في يوم الصداقة العالمي .. ايه هي الصداقة الحقيقية وازاي تحافظي على علاقات الصداقة

بقلمريهام محمود فيعلاقات visibility1628

النهاردة هو يوم الصداقة العالمي اللي العالم كله بيحتفل فيه بعلاقة تعتبر من اهم العلاقات الانسانية والاجتماعية في حياتنا اللي منقدرش نستغنى عنها ابدا, والاصدقاء بيكونوا تقريبا مرايات بعض يعني كل واحدة بتبقى واضحة وصريحة قدام صاحبتها المقربة تقدر تحكي لها على اي حاجة ممكن متقدرش تحكيها لاي شخص تاني, الاصدقاء الحقيقين هما اللي بيتشاركوا في اوقات الفرح, وبيساندوا بعض في الاوقات الصعبة, يعني الصديق مافيش غنى عنه ابدا في حياتنا.

يوم الصداقة العالمي:

الصداقة تعتبر علاقة فريدة من نوعها في حياتنا لانها عكس العلاقات الاسرية بتكون باختيارنا يعني احنا اللي بنختار الدخول فيها وبنختار اصحابنا بنفسنا بعكس العلاقات الاسرية, كمان على عكس علاقة الحب او الزواج او العلاقات الرومانسية اللي لازم تكوني ملتزمة فيها انك تكلمي الطرف التاني بشكل يومي تقريبا, لكن الصديقة ممكن تعدي فترة من غير ما تتكلموا حسب ظروف كل طرف.

ومتخصصين العلاقات الانسانية بيأكدوا ان سن البلوغ اللي بيكون تقريبا في مرحلة المراهقة يعتبر هو العصر الدهبي لتكوين صداقات, لان خلال المرحلة دي بتبقى الصداقات اكتر تعقيد وليها متطلبات اكتر من مرحلة الطفولة اللي بيبقى بس معتمدة على اللعب مع الاصحاب, لكن مرحلة المراهقة كل شخص بيمر فيها بتغييرات كتير وتعتبر مرحلة اكتشاف الذات وكل واحد لسه بيعرف نفسه والصداقة بتساعد على ده ومن هنا بيكون دعم الاصدقاء مهم جدا.

ودلوقتي كمان مع انتشار وسائل التواصل الاجتماعي دي بقت وسيلة اضافية لينا بتساعدنا على تكوين صداقات جديدة او التواصل مع اصحابنا من خلال الرسايل اللي ممكن نبعتها في اي وقت, لكن مهم جدا اننا منستسهلش ومنخليش دي وسيلة التواصل الوحيدة بينا احنا محتاجين ان يبقى في تواصل مباشر بعيد عن شاشة الموبايل او الكمبيوتر, لان الاصدقاء هما اللي بيوفروا لنا التجدد الروحي والعقلي, هما اللي بيدوا الامل في المواقف الصعبة في الحياة وهيساعدوكي على ازالة التوتر في حياتك.

يوم الصداقة العالمي
يوم الصداقة العالمي

ايه اللي بيخلي الصداقة مثالية؟ وازاي نحافظ على الاصدقاء الحقيقين وعلى علاقات الصداقة مع ضغوط الحياة والمسئوليات زي الوظايف, والاسرة, وغيرها من المسئوليات اللي ممكن تشغلنا عن اصحابنا.

– حاجات لازم تكون موجودة في الصديق الحقيقي:

1- الاصدقاء الحقيقين دايما هما اللي بيكونوا متعاطفين مع اصحابهم وبيشاركوهم كل حاجة, دايما لما بتتعامل معاكي بتحط نفسها مكانك او بتحس ان تجربتك او مشكلتك تجربتها ومشكلتها هي, وبتسمع لك دايما في اي حاجة وبتحاول تنصحك وتضيفلك من تجاربها عشان تفيدك, ودي تعتبر اكبر واعظم حاجة في علاقة الصداقة ان كل واحد يسمع للطرف التاني.

2- الاصدقاء الحقيقين عندهم نكران ذات او خاليين من صفة الانانية, اللي موجودين دايما حوالينا لما نحتاجهم وبيهتموا بينا مش اللي بيفكروا في نفسهم, هما اللي ممكن تكون عندهم مشاكل في حياتهم الخاصة لكن في نفس الوقت ممكن يفضلوا حل مشكلة اصحابهم او القريبين منهم بدل من حل مشاكلهم هما.

3- الثقة من الصفات المهمة اللي مافيش غنى عنها ولازم تكون موجودة في الصديق الحقيقي, لان اعمق العلاقات الانسانية هي اللي بتكون مبنية على الثقة بين الطرفين, والصديقة الجديرة بالثقة معناها انه انتي مش لوحدك وفي حياتك حد تقدري تعتمدي عليه في اي حاجة.

4- الاصدقاء في الغالب بيكون بينهم حاجات مشتركة كتير, سواء كانت هوايات معينة, رياضة, اهداف في الحياة, قيم, دين, مباديء, وغالبا احنا بنفضل اننا نقضي الوقت مع الاشخاص اللي بيعملوا ويستمتعوا بنفس الحاجات اللي بنعملها, لان ده هيخلي في تواصل باستمرار وهيقوي علاقة الصداقة.

5- الاصدقاء مع وجهات نظر وخلفيات مختلفة مهمين لانهم بيساعدوا على تنمية شخصيات بعض لان هيكون عند كل واحد فرصة يسمع راي مختلف عن رأيه ووجهة نظر تانية غير اللي هو مقتنع بيها, الاصدقاء اللي بيقدموا افكار ونصايح ووجهات نظر مختلفة بستاعدك انك تعرفي اكتر عن نفسك وهتساعدك على تنمية نفسك من الناحية الانسانية وعقلك يكون منفتح اكتر.

يوم الصداقة العالمي
يوم الصداقة العالمي

6- الاصدقاء المرحين يعتبروا تقريبا افضل انواع الاصدقاء لانهم ببساطة بيعرفوا ازاي يخلوكي تضحكي ويخرجوكي من اي مود مش حلو, وبيحسسوكي دايما ان الحياة حلوة وبيمدوكي بالفرح والامل والراحة في اصعب مواقف الحياة.

7- اختاري الصديق الحقيقي اللي ميكونش نمام يعني لو قعدين مجموعة مثلا وواحدة قامت ولقيتي صاحبتك اتكلمت عليها مجرد ما قامت, يبقى حاولي تبعدي عن النوعية دي من الاصحاب لانها زي ما اتكلمت على غيرك هتتكلم عليكي في عدم وجودك, والصديقة النمامة تقدري تعرفيها بسهولة جدا وهي اللي بتتكلم على حد مجرد ما يمشي من المكان او يدي ضهره, لو دايما بتتكلم على اشخاص يعتبروا اصدقاء مقربين ليها, هتلاقيها بتعمل نفس الحاجة معاكي وبتتكلم عليكي معاهم, لو دايما بتقول حاجات سلبية عن اشخاص مش موجودين, تأكدي في الحالة دي ان دي مش صديقة حقيقية.

8- الاصدقاء الحقيقين بيدوا من وقتهم لاصدقائهم يعني انتي هتبقي حاجة مهمة في يومها ودايما هتلاقي وقت عشان تكلمك او تبعتلك او تقضوا وقت مع بعض, لكن لو هي مش بتعمل ده او مش بتسأل او مافيش تواصل, يبقى هنا ازاي تبقى صديقة حقيقية ؟

9- الصداقة الحقيقية فيها عطاء من الطرفين مينفعش طرف يدي ويهتم ويسأل والطرف التاني بياخد او بيستقبل بس العلاقات الانسانية والاجتماعية من اهم شروط نجاحها العطاء والاهتمام من الطرفين وايا كانت طريقة التعبير عن الاهتمام ده لانها اكيد بتختلف من شخص للتاني لكن المهم اننا نظهرها, ومهم اننا منستناش لما الصديق يطلب المساعدة او الدعم احنا لازم نقدمه من نفسنا, ولازم يكون التواصل مستمر ومش بس لطلب المساعدة لكن لتقديمها.

10- الاصدقاء الحقيقين هما اللي بيعملوا دايما اللي بيقولوه, يعني لو اتفقتوا على حاجة بتتنفذ, او وعدتك بحاجة معينة بتعملها ومش بتخلف وعدها معاكي الا لو ظروف معينة منعتها, الصديقة الحقيقية هي اللي دايما بتفتكر التواريخ المهمة بالنسبة لك.

يوم الصداقة العالمي
يوم الصداقة العالمي

11- الصداقة الحقيقية بتكون خالية تماما من المصلحة, يعني لو لقيتي صديقة بتقرب منك لهدف معين, او بتكلمك بس لما بتحتاج حاجة وبعد ما تنتهي مصلحتها تختفي, اكيد دي مش صديقة حقيقية.

12- الاصدقاء الحقيقين هيخلوكي دايما تحسي بالرضا عن نفسك, مش بمعنى انها تتفق معاكي في كل حاجة, لكن الصداقة لازم تخليكي تحسي بالرضا عن نفسك وشخصيتك زي ما انتي يعني مش دايما مثلا تعليقاتها سلبية ناحيتك ومحبطة وبتعلق على كل حاجة تخصك بشكل سلبي سواء مثلا في لبس او شكل او وزن او تصرف, الصديقة الحقيقية دايما بتحسي معاها ان الوقت بيمر بسرعة وبتقومي من القعدة معاها وانتي متحمسة وعندك شعور ايجابي واحساس بالحيوية.

13- الاصدقاء الحقيقين دايما هيحسسوكي بقيمتك وانك شخص مهم في حياتهم هتلاقيهم دايما بيسألوكي عن نصيحتك ورأيك وبيسمعوا للنصيحة دي كويس وممكن ينفذوها لو اقتنعوا بيها.

14- الاصدقاء زي الفريق اللي هدفهم انهم يحطوا احتياجات الاخرين قبل نفسهم لتحقيق هدف مشترك وهو ان الصداقة هي كل شيء, وبالتواصل والتعاون واننا نسمع بعض دي هي الصفات الاساسية اللي هتخلي الفريق ده ينجح نجاح قوي ومحدش يقدر يوقفه.

15- لو انتي محتارة ومش عارفة تحددي الاصدقاء دول حقيقين ولا لا ممكن تمشي ورا احساسك لو حسيتي بحاجة غلط يبقى اكيد لازم تعيدي نظر في علاقات الصداقة بتاعتك لو حسيتي انك مش راضية عنها او حسيتي بعدم ثقة ناحيتهم, او قلة اهتمام ودعم, يبقى عيدي النظر تاني وشوفي الاشخاص اللي ممكن يبقوا اصدقاء حقيقين او مجرد اصدقاء كويسين وبس.

يوم الصداقة العالمي
يوم الصداقة العالمي

– ازاي نحافظ على علاقات الصداقة ؟

1- المفروض ان التواصل مع الاصدقاء متعتبريهوش عبء عليكي او مهمة لازم تعمليها وتحطيها في قايمة المهام بتاعتك, لكن خلي التواصل مع الاصدقاء ده جزء من روتينك اليومي, سواء انتي تزوريها في بيتها او تكلميها هي تزورك, او تخصصوا يوم في الشهر تتجمعوا فيه, يعني في النهاية لازم يكون في تواصل مستمر بينكم لان الاصدقاء بتساعد على الحفاظ وتعزيز  العلاقات الصحية وبتعمل توازن ليكي في باقي العلاقات سواء زملاء العمل, او الاهل اللي ممكن يكونوا بيطلبوا منك حاجات كتير.

2- في ظاهرة دلوقتي واللي تعتبر من مساويء مواقع التواصل الاجتماعي ان الاصحاب لما بيتقابلوا مش بينفصلوا عن الشاشات وعالم التواصل الالكتروني وبيبقوا تقريبا قعدين مع بعض ومش مع بعض, عشان كده حاولي لما تكوني مع اصحابك في اي مكان تقفلي مواقع التواصل الاجتماعي وتسيبي الموبايل خالص او حتى تقفليه وتندمجي مع اصحابك وتستمتعي بالتواصل المباشر وتنبسطي على قد ما تقدري.

3- كل ما كانت علاقة الصداقة اقوى كل ما بقى تفكيرنا زي بعض, ولما بتكوني مع الصديقة الحقيقية بتنسوا تقريبا مشاكل الحياة, حاولي تدوري دايما على الاصدقاء اللي بتشجع وبترفع من روحك المعنوية, اللي مليانة حماس وحياة واللي بتتحمس دايما للافكار الجديدة الخاصة بيكي, لان هي دي علاقة الصداقة اللي هتستمر.

ولما تحسي ان ضغوطات الحياة زادت عليكي اوي, اعرفي انك مش لوحدك في الحياة الصديقة الحقيقة هتكون موجودة عشان تساندك وتدعمك.

يوم الصداقة العالمي
يوم الصداقة العالمي

7 انواع من الاصحاب كلنا محتاجينهم في حياتنا

انواع اصحاب محتاجينهم في حياتنا
انواع اصحاب محتاجينهم في حياتنا