ملابس محجبات عملية وانيقة

دلوقتي بقى في كتير من البلوجرز المحجبات اللي ممكن نستوحي منهم افكار ملابس محجبات ونعرف منهم كل جديد في عالم الموضة, والمجموعة اللي معانا النهاردة مميزة جدا ومنوعة ما بين الجيبات الماكسي, والجينز السكيني او البوي فريند, الكارديجان, والفيست.

والمجموعة دي هنلاقيها هتناسب كل الاعمار وكل الاوقات, منها اللي ممكن تلبسيه في الجامعة او الشغل, او حتي خروجك بعد الضهر لانها عملية وانيقة في نفس الوقت.

وهنلاقي الالوان كمان منوعة ما بين الالوان الزاهية زي الطوبي, البرتقاني, والازرق, والالوان الباستيل التريندي جدا الموسم ده, والكاروه والمقلم اللي كمان نازل موضة اوي, والالوان والطبعات في المجموعة عموما مناسبة لروح وجو موسم الصيف.

تعالوا نشوف مع بعض مجموعة ملابس محجبات عملية وانيقة!

أول ستايل للبس المحجبات هيكون الكارديجان أو الفست:

ممكن تختاري طول الكارديجان يكون مناسب علي طولك وكمان علي حسب الجزمة اللي هتلبسيها يعني لو أنتي طويلة يناسبك الكارديجان باي طول, لكن لو طولك متوسط أو قصيرة يفضل إنك تلبسي كارديجان ميعديش ركبتك وممكن تلبسي عليه الشوز بكعب عشان ميبينكيش قصيرة.. كمان الكارديجان ينفع للبس صبح أو ليل علي حسب القماشة ممكن تختاري من القطن للشيفون علي حسب نوع الخروجة.

تاني ستايل هيكون القميص أو الجاكت الجينز مع لبس الحجاب بشكل انيق:

القميص أو الجاكت الجينز موضة مكملة معانا من السنة اللي فاتت, لوك جديد وكاجوال للبس المحجبات وممكن تجربيه مع سكرت أو بنطلون.

تالت ستايل هيكون البنطلون البوي فريند جينز مع الحجاب:

اتكلمنا في مقالة قبل كده عن موضة البنطلون البوي فرند  انه بيكون عادة موديلة واسع مش سكيني يعني مناسب جدا للمحجبات, وتقدري تلبسيه باكتر من طريقة ممكن تلبسي عليه قميص وشوز رياضي لو انتي خارجة الصبح ورايحة الجامعة مثلا وعايزة حاجة مريحة, ممكن لو خارجة بعد الضهر يتلبس على شوز بكعب وبلوزة وتخليه استايل انيق وانثوي, ممكن يتلبس على بليزر او على جاكت جلد, او يتلبس عليه بلوزة طويلة او قصيرة, او يتلبس عليه بلوفر يعني يمشي مع كل حاجة تقريبا وقدامك اختيارات كتير عشان تنوعي في الاستايل بتاعك

صور وافكار ستايلات بالحجاب لأيام الصيف