11 علامة تحذر جسمك انك بتعاني من اجهاد شديد.. وازاي تعالجيه بطرق طبيعية

ريهام محمود
ريهام محمود
في
صحة
11611

طبيعي جدا ان اوقات كتير بنتعرض لاجهاد زيادة, واعراض الاجهاد ده ممكن تأثر على جسمك وافكارك وسلوكك بشكل سلبي , لكن لو عرفنا اعراض الاجهاد دي لما تظهر على الجسم اكيد هيخلينا نقدر نعالجه ونتفادى كتير من المشاكل الصحية اللي ممكن تحصل بسبب الاجهاد زي ارتفاع ضغط الدم وامراض القلب والسمنة والسكر, والنهاردة من خلال موضوعنا هنعرف علامات الاجهاد الزيادة على الجسم عشان لما تحصلنا نقدر اننا نعالجه في بداياته.

علامات الاجهاد الزيادة على الجسم:

المخ عشان يحمي الجسم من اي مخاطر صحية بيبعت اشارات لجسمنا والجسم بيعمل رد فعل عشان ينبهنا ان في مشكلة صحية او حاجة مش مظبوطة لازم ناخد بالنا منها, وفي حالة الضغط الخفيف المخ بيبعت اشارة وبعدين بيرجع لوضعه الطبيعي تاني, لكن مع التعرض للضغط الكتير والمستمر بيبدأ الجسم يتعرض لاعراض جسدية ونفسية, او اعراض مالهاش اي سبب مادي معروف يعني الجسم بيتعب وبنبقي مش عارفة السبب, وفي واحدة من الدراسات اللي اتنشرت في المجلة الامريكية للطب صرحوا ان 84% من المرضى بيشتكوا من اعراض بتكون اسبابها مش معروفة يعني تقريبا 84% بيعانوا من آلام ناتجة عن تعب نفسي بحت اللي بيسببه الاجهاد الزيادة.

وعلى المدى الطويل الاشخاص اللي بيعانوا من ضغط زيادة عن اللزوم ممكن الموضوع يتطور لامراض مزمنة, عشان كده هنعرف دلوقتي مع بعض علامات الاجهاد الزيادة على الجسم عشان نقدر نتجنب المضاعفات الصحية اللي ممكن تحصل على المدى الطويل.

علامات الاجهاد الزيادة على الجسم 1
علامات الاجهاد الزيادة على الجسم 1

1- صداع كلي او نصفي:

التوتر المستمر بسبب الاجهاد ممكن يتحول لصداع كلي او نصفي, هتحسي دايما بألم مستمر على الراس من الجنبين او الرقبة, هتحسي بضغط كبير حول منطقة الراس, وألم في فروة الراس, والرقبة, او عضلات الكتف.

2- ألم الصدر:

الشعور بآلام حوالين منطقة الصدر تعتبر من اعراض التوتر والاجهاد الزيادة, وفي العادة آلام الصدر الناتجة عن الاجهاد والتوتر والقلق بتكون حادة وبشكل متقطع.

3- تساقط الشعر:

تساقط الشعر واحدة من العلامات على التوتر والاجهاد الشديد, والدراسات اثبتت ان الاجهاد ممكن يأدي لتساقط الشعر بشكل كبير, وحالة تساقط الشعر دي تعتبر مؤقتة ولكن مع ذلك الاجهاد المستمر هيسبب تكرار حالة تساقط الشعر.

4- فقدان الرغبة الجنسية:

واحدة من اعراض الاجهاد الشديد هي فقدان الرغبة الجنسية, لانها بتكون محتاجة استقرار هرموني وحالة صحية كويسة جدا و الاجهاد الشديد هيأثر بشكل سلبي على الهرمونات والمزاج وده هيأدي بشكل طبيعي لانخفاض الرغبة الجنسية.

5- مشاكل التركيز:

القلق الزيادة والاجهاد المفرط بيأدي لتعطيل النشاط الطبيعي للفص الجبهي, ودي المنطقة اللي في المخ اللي بتكون مسئولة عن  الانتباه والتركيز.

6- مشاكل الذاكرة:

التوتر والاجهاد الشديد كمان بيأدي لتعطيل النشاط الطبيعي داخل الفص الصدغي, وده المسئول عن الذاكرة, والاجهاد المزمن في كتير من الاوقات بيضعف الذاكرة على المدى القصير, وده بيخلي التخزين المؤقت واستدعاء المعلومات صعب جدا.

