افضل رسالة نصية تبعتيها لشخص مر بيوم سيء هتحسن يومه

في عالم النت والسوشيال ميديا والابليكيشنز الكتير اللي متوفرة تحت ايدينا بكل سهولة وبتقرب ما بينا المسافات,تقريبا كلنا يوميا بنبعت رسايل لاصحابنا او الناس القريبين مننا او اللي يهمنا امرهم وبنطمن على بعض, لكن لو في حد من اصحابك او يهمك امره بيمر بيوم سيء ومش عايز يتكلم مثلا وانتي عايزة تبعتي رسالة تهوني عليه او تحسني موده هتبعتي ده في رسالة ازاي ؟ واحنا عارفين ان الكتابة مش بتوصل المشاعر والافكار كاملة, ده اللي هنعرفه النهاردة مع بعض من خلال موضوعنا هنقولك افضل رسالة نصية تبعتيها لشخص مر بيوم سيء هتحسن موده وتغير يومه للاحسن.

افضل رسالة نصية تبعتيها لشخص مر بيوم سيء:

لو صاحبتك او اي حد قريب منك بيمر بيوم سيء وانتي بتحاولي تكلميه او تبعتي له رسايل ومش بيرد, وفي نفس الوقت انتي عايزة تكوني جنبه وتسانديه او تغيري موده, هنقولك على رسالة لو بعتيها هتخليه يرد ويتجاوب معاكي.

1- الخطوة الاولى عشان الشخص يرد عليكي يبقى لازم تبعتي رسالة تثير اهتمامه, وانك تحولي الموضوع كأنه لعبه, والرسالة النصية اللي هتبعتيها في الحالة دي هيكون نصها كالآتي ” يومك كان عامل ازاي اديه درجة من 1 – 10″ وهنا خبراء التواصل الاجتماعي بيقولوا ان الرسالة بالطريقة دي هتخلي الطرف التاني يستجيب بسرعة لانها هتحس انها بتلعب لعبة مش بترد على سؤال.

2- الخطوة التانية بعد ما الشخص يستجيب للرسالة اللي بعتيها وبعتلك وادى يومه “5” مثلا, اساليه “ممكن اعمل ايه عشان اساعدك واحسن يومك من 5 ل 6” او ايا كان العدد اللي بعته يبقى تردي على اساس الرقم اللي بعته, وبالطريقة دي انتي هتبقي عارفة هو شعوره ايه او زعلان بنسبة كام في المية, وفي نفس الوقت حاولتي مساعدته انك تخلي يومه احسن.

3- الشخص اللي انتي بعتي له الرسالة في الغالب مش هيقدر يعبر عن احتياجه في الوقت ده او يوصلك تساعديه ازاي, ولكن زي ما قولنا الخطوة اللي فاتت انتي وصلك خلاص هو حاسس بايه, في الحالة دي تقدري انتي تقدمي اقتراحات للمساعدة وحاجات ممكن تغير وتحسن مودهم.

لازم في النهاية تفتكري حاجة مهمة جدا عشان تقدمي الدعم او المساعدة لشخص, اتأكدي الاول من تلبيه احتياجاتك انتي الجسدية والعقلية والعاطفية والروحية لان مينفعش تقدمي مساعدة لحد وانتي شخصيا محتاجة المساعدة لان ده هيكون استنزاف لطاقتك ومش هتبقي قادرة على العطاء او انك تدي حاجة لشخص تاني.