10 حاجات ممكن تسمم حياتك..وازاي تمنعيها عشان تعيشي حياة افضل
دايما في رأي بيقول ان الناس او اللي حواليكي هيعاملوكي بالطريقة اللي انتي بتسمحي انهم يعاملوكي بيها, يعني انتي اللي بتحطي الحدود للتعامل اللي المفروض مافيش اي حد يتجاوزها, والنهاردة من خلال موضوعنا هنقول لبنات حوا على 10 حاجات ممكن تسمم حياتك, وهنتعرف على قايمة بالحاجات اللي المفروض متسمحيش لحد انه يعملها معاكي وده اكيد هيخليكي مبسوطة اكتر وهيخلي حياتك افضل وراضية عن نفسك اكتر.
حاجات ممكن تسمم حياتك:
1- التعليق على لبسك او مظهرك:
مستسمحيش لحد يعلق بطريقة سلبية على لبسك او مظهرك, ولو لقيتي حد احرجك وعمل كده متبدأيش ساعتها انك تبرري وتقولي اعذار انتي لابسة كده ليه او اختارتي اللبس ده ليه, انتي مش مذنبة عشان تقعدي تبرري في حاجة انتي حره في اختيارها ومش من حق اي حد تاني يتدخل فيها, وافتكري دايما ان الاشخاص الفضوليين اللي من النوعية دي معندهمش حاجة يعملوها في حياتهم غير انهم يتدخلوا في حياة غيرهم.
2- تكوني مضطرة انك تختاري بين حياتك العملية والحياة الشخصية:
للاسف ده بيحصل كتير جدا انك ممكن تتعرضي لضغوط سواء في البيت او في الشغل لكن مافيش حاجة تخليكي مضطرة انك تتخلي عن عيلتك وبيتك عشان الشغل والعكس, عشان كده متستسلميش للضغوط من شغلك او من عيلتك, كل اللي انتي محتاجاه بس في الحالة دي هو تنظيم الوقت انك تقدري توفقي بين الاتنين من غير ما تقصري في حاجة منهم بحيث انك تقدري تعملي شغلك على اكمل وجه وتوفري وقت لعيلتك وكمان لهواياتك وللترفيه عن نفسك.
3- كل حاجة في حياتك غيرك بياخد القرار عنك فيها:
مافيش شك ان الام والاب اكتر خبرة ويعرفوا في الحياة اكتر مننا, لكن في نفس الوقت ده ميديش الحق انهم يختاروا عنك كل حاجة في حياتك او يفرضوا قراراتهم عليكي مهما كانت يعني يقرروا مثلا مجال دراستك او شغلك او ارتباطك بشخص, لان دي في النهاية حياتك ولازم انتي اللي تبدأي تاخدي قرارتك فيها وتتحملي المسئولية والعواقب وتبقى ليكي شخصيتك المستقلة.
4- العلاقة اللي بتخليكي مش سعيدة:
العلاقة اللي دايما بتكوني فيها مش سعيدة وبتخليكي دايما حزينة وبتعيطي اكتر ما انتي مبسوطة ومرتاحة فيها, دي لازم تنهيها فورا, اكيد كل علاقة بيحصل فيها مشاكل لكن لو راجعتي نفسك ولقيتي ان العلاقة بتاخد منك اكتر ما بتديكي ودايما محبطة وحزينة وانك كنتي افضل من غير الشخص ده يبقى لازم تفكري انتي ليه لسه مستمرة مع الشخص ده؟ والافضل انك تنهيها.
5- الاكراه على العلاقة بين الزوجين:
جسمك هو ملك ليكي انتي بس و”الحقوق الزوجية” مش معناها ابدا انك تعملي حاجة ابدا بالاكراه او غصب عنك من غير الاعتبار لحالتك النفسية او رغبتك, ولو الزوج فعلا انسان متفهم هيفهم شعورك ويقدره, لكن لو زوجك اناني اكيد هيثور لرفضك, وفي الحالة دي لازم تتكلمي معاه عشان توصلي له ان حالتك النفسية او الجسدية مش سامحة بده عشان يفهم مشاعرك كويس.
6- الخداع المستمر:
متعديش الخداع او الكدب المستمر من اللي حواليكي سواء الاقارب او الاصدقاء او الزوج او من اي شخص حواليكي وبتتعاملي معاه, لو اكتشفتي الكدب وعايزة تكملي في العلاقة فلازم انك تواجهي الشخص اللي كدب عليكي انك فاهماه وعارفة انه بيخدعك وبيكدب عليكي, وتغيير الشخص ده مش مهمتك ابدا ولا المفروض تشغلي تفكيرك بده, انتي ممكن تقدمي الدعم ليه بس انه هو يغير من نفسه, ولو الشخص ده بيحبك وبيحترم وجودك في حياته اكيد مش هيكدب تاني.
7- عدم الاحترام في الشغل:
للأسف كتير من الناس بيضطروا انهم يتحملوا عدم الاحترام من صاحب الشغل او من زملائهم اللي معاهم في نفس المكان, لو لقيتي نفسك في الوضع ده يبقى لازم في الحالة دي تسألي نفسك هل انتي فعلا محتاجة الوظيفة السيئة دي بما فيه الكفاية عشان تتحملي الاساءة والاذلال اليومي ليكي؟, لازم متتردديش ابدا انك تطالبي بحقوقك, ومتخافيش انك تاخدي موقف حازم ولكن بأمان ضد اي اساءة ليكي.
8- الاساءة البدنية والعاطفية:
مافيش اي مبرر لاي اساءة ممكن تتعرضي لها باي شكل سواء اساءة بدنية بالضرب او عاطفية, سلامتك هي اهم حاجة لازم تحطيها في اعتبارك ولازم متخليش في حياتك اي شخص بيهدد باستمرار صحتك البدنية والعقلية والعاطفية, اتخلصي من اي شخص في حياتك بيتعرض لك باي اساءة.
9- السيطرة والتحكم في حياتك:
لو في اي شخص بيسيطر على حياتك وعلى كل خطوة بتعمليها سواء كان الاهل او الاقارب او الاصدقاء او الزوج ده مش معناه انه اهتمام بيكي لانه ده لما بيزيد عن حده بتبقى سيطرة على حياتك بشكل كامل وعدم ثقة, واي حد لازم يكون في حياته مساحة شخصية, والعلاقات عموما مستحيل تستمر من غير ثقة متبادلة عشان كده لازم تاخدي موقف من اي شخص بيحاول انه يتحكم في حياتك باي شكل.
10- الشعور بالنقص:
الكمال اكيد لله وحده مافيش انسان ابدا كامل, يعني مش موجود في الحياة الزوج الكامل المثالي او الطفل المثالي او فتاة الاحلام المثالية الكاملة من كله, ده بيكون في ذهننا كلنا اننا ندور على الكمال لكن في الحياة الواقعية ده مش موجود, عشان كده مافيش اي حد من حقه انه يحسسك بالنقص او ينتقدك بشكل مستمر ويبقى عايز يغير كل حاجة فيكي, بيحصل كتير ان الحبيب او الزوج يقارن بينك وبين واحدة تانية ويبقى عايزك تغيري من نفسك وتبقي زيها, يعني متسمعيش لكلام اي حد يطلب منك تغيري طريقة شعرك مثلا او اي حاجة فيكي وانتي تتخيلي ان التغيير ده هيخلي اللي حواليكي يحبوكي اكتر, لازم متخليش حد يحسسك بالنقص او انك محتاجة تتغيري عشان تتحبي.