علامات الاجهاد الزيادة على الجسم 2
علامات الاجهاد الزيادة على الجسم 2

7- مشاكل في المعدة:

تشنجات المعدة, وآلام المعدة, والاحساس بعدم الراحة في الامعاء, غالبا بتكون من العلامات الجسدية المرتبطة بالقلق والاجهاد الشديد, والاجهاد بيكون ليه تأثير واضح جدا عىل منطقة البطن بشكل خاص, لان التوتر بيأثر على عضلات البطن بطريقة تسبب ألم.

8- تقلب وتغير الوزن:

التوتر مرتبط ارتباط مباشر بتقلبات الوزن, والاجهاد المزمن في الغالب بيسبب زيادة في الوزن او ممكن يسبب العكس فقدان في الوزن, وهرمون الاجهاد “الكورتيزول” له تأثير كبير على مستوى الجوع, وارتفاع مستويات الكورتيزول بيسبب ارتفاع مستويات الانسولين في الدم وده بيزود الرغبة في اكل السكريات والاكلات الدهنية او الدسمة.

9- خفقان القلب:

خفقان القلب يعتبر واحدة من العلامات اللي ممكن تحصل بسبب الاجهاد الشديد, او الاستهلاك المفرط للكافيين او التدخين, وممكن الخفقان ده تحسي بيه في الصدر او الرقبة او الحلق.

10- آلام العضلات:

ألام واوجاع العضلات تعتبر من الاعراض المعروفة المرتبطة بالتوتر والاجهاد المفرط, وغالبا آلام العضلات والمفاصل بتكون سطحية, وبتختفي بمجرد ما تنخفض مستويات التوتر.

11- الاعراض الجسدية والعقلية اللي مش معروف سببها:

الاجهاد يعتبر حالة معقدة جدا وده بينطبق على الاعراض الناتجة عنه كمان, وغالبا العدد المحدد او الدقيق للاعراض الجسدية والنفسيةا اللي ممكن تحصل بسبب الاجهاد مش معروف وممكن يوصل لمئات او آلاف الاعراض المختلفة.

لكن في النهاية الاعراض المفاجئة  المستمرة سواء النفسية او الجسدية غالبا بتكون مرتبطة بالاجهاد الشديد, وفي الحالة دي حاولي تعالجيه بأسرع وقت.

علامات الاجهاد الزيادة على الجسم 3
علامات الاجهاد الزيادة على الجسم 3

– تقنيات للتخلص من الاجهاد بطرق طبيعية:

بصرف النظر عن التدخل الطبي لعلاج الاجهاد, في طرق طبيعية ممكن نعملها بنفسنا تساعد في علاج التوتر والاجهاد الشديد ومنها الحاجات اللي هنعرفها مع بعض في النقط الجاية:

1- التمارين الخفيفة, او المشي السريع, الجري البطيء, اليوجا, دي كلها حاجات ممكن تساعد جدا على علاج التوتر والاجهاد.

2- التأمل, وتمارين التنفس.

3- الدعم من الاهل والاصحاب او الكلام مع شخص بتثقي فيه من الحاجات المهمة اوي اللي ممكن تساعد على خفض مستويات التوتر.

4- ممارسة نشاط مريح والاسترخاء, القراءة, الاستماع للموسيقى, او حتى لعب لعبة كمبيوتر.

5- اتأكدي انك بتنامي ساعات نوم كفاية.

علامات الاجهاد الزيادة على الجسم 4
علامات الاجهاد الزيادة على الجسم 4

اعرفي وقت نومك وصحيانك ممكن يقولك ايه عن حالتك الجسدية والعاطفية

وقت نومك وصحيانك بيقولك ايه عن حالتك الجسدية والعاطفية
وقت نومك وصحيانك بيقولك ايه عن حالتك الجسدية والعاطفية

مقالات متعلقه

5 تقينات ذكية ممكن تساعدك على تخفيف التوتر بسرعة

5 تقينات ذكية ممكن تساعدك على تخفيف التوتر بسرعة

6 علامات بتدل إنك تحت ضغط مستمر وأنتي متعرفيش.. اعرفيها عشان تعالجيها

6 علامات بتدل إنك تحت ضغط مستمر وأنتي متعرفيش.. اعرفيها عشان تعالجيها

طريقة عمل عصير الليمون واللافندر لعلاج الصداع والقلق

طريقة عمل عصير الليمون واللافندر لعلاج الصداع والقلق