7 علامات تقولك ان شريك حياتك هو صديقك المفضل

ريهام محمود

في

3917

العلاقة الناجحة بين اي اتنين لازم تقوم على التضحية والالتزام والحب غير المشروط بين الطرفين, وكل طرف يقدم للتاني زي ما بياخد منه بالظبط والعلاقة لازم تكون خالية من اي مصلحة لان في النهاية ده اكيد هيأدي لفشل العلاقة, لان احيانا في ناس بتدخل العلاقات لهدف معين سواء مادي او معنوي مثلا يكونوا خارجين من علاقة حب وحابين ينسوها فيدخلوا في علاقة جديدة يعني داخلين العلاقة لمكسب شخصي ليهم وبالتالي في الحالة دي مش هيقدموا في العلاقة زي ما بياخدوا منها.

وعشان اي علاقة تنجح وتستمر للابد لازم تبدأ بالصداقة اولا, لان الصداقة هتدي فرصة للطرفين يتقربوا من بعض ويعرفوا بعض اكتر وكل واحد يشوف الطرف التاني على طبيعتة بعيوبة قبل مميزاته, فلو بصيتي لحبيبك او شريك حياتك كصديق اولا ده هيبقى فرصته اكبر وافضل بكتير انه يستمر معاكي كحبيب.

وعشان تعرفي اذا كانت علاقتك هتتحمل ضغوط الحياة وهتستمر للابد, اسألي نفسك هل شايفة شريك حياتك مجرد حبيب ولا هو كمان صديقك المفضل ؟ والنهاردة هنعرف مع بعض علامات تقولك ان شريكك هو صديقك المفضل عشان نساعدك في اجابة سؤالك.

علامات تقولك ان شريكك هو صديقك المفضل:

1- بتضحكي معاه وبتبقي مرحه اكتر من اي شخص تاني:

اكيد كلنا بنتعرض في الحياة لضغوطات وحالات احباط, لكن بنحاول نسرق لحظات سعادة ونضحك ونخرج نفسنا من الضغوط, وهنا تيجي مهمة شريك الحياة اللي يقدر يخرجك من الحالة دي ويضحكك ويغير مودك للاحسن ويخليكي تنسي كل مشاكلك, ولو قدر يعمل ده يبقى هو مش بس حبيب لا هو صديقك المفضل.

2- بتحسي بالراحة وتستمتعي وانتي معاه:

شريك حياتك لازم تكوني حاسة بالراحة وانتي معاه ويخرج الجزء المرح والمجنون اللي جواكي حتى اللي انتي نفسك مكنتيش تعرفي انه موجود جواكي يعني يخليكي تخرجي كل اللي جواكي وتستمتعي بوقتك وانتي معاه ويحب يشوفك دايما مبسوطة وبتقضي وقت حلو, فلو حسيتي وانتي معاه بالسعادة والانبساط يبقى اكيد الشخص ده هو افضل صديق ليكي قبل ما يكون حبيب.

3- تقدري تعتمدي عليه:

الحبيب اللي يكون موجود معاكي في اي وقت تحتاجيه فيه, لو زادت عليكي ضغوطات الحياة او حسيتي انك مكسورة او محبطة او بتمري باي موقف صعب, هيكون جنبك ويساعدك ويقدم لك كل اللي يقدر عليه ويفضل معاكي وميسبكيش وفي نفس الوقت من غير ما يحسسك انك عبء او مساعدته ليكي دي هو مجبر عليها لكن هيساعدك بكل حب وهيفضل جنبك لحد ما تبقي كويسة وتبدأي من جديد, اللي هيعمل كل ده اكيد هو افضل صديق وحبيب تقدري تعتمدي عليه في حياتك وتبقي مطمنة وانتي معاه.

4- تقدري تتصرفي على طبيعتك وبراحتك وانتي معاه:

مش هتبقي محتاجة نك تغيري طريقتك واسلوبك عشان تقنعيه بيها لكن هتتصرفي بحرية وانتي معاه وهتبقي على طبيعتك وممكن تعملي اي حاجة مش هتقعدي تفكري او تحسبي تصرفاتك, ونفس الطريقة هو كمان هيتصرف معاكي بنفس الطريقة وهيبقى على طبيعته معاكي.

5- ممكن تختلفي معاه لكن من غير ما تبوظي علاقتكم:

افضل الاصدقاء ممكن يختلفوا ويتخانقوا مع بعض عادي وطبيعي جدا ولكن مش بيخلوا خلافهم ده يبوظ العلاقة او ينهيها, يعني ممكن تتخانقوا لكن في النهاية توصلوا لحل ومتخلوش الخلاف يوصل لطريق مسدود او كل طرف يحاول يفوز ويطلع هو اللي صح وخلاص, يعني يكون في حل وسط في اي مشكلة.

6- ممكن تتكلمي معاه لساعات من غير ما تزهقي:

افضل صديق ليكي مش هتحسي بملل ابدا مهما اتكلمتي معاه بالساعات, ممكن تفضلوا تتكلموا طول الليل ومتسبيهوش غير لو انتي عايزة تنامي فعلا لكن مش زهق او ملل منه, هتبقي دايما مستمتعة بالتواصل والكلام معاه, وهتحبي تسمعي اي حاجة بيقولها, لانك بتبقي متواصلة معاه على المستوى الروحي جدا.

7- ممكن تدخليه في دايرة اصدقائك:

تقدري تعتبري شريكك هو افضل صديق ليكي لما تقدري تدخليه بكل بساطة في دايرة اصدقائك, يعني مش بس يبقى اللي بينكم علاقة رومانسية لكن كمان ممكن تقضوا وقت حلو مع بعض مع اصحابك من غير ما يغير منهم او يبقى مش عايزك مثلا تخرجي معاهم ويبقى كل وقتك ليه هو, لكن بالعكس بتكوني مستمتعة بوقتك مع اصحابك وهو معاكي.

لو سؤالك كانت اجابته فيها اغلب الحاجات اللي احنا قولناها في المقال بتاعنا يبقى في الحالة دي شريك حياتك هو اكيد صديقك المفضل وعلاقتكم هتستمر واكيد هتكون ناجحة.