بيكاتا الفراخ مع شرائح الليمون

بقلمريهام محمود فيوجبات رئيسية visibility1151

لو زهقتي تاكلي الفراخ بالطريقة التقليدية جربي وصفتنا النهاردة بيكاتا الفراخ مع شرائح الليمون طريقة جديدة ولذيذة وفي نفس الوقت سهلة.

بيكاتا الفراخ مع شرائح الليمون:

– المقادير:

– 2 ثمرة ليمون مقطعة شرايح رفيعة.

– 1 ½ معلقة صغيرة سكر.

– 4 فصوص ثوم مقطعة نصين.

– 4 صدور فراخ مخليه من العضم والجلد, متقطعة لقطع بسمك ¾ بوصة.

– ½ معلقة صغيرة ملح.

– ½ معلقة صغيرة فلفل اسود.

– 1 معلقة كبيرة زيت زيتون.

– 2 معلقة كبيرة زبدة غير مملحة.

– 1 معلقة صغيرة بصل مبشور.

– ½ معلقة صغيرة ثوم مبشور.

– 2 عود زعتر.

– 1 كوب شوربة.

– 1 معلقة صغيرة دقيق.

– 1 معلقة كبيرة كَبَر او قَبار “هنلاقيه موجود في السوبر ماركت”.

– 2 معلقة كبيرة بقدونس مفروم.

بيكاتا الفراخ مع شرائح الليمون
بيكاتا الفراخ مع شرائح الليمون

الطريقة:

1- الخطوة الاولى:

اخلطي شرايح الليمون مع السكر والثوم المقطع في طبق.

2- الخطوة التانية:

تبلي الفراخ بالملح والفلفل, سخني طاسة على نار متوسطة وحطي فيها 2 معلقة صغيرة زيت, ضيفي الفراخ للزيت وقلبيها على كل جنب لمدة 4 دقايق, طلعي الفراخ على طبق, ضيفي معلقة صغيرة تاني من الزيت وبعدين ضيفي لها خليط الليمون اللي جهزناه في اول خطوة, وقلبيه في الزيت لمدة دقيقة او لحد ما الليمون ياخد لون بني خفيف وبعدين طلعيه على طبق.

3- الخطوة التالتة:

امسحي الطاسة بمنديل ورق, وعلى حرارة متوسطة ضيفي 1 ½ معلقة صغيرة زبدة لما الزبدة تدوب ضيفي البصل, و ½ معلقة صغيرة ثوم مبشور, والزعتر, قلبيهم مع بعض لمدة دقيقة وبعدين ضيفي الشوربة, و 1/8 معلقة ملح , والدقيق وقلبيهم مع بعض بخفة لحد ما المكونات تغلي وبعدين قللي الحرارة عليهم, وسيبيهم على نار خفيفة لمدة 3 دقايق او لحد ما السائل يبقى حوالي 2/3 كوب, ارفعيه من على النار وشيلي منه عيدان الزعتر, وبعدين ضيفي للخليط 1 ½ معلقة كبيرة زبدة والكبر, وقلبيهم لحد ما الزبدة تدوب, وبعدين حطي الفراخ في الخليط ده وقلبيها على الجنبين عشان تشرب من الصوص وبعدين حطي فوقيها خليط الليمون.

ممكن تاكليها مع مكرونة ولما تيجي تقدميها طلعيها في الطبق ورشي الصوص على وشها من فوق.

الطريقة بالفيديو:

طريقة جديدة وسهلة لعمل الارز بالفراخ One pot Chicken Rice

وصفة الارز بالفراخ