ازاي تحطي واقي الشمس تحت المكياج بطريقة صح
اكيد زي ما دايما بنقول لكل بنات حوا ان واقي الشمس مهم جدا اننا نستخدمه طول السنة وخصوصا في فصل الصيف بشكل يومي عشان نحمي بشرتنا من اضرار اشعة الشمس, لكن السؤال اللي في بنات كتير ممكن يكونوا بيسألوه ايه هو مستوى او عامل الحماية اللي محتاجاه فعلا؟ هل محتاجة انك تجدديه وانتي بره البيت؟ هل ضروري انك تحطي واقي الشمس تحت المكياج؟ والنهاردة هنجاوب على كل الاسئلة دي وهنقولك ازاي تحطي واقي الشمس تحت المكياج بطريقة صح عشان يحمي بشرتك بشكل كامل.
ازاي تحطي واقي الشمس تحت المكياج بطريقة صح:
– ايه هو عامل ال SPF او عامل الحماية المناسب اللي محتاجاه بشرتك؟
اقل نسبة عامل حماية تستخدميها هي SPF 30 النسبة دي هي اللي هتحققلك الحماية الكافية من الشمس, ولازم توزعيه كويس جدا بالتساوي