة تغيري شكله افضل طريقة هتكون انك تعملي عليه طبعة بطريقة سهلة جدا.
كل اللي هتحتاجيه تيشرت سادة, الوان قماش او الوان اكريليك, ثمرة بطاطس, منديل ورق, Marker, سكينة, قطر, ورقة.
اقطعي البطاطس نصين بالطول, حطي البطاطس على المنديل عشان تمتص اي سوائل فيها, باستخدام ال Marker ارسمي وش قطة على البطاطس, حددي الرسمة بالقطر بعمق ¼ بوصة تقريبا, بالسكينة اقطعي البطاطس اللي حوالين الرسمة اللي انتي عملتيها بحيث الرسمة تبقى بارزة.
حطي اللون على الرسمة وابدأي اطبعي الشكل على التيشرت, بس اتأكدي قبل ما تطبعي الرسمة حطي الورقة بين طبقات التيشرت تحت الجزء اللي هتطبعي عليه عشان متطبعش الناحية التانية.
وده هيبقى الشكل النهائي للتيشرت.
5- حولي البنطلون لشورت:
لو عندك بنطلون جينز قديم وبطلتي تلبسيه ممكن تحوليه لشورت.
هاتي اي بنطلون قديم عندك قصية بالطول اللي انتي عايزاه للشورت, وبعدين بمكنة حلاقة قديمة امشي على الحروف بتاعته من تحت عشان تنتشيها.
وممكن بالمكنة تقطعيه من اي جزء تاني زي ما هو باين في الصورة كده يعني حسب اختيارك.
6- زيني التيشرت بالخرز:
ممكن بردو تغيري اي تيشرت سادة عندك بطريقة تانية انك تزينيه بالخرز.
اول حاجة حددي بال Mark المكان اللي هتبدأي من عنده التصميم بتاعك.
وعشان تدي سمك للكم وتقدري تخيطي عليه الخرز حطي له من جوه قطعة فازلين ودوسي عليها بالمكوى عشان تثبتيها.
على الترابيزة او اي سطح مستوي عندك ابدأي اعملي شكل التصميم اللي انتي عايزاة.
وبالطباشير او المارك حددي عرض التصميم او الجزء اللي انتي هتشتغلي فيه وتحطي فيه الخرز.
ابدأي خيطي الخرز بشكل التصميم اللي انتي عملتيه.
وده هيبقى الشكل النهائي ليه.
7- اعملي فيست بتيشرت قديم:
طريقة تانية لاستغلال اي تيشرت قديم عندك انك ممكن تحوليه فيست.
هاتي التيشرت وابدأي اقصية بنفس الشكل والخطوط اللي في الصورة, يعني قصي الكمين, وافتحيه من قدام, وبعدين ابدأي قصيه شرايط رفيعة جنب بعض.
وده هيبقى الشكل النهائي.
8- ضيفي دانتيل للتيشرت:
ممكن تضيفي قطعة دانتيل للتيشرت وتغيري شكله.
قصي التيشرت من الجنبين, شيلي منه القطعة اللي تحت الكمين.
هاتي قطعة الدانتيل وخيطيها في الجنب مكان الجزء اللي قصتيه.
وده الشكل النهائي للتيشرت.
9- اعملي خطوط نيون على الاسود:
لو عندك توب او تيشرت اسود سادة ممكن تغيري شكله وتخلي شكله احلى بانك تضيفي له الوان نيون.
هتحتاجي تيشرت او توب اسود, الوان اكريليك, فرشة رسم, شريط لاصق, قطعة كرتون.
ثبتي التيشرت على قطعة الكرتون بالشريط اللاصق عشان ميتحركش وانتي بتشتغلي عليه.
حطي الشرايط على التيشرت من تحت جنب بعض في اطوال مختلفة, حطي 9 شرايط جنب بعض.
شيلي شريط من بين كل شريطين يعني يبقى بين كل شريط والتاني فراغ.
ابدأي لوني الفراغات بالوان الاكريليك, اختاري اي الوان تفضليها, سيبي اللون ينشف وبعدين حطي طبقة تانية.
لما اللون ينشف خالص شيلي الشرايط من على التيشرت.
لو لقيتي حدود الخطوط مش مظبوطة او طالعة بره شوية ممكن بقلم اسود تمشي عليها تظبطيها.
وده الشكل النهائي للتيشرت.