20 تصرف يقولك ان شريكك بقى مش مهتم بيكي
اي علاقة حب ناجحة بتكون طريق باتجاهين يعني قايمة على فهم مشترك وبذل مجهود من الطرفين وطول ما هي كده هتفضل ناجحة ومستمرة, لكن لو حصل ان جهود انجاح العلاقة دي بقت قايمة على طرف واحد يعني طرف بيبذل مجهود ويدي وطرف ياخد بس اكيد ده هيكون بداية لفشل اي علاقة حب مهما كانت قوية, والنهاردة من خلال موضوعنا هنقول لكل بنات حوا تصرفات تقولك ان شريكك بقى مش مهتم بيكي او اهتمامه بدأ يقل عن الاول.
تصرفات تقولك ان شريكك بقى مش مهتم بيكي:
1- دايما مشغول:
اي علاقة ناجحة بين اتنين مهما كان مشاغلهم لازم يلاقوا وقت يتفرغوا فيه لبعض ويقضوه سوا, لكن ول دايما مشغول وهتلاقيه بيعتذرلك مثلا عن ميعاد بينكم ويقولك اي عذر من غير ما يحدد يعني يقول “عندي حاجة مهمة وخلاص” ده يبقى في الحالة دي تهرب من الميعاد او انه مش مهتم انه يشوفك.
2- هتلاقيه موجود حواليكي لو محتاج حاجة بس:
كتير من الاشخاص بيبقوا انانيين بطبيعتهم, لكن لما يكون الشريك مش مهتم هيكون كمان اكتر انانية من معظم الاشخاص, هيبقى معندوش مشكلة ابدا انه يتجاهلك 90 في المية من الوقت وال10 في المية اللي فاضلين موجودة بس عشان لما يحتاج لك او يكون عايز منك اي حاجة.
3- مش متواصل معاكي:
الاتصال لما يكون مش موجود تقريبا او بشكل متقطع دي علامة واضحة جدا بعدم اهتمام منه, ولازم تسألي نفسك هل في شخص مهتم بيكي ميكونش في تواصل بينكم او ممكن يقعد فترة طويلة من غير ما يكلمك؟ اكيد الاجابة هتكون لا وبالتالي ده يبين لك عدم اهتمامه بيكي.
4- بيتكلم دايما عن نفسه بس:
لما تكوني معاه هيكون اغلب النقاش او الكلام بينكم في حاجات بتدور حواليه هو, وبيتكلم عن نفسه بس سواء يشتكي من حاجة معينة حصلت في شغله مثلا, يعني كل حاجة عليه هو وانتي اللي يخصك مش مهم بالنسبة له.
5- مش مهتم بتفاصيل حياتك:
ابسط سؤال ايه اخبار يومك؟ ده مش هيبقى موجود في قاموس الشخص اللي فقد اهتمامة بيكي, هيبطل يسأل عن اخبارك او تفاصيل حياتك او ايه اللي حصل في يومك.
6- بيحب يسيطر على حياتك:
دي تعتبر اسوأ حاجة انه يكون شخص مش مهتم وفي نفس الوقت عايز يسيطر على حياتك ويتحكم فيكي يعني تبقي مش معاه لكن مش لغيره في نفس الوقت, ودي اكبر علامة تخليكي تهربي فورا من العلاقة دي.
7- بيلومك باستمرار:
دايما هتلاقيه بيرمي اللوم عليكي في اي حاجة او اي مشكلة, وده بيبقى متعمد او مقصود منه عشان يخليكي تبعدي عنه, وده تصرف بيدل على انه شخص جبان لانه مش قادر يواجه انه يقولك انه عايز يبعد فبيتصرف تصرفات غير مباشرة عشان تبعدي انتي من نفسك.
8- دايما يرد بغضب:
دايما بيرد عليكي بغضب او بطريقة عصبية او فيها قلة احترام ليكي, دي اكيد كلها تصرفات تقولك ان ده شخص مش مهتم يعني تقدري تعرفي بسهولة جدا من تصرفاته وسلوكياته معاكي بشكل عام, واتأكدي انه لما بيرد بغضب او بقلة احترام المشكلة مش فيكي لكن العيب والمشكلة الحقيقة فيه هو.
9- بيغيرك للأسوأ:
هتلاقي نفسك مع الوقت بتتغيري للأسوأ من تصرفاته, بتضحكي اقل, دايما حاسه بخمول واحباط وغيرها من الحاجات السلبية اللي ممكن تحصل لشخصيتك بسببه.
10- مش عارف قيمتك:
الشخص اللي مش مهتم اكيد هيبقى معندوش مشكلة ابدا انه يقلل من قيمتك, او يكون مش عارف قيمتك حتى لو انتي مهتمة بيكي وبتقدريه.
11- مش حاطك في اعتباره باي شكل:
ممكن تحصل اي حاجة في حياتة وميقولكيش عليها او تبقي اخر حد يعرف, مثلا اترقى في شغله او حصلت حاجة مهمة في حياتة مش هتبقي انتي من ضمن الناس اللي هيحطهم في اعتباره انه يقولهم الخبر وهتتفاجئي بيه.
12- دايما بيقول حجج واعذار:
لو حصلت اي حاجة منه او تقصير ولومتيه هتلاقيه دايما يقعد يخترع في اعذار وحجج فاضية ومش مقنعة, الشخص المهتم فعلا مش هيقول اعذار فارغة او مالهاش معنى.
13- اقل الناس قلق عليكي وعلى مصلحتك:
لو الشخص مهتم فعلا هيكون من اولوياتة الاهتمام بالطرف التاني وبمصلحته وباللي فيه الخير ليه وهيبقى قلقان على حياتة دايما, لكن لو هو مش مهتم ده يعتبر عدم احترام ليكي لاعلى درجة.
14- هيتجاهل دايرتك الداخلية:
هيبدأ في تجاهل دايرتك الداخلية اللي هما اصحابك واهلك والناس القريبين منك وهيبين عدم احترام واهتمام بيهم, وده بيبقى تصرف متعمد ومقصود منه عشان يثير غضبك.
15- دايما بيقول اعتذارات فارغة:
الاعتذارات الفارغة او اللي بتبقى تحصيل حاصل بتبدأ لما يكون الشخص فعلا بدأ يفقد الاهتمام بيكي, ببساطة جدا هو مش شايف انه ضروري انه يكون في معنى من ورا كلامه, يعني هتلاقيه بيعتذر اعتذار مالوش معنى والموضوع عادي وبسيط بالنسبة لك.
16- بينسى كتير:
بينسى كتير خصوصا الحاجات اللي كان بيفتكرها قبل كده يعني تواريخ مهمة زي عيد ميلادك مثلا او اي حاجة مهمة بالنسبة لك, لما ده يحصل دي تعتبر علامة مؤكدة بعدم الاهتمام.
17- مش ملتزم:
لو بيتجنب اي حاجة خاصة بالالتزام بعلاقتكم فدي تعتبر علامة غير جيدة بعدم اهتمامة, الاستثناء الوحيد للقاعدة دي ان تكون علاقتكم لسه في البداية او عارفين بعض من فترة قصيرة بس فبالتالي لسه مجال الكلام عن المستقبل محتاج وقت شوية, لكن غير كده ده يعتبر تحذير انه ده شخص مش مهتم بيكي كفاية.
18- بيعامل غيرك احسن منك:
لو شايفة انه بيعامل كل الناس احسن منك, وممكن يهتم بحد غريب اكتر منك, دي علامة واضحة جدا تقولك ان الشخص ده اكيد مش مهتم وان العلاقة دي هتنتهي بسرعة.
19- بيغشك:
لو اكتشفتي انه بيغشك في اي حاجة حتى لو بسيطة ده يعتبر علامة على عدم الاهتمام الكامل منه, ومينفعش انك تتسامحي او تغفري لو اكتشفتي الغش باي شكل.
20- دايما بتعيطي:
دي النتيجة الطبيعية المؤسفة لكل التصرفات والسلوكيات اللي احنا قولناها, هتحسي دايما بأذى والم نفسي, ودايما حزينة وبتعيطي, لو ده بيحصل بشكل متكرر وباستمرار, كده تبقي انتي اكيد مع الشخص الغلط ولازم تاخدي القرار انك تبعدي وتنهي العلاقة دي باي شكل.
10 حاجات لازم تكون موجودة في شريك حياتك المناسب
