7 اكلات كليهم كل اسبوع عشان تضمني انك بتاكلي اكل صحي على قد ما تقدري وتحافظي على وزنك

كلنا تقريبا ما بين الوجبات ساعات بندور على سناكس او وجبات خفيفة ناكلها, وفي العادة بنتجه للاكلات اللي كلها دهون وسعرات حرارية وده اللي بيسبب لنا زيادة في الوزن, عشان كده النهاردة من خلال موضوعنا هنقولكم على اكلات صحية سهلة تاكليها خلال الاسبوع كوجبة خفيفة عشان تتأكدي انك بتاكلي اكل صحي على قد ما تقدري وفي نفس الوقت تحافظي على وزنك, وتقدري تحضريها بشكل اسبوعي تسهلي على نفسك الموضوع وتبقى جاهزة وفي متناول ايدك اول ما تحسي بجوع بدل ما تروحي للاكلات اللي ممكن تزود وزنك.

اكلات صحية:

1- الكينوا:

الكينوا من اسهل الاكلات اللي ممكن تحضريها وفي نفس الوقت وجبة صحية جدا, هاتي 2 كوباية كينوا وضيفي لهم 4 كوبايات مية وحطيهم مع بعض على نار عالية لحد ما يغلوا, بعدين قللي النار وسيبيه لحد ما يستوي تقريبا من 7 – 10 دقايق, سيبيه يبرد وحطيه في علبة واحفظية في التلاجة, تقدري تستخدميه مع الاكلات طول الاسبوع ممكن تضيفيه لحليب اللوز او لبن خالي الدسم مع المكسرات وتاكليه كوجبة فطار, او تحطيه مع السلطة, او تضيفيه لاي نوع خضار عندك, او للشوربة.

2- شاي اخضر مثلج:

المشروب ده منعش جدا في جو الحر والصيف, حضري الشاي الاخضر بالطريقة العادية وضيفي له التلج وشرايح الليمون والنعناع واحفظيه في التلاجة, واشربي منه اي وقت تحسي بالجوع, المشروب ده مفيد جدا لان الشاي الاخضر غني بالمواد المضادة للاكسدة اللي بتساعد على حماية البشرة من الشمس, ده غير انه بيساعد على تنحيف منطقة الوسط.

3- البيض المسلوق:

البيض المسلوق مع جزر مقطع تعتبر وجبة خفيفة صحية جدا لو حسيتي بالجوع في وسط النهار او بين الوجبات, ممكن تسلقي اكتر من بيضة وتحطيهم في التلاجة عشان تبقى جاهزة تاكليها في اي وقت.

4- الشوفان:

انقعي ¼ كوباية شوفان في حليب اللوز او لبن خالي الدسم وسيبيه من بالليل للصبح, والصبح ممكن تقطعي عليه نص ثمرة موز مع معلقة كبيرة بذور شيا ورشي عليه شوية قرفة وكليه كوجبة فطار, وممكن تحضري في برطمانات كذا كمية عندك وتحفظيهم في التلاجة عشان تاكلي منهم اي وقت, الالياف والبروتين اللي في الوجبة بيساعدوا ان المعدة تفضل مليانة فترة طويلة, ده غير انك هتبقي بدأتي يومك بوجبة صحية.

5- خضار طازة:

شرايح جزر, كرفس, بروكلي, قرنبيط, فلفل, طماطم, او اي نوع خضار تفضليه قطعية وحضريه في طبق كبير وحطيه في التلاجة, وكلي منه كسناكس او وجبة خفيفة ما بين الوجبات هتبقى وجبة مشبعة ومغذية وصحية في نفس الوقت.

6- خضار مشوي:

ممكن عشان تغيري في الطعم وتجددي جربي تعملي خضار مشوي بيبقى لذيذ وطعمه حلو جدا, اخلطي قرنبيط مع بروكلي مع كوسة وطماطم وفلفل وبتنجان ورشي عليهم شوية زيت زيتون واي اعشاب عطرية زعتر او ريحان واشويهم في الفرن, ممكن تضيفي من الخضار ده على البيض الصبح كوجبة فطار, او تاكليه في نص اليوم كوجبة خفيفة, او حتى كوجبة عشا.

7- سلطة خضار:

ممكن تحضري سلطة خضار من غير خس ولا جرجير ولا كرفس او اي خضروات ورقية عبارة عن فلفل الوان مقطع ومعاهم جزر وممكن تضيفي حمص او جبنة فيتا او ذرة, يعني تقدري تضيفي اي اضافات بتحبيها وتفضليها اكتر.

5 عادات يومية بتعمليها هي السبب في زيادة الوزن