13 سر من المحترفين عشان تطلعي صور رائعة بالموبايل

ساعات كتير بيكون في اسرار وحيل بسيطة ممكن نعملها بالموبايل وتطلع لنا صور احلى بس احنا مش بنبقى عارفينها, عشان كده النهاردة جمعنالكم مجموعة اسرار من المحترفين لصور موبايل احلى.

اسرار من المحترفين لصور موبايل احلى:

1- استخدام الهاند فري للتصوير:

الهاند فري ليها استخدام يمكن يكون في كتير مننا ميعرفهوش اننا ممكن نستخدمها للتصوير.

كل اللي هتعمليه انك هتوصلي الهاند فري بالموبايل, افتحي الكاميرا, واضغطي على زرار “+” عشان تلقطي الصورة.

2- للصور السيلفي:

لو عايزة تتصوري صورة سيلفي مع اصحابك والصورة فيها عدد كبير وفي حد مش ظاهر او ايدك على طالعة في الاطار ومش عارفة تظبطي الصورة وفي نفس الوقت مش متوفر معاكي سيلفي ستيك ممكن بطريقة تانية وبحيلة بسيطة تاخدي الصورة وتطلع حلوة.

هاتي اي كارت او بطاقة بلاستيك واتنيها مرتين بحيث انك تحطي الموبايل في واحدة من التنيات, استخدمي الهاند فري زي الطريقة اللي فاتت او اظبطي تايمر الموبايل والقطي الصورة.

3- الصورة البانورامية:

كلنا عارفين الصورة البانوراما هي اللي بتجيب مساحة كبيرة من المكان من غير تقطيع او تعديل.

وعشان تطلع معاكي مظبوطة ظبطي الوضع البانورامي في الكاميرا, ولو هتصوري شخص خليه يقف في مكانه, وابدأي حركي الموبايل في اي اتجاه انتي عايزاه يمين او شمال, ومجرد ما يخرج الشخص من اطار الصورة وقفي او بطئي, واثناء ده المفروض الشخص يتحرك ويقف في الاطار اللي بعده, زي ما هو باين في الصورة كده تمشي ازاي وامتى توقفي.

4- صورة مصغرة:

التأثير زي اللي احنا شايفينه في الصورة ده ممكن تعمليه بتطبيق “RollWorld app” او “Tiny Planet FX Pro” ودول تقدري تحمليهم من البلاي ستور, وبيهم تقدري تعملي اي صورة عندك سواء بانورامية او عادية بالشكل ده.

5- لقطة تحت المية:

ممكن تاخدي الصورة اللي تحت المية بطريقتين, ممكن تحطي الموبايل في كوباية ازاز فاضية وبعدين حطيها في المية والقطي الصورة بالهاند فري.

او حطي الموبايل في كيس بلاستيك عشان تحميه وحطيه بشكل مباشر في المية والقطي الصورة.

6- استخدمي عاكس:

احيانا الصورة بتبقى محتاجة اضاءة زيادة عشان تبان وتنور وتطلع احلى, وممكن نعمل ده باستخدام عاكس الشمس او الورق الفويل يتحط قدام الوش وانتي بتصوري هيضيف اضاءة للصورة اكتر وينورها.

7- استخدمي خاصية ال HDR:

خاصية ال HDR بتساعد ان الصورة تبقى منورة وبتخلي الالوان تطلع بوضوح اكتر .

شغلي الكاميرا واظبطيها على خاصية ال HDR والقطي الصورة, بس في حاجة لازم نعرفها ان الصور اللي بتتاخد بالخاصية دي بتاخد مساحة اكبر في الميموري بتاعة التليفون عشان كده ممكن تستخدميها بس في المناسبات الخاصة مش على طول, او لما تحبي تاخدي صورة الغروب, او الاشجار الخضرا, او صورة ورد, يعني الحاجات اللي عايزة تظهري الوانها اكتر.

8- استخدمي بالونة:

ممكن تاخدي لقطة من فوق زي اللي بتتاخد من الطيارات بطريقة بسيطة, هاتي بلونة انفخيها وثبتي فيها التليفون كويس جدا وخلي البالونة مربوط فيها حبل او استك طويل, اظبطي التايمر بتاع الكاميرا, وامسكي البالونة بالحبل وخليها تطير لفوق تلقط الصورة.

9- لقطة Macro:

اللقطة الماكرو من اللقطات اللي مش بتطلع باحترافية اوي بكاميرة الموبايل, لكن مع الحيلة دي هتقدري تطلعيها باحترافية, ممكن تستخدمي عدسة مؤشر ليزر اللي بيلعبوا بيه الاطفال, او عدسة كشاف جيب من الصغير, ثبتيها على كاميرة التليفون ببنسة شعر ولاصق زي ما باين في الصورة كده والقطي الصورة.

10- استخدمي نضارة الشمس كفلتر:

ممكن تستخدمي نضارة الشمس كفلتر او عشان تعملي تأثير على الصورة وتطلع بشكل احلى, كل اللي هتعمليه انك هتلقطي الصورة من خلال عدسة نضارة الشمس.

11- اضافة وهج او لون مختلف للصورة:

ممكن تعملي تأثير لون مختلف على الصورة, كل اللي هتحتاجيه ورق ملون نص شفاف وده هتلاقوه موجود في المكتبة, هتجيبي الورق الملون تحطيه قريب من حافة عدسة الكاميرا عشان تدي تاثير اللون والقطي الصورة.

12- استخدمي صورة تانية:

ممكن تاخدي صورة بطريقة مختلفة, طلعي اي صورة تعجبك من على النت, وحطيها على عينك زي ما هو باين في الصورة كده, واعملي اي تعبير بوشك يمشي مع الصورة يعني انتي وخيالك بقى تقدري تطلعي صورة مبتكرة زي ما انتي عايزة.

13- تنضيف عدسة الكاميرا:

استخدمي الجومة نضفي بيها كاميرة الموبايل هتعمل فرق كبير جدا في الصور.

12 غلطة لازم تتجنبيهم عشان تطلعي بشكل رائع في الصور