ازاي تختاري البنطلون الجينز المناسب ليكي حسب شكل جسمك
البنطلون الجينز ببساطة هو القطعة اللي ممكن تلبسيها اي وقت تكوني محتارة مش عارفة تلبسي ايه, لانه عملي جدا وممكن تنسقي معاه اي حاجة, بس المهم انك تختاري البنطلون المناسب اللي يداري عيوب الجسم ويظهر مميزاته, وده اللي هنعرفة النهاردة مع بعض هنقولك ازاي تختاري البنطلون الجينز المناسب حسب شكل جسمك, ومميزات وعيوب كل موديل.
البنطلون الجينز المناسب حسب شكل جسمك:
اول حاجة عشان تعرفي تختاري صح لازم تعرفي الاول شكل جسمك واحنا اتكلمنا قبل كده عن اشكال الاجسام بالتفصيل, وزي ما هو باين في الصورة هنا خمس اشكال للاجسام, الجسم المستطيل, التفاحي او المستدير, الساعة الرملية, مثلث, مثلث مقلوب.
– الاختيار حسب موديل البنطلون:
1- الجينز السكيني Skinny:
البنطلون الجينز السكيني مناسب للجسم المستطيل, والساعة الرملية, والمثلث.
لكن مش مناسب للجسم المثلث المقلوب, والتفاحي او المستدير.
والموديل ده ميزته انه بيدي استدارة لمنطقة الوركين, وبيدي طول للساقين, بيحدد منطقة الوسط .
ومن عيوبه انه بيبين عيوب الجسم لانه بيبقى واخد شكل الجسم, عشان كده الافضل ان صاحبات الجسم الكيرفي يبعدوا عن الموديل السكيني.
2- الجينز الكلاسيك Straight Leg:
الموديل ده بيكون رجل البنطلون تقريبا كلها وسع واحد, مناسب للجسم الساعة الرملية, المستطيل, المثلث المقلوب, التفاحي.
مش مناسب بس للجسم المثلث.
ميزة الموديل ده انه بيداري الوزن الزايد, وبيشتت الانتباه عن منطقة البطن, والوسط, والوركين.
الافضل البنات اصحاب الجسم النحيف يبعدوا عن الموديل ده لانه هيبينهم بشكل انحف.
3- البنطلون الواسع ال Loose “Boyfriend”:
البنطلون الواسع او البوي فريند مناسب جدا مع الجسم المستطيل, والمثلث المقلوب, والساعة الرملية.
مش مناسب للجسم المثلث, والتفاحي.
الموديل ده بيخفي منطقة الوركين الضيقة, بيحدد منطقة الوسط, وبيداري عيوب الرجل بشكل عام.
من عيوبه انه بيخلي منطقة المؤخرة فلات, وممكن يقصر شوية.
4- موديل ال Flare:
الموديل ده بيكون ضيق من فوق ونازل على واسع من تحت الركبة, مناسب للجسم المثلث المقلوب, التفاحي, الساعة الرملية.
مش مناسب للجسم المثلث, والمستطيل.
الموديل ده ميزته انه بيبين منطقة الصدر والكتفين اصغر, بيصحح نسب الجسم يعني بيخلي في تناسب بين مناطق الجسم كلها.
الافضل البنات القصيرين يبعدوا عن الموديل ده.
5- الرجل الواسعة Wide Leg:
مناسب للجسم التفاحي, المثلث المقلوب, والساعة الرملية.
مش مناسب للجسم المستطيل, والمثلث.
مميزاته انه بيبين منطقة الوركين انحف, بيداري كل عيوب الرجل, ويعتبر اختيار ممتاز للبنات اللي جسمهم كيرفي.
لكن عيبه انه بيبين الرجل اقصر.
– الاختيار حسب ارتفاع الوسط:
1- الوسط العالي ال High-Waisted:
البنطلون الجينز اللي وسطه عالي مناسب للجسم المستطيل, الساعة الرملية, والتفاحي.
مش مناسب للجسم المثلث, والمثلث المقلوب.
بيتميز انه بيدي طول للرجل, بيظهر منطقة الوسط اصغر او انحف, بيداري منطقة البطن.
عيوبه انه بيقصر الجزء اللي فوق من الجسم, وبياخد من الطول وممكن يبينك اقصر.
2- الارتفاع المتوسط ال Medium Rise:
ارتفاع الوسط المتوسط مناسب للجسم الساعة الرملية, التفاحي, والمثلث.
مش مناسب للجسم المستطيل, والمثلث المقلوب.
الموديل ده ميزته بيداري منطقة البطن.
لكن بيخلي منطقة خط الوسط واضحة.
3- الارتفاع المنخفض ال Low Rise:
الوسط المنخفض وده اللي تقريبا الموديل التريندي دلوقتي ومعظم البنات بيلبسوه وده مناسب للجسم المثلث المقلوب, والمستطيل, والساعة الرملية.
مش مناسب للجسم التفاحي, والمثلث.
الموديل ده بيظهر المعدة, بيحدد منطقة الوسط, وبيدي طول للجزء اللي فوق من الجسم.
عيوبه انه بيقصر الرجل, بيظهر عيوب الوسط.
– الاختيار حسب طول الرجل:
1- الطول الكلاسيك:
الطول الكلاسيك او العادي للرجل تقريبا مناسب لكل اشكال الاجسام.
ميزته انه بيخلي الجسم كله متناسب مع بعضه.
بس لازم ميكونش مكرمش او فيه تنيات حوالين انكل او كاحل الرجل.
2- ال Boot Cut:
ال Boot Cut هو اللي طوله تقريبا بيكون نازل على الشوز شوية, مناسب للجسم المثلث, المثلث المقلوب, التفاحي, والساعة الرملية.
مش مناسب للجسم المستطيل.
ميزته انه بيدي طول للرجل, بيصغر منطقة الوركين.
والطول ده بيكون مناسب اكتر حاجة مع موديل ال Flared jeans.
3- ال Cropped 7/8:
ال Cropped او اللي بيسموه كمان 7/8 الموديل ده مناسب للجسم المستطيل, والساعة الرملية.
مش مناسب للجسم التفاحي, والمثلث.
الموديل ده بيظهر جمال انكل الرجل.
الافضل مع الموديل ده تتجنبي تلبسي الشوز ال Ankle straps او اللي بيكون فيه حزام حوالين انكل الرجل.
ازاي تختاري البنطلون المناسب لشكل جسمك
