ازاى القهوة بتأثر على جسمك و عقلك فى 6 ساعات بس من وقت ما تشربيها!

القهوة بتعتبر من اكتر المصنوعات الغذائية الاكثر استهلاكا على مستوى العالم كله ، المشروب السحرى اللى بتتزرع بذوره فى حوالى 70 دولة بيقف عليه بداية اليوم عند كتير مننا، لانه فى الغالب مدمنين القهوة مابيقدروش يفتحوا عينيهم من غير ما ياخدوا قهوتهم الصبح ، وكمان مابيقدروش يكملوا يومهم من غير فنجان القهوة بتاع نص اليوم او بالليل ، فلو كنتى من مدمنين القهوة يبقى المقال ده مهم تقريه ، اعرفى معانا فى المقال ده ازاى القهوة بتأثر على جسمك و عقلك فى 6 ساعات بس من وقت ما تشربيها !

ازاى القهوة بتأثر على جسمك و عقلك فى 6 ساعات بس من وقت ما تشربيها!

تأثير القهوة على العقل : 

الاسباب الرئيسية اللى الناس بتشرب القهوة علشانها هى انها تحسن مودهم و تحسسهم انهم فايقين و مصحصحين، لكن فى حقايق علمية وراء الاحاسيس دى لازم نكون عارفينها..

1- فى بعض المواد الكيميائية اللى بتبقى موجودة فى القهوة بتدخل المخ من خلال مجرى الدم و ده اللى بيخليها تأثر و تسبب الشعور بالفوقان والنشاط.

2- المواد الكيميائية دى كمان بتمنع تأثير  الـ adenosine ، وده هو الناقل العصبى اللى بيسبب الشعور بالكسل و النعاس. 

3- القهوة بتساعد على نقل الدوبامين ، اللى هى المادة اللى بتتسبب فى الاحساس بالسعادة و الانبساط.

4- القهوة كمان بتزود من معدلات الـ acetylcholine اللى بتتسبب فى زياد النشاط والقدرة العضلية. 

5- بتزود من معدلات الـ serotonin اللى بيسبب الاحساس بالراحة و الاسترخاء. 

فى ابحاث كمان بتقول انه ممكن يكون للقهوة تأثير اكبر على المدى الطويل زى تعزيز وتقوية الذاكرة ومقاومة الشيخوخة و تأثير التقدم فى السن. 

تأثير القهوة على الجسم : 

معظمنا بنشرب القهوة بسبب تأثيرها النفسي والعصبى ، لكن القهوة ليها تأثير كمان كبير على الجسم ، ازاى القهوة بتأثر على جسمك؟ خلونا نشوف مع بعض .. 

1- القهوة بتزود من معدلات الحرق فى جسمنا وبالتالى بنحرق دهون اكتر.

2- القهوة بتحسن من الاداء العصبى و الجسدى . 

3- القهوة بتعتبر من افضل مصادر مضادات الاكسدة . 

4- كوباية واحدة من القهوة  فيها من 2% لـ 11 % من الكمية اللى المفروض يكتسبها الجسم يوميا من فيتامينات  B2 وB3 و B5 . 

5- القهوة بتساعد على تقوية الاوعية الدموية.

تأثير القهوة على الجسم خلال 6 ساعات من وقت ما تشربيها : 

فى خلال 10 دقايق : 

الكافيين بيدخل مجرى الدم و يتسبب فى رفع معدل ضربات القلب و الضغط .

فى خلال 20 دقيقية : 

الادونسين بيبدا يشتغل و بالتدريج بيبدأ يقل الاحساس بالتعب وزيادة الطاقة، وكمان زيادة معدلات الدوبامين وده بيخلينا منتبهين ومركزين. 

فى خلال 30 دقيقة :

زيادة افرازات الغدة الكظرية و الاحساس بالصحصحة و التركيز. 

فى خلال 40 دقيقة : 

الجسم بينتج كمية اكبر من السيرتونين وده بيحسن من وظيفة الاعصاب وزيادة قوة وتناسق العضلات.

فى خلال 4 ساعات :

بيزيد التمثيل الغذائى للخلايا، وبالتالى بيزيد معدل الحرق والطاقة ،فبيبدأ الجسم فى حرق الدهون و ده بيسبب زيادة معدلات الاحماض فى المعدة.

فى خلال 6 ساعات :

الكافيين بيعتبر مادة مدرة للبول ، وبيتم التخلص من حوالى 50 % من الكافيين اللى اكتسبه الجسم فبتقل الطاقة للنص بعد مرور فترة من الوقت .

بعد ما عرفتى ازاى القهوة بتأثر على جسمك، لازم تعرفى انه ادارة الدواء و الغذاء الامريكية بتوصى انك ماتعديش حوالى 400 ملليجرام  “حوالى 4 فناجين” او اقل من استهلاكك اليومى للقهوة وكمان حاولى تكون قهوتك فيها كمية كافية من المية او اللبن وابعدى عن القهوة الجاهزة اللى بيبقى معاها سكر او مواد حافظة واستهلكى البن الطبيعى اكتر.

جربى  كمان حللي شخصيتك من نوع القهوة اللى بتحبيها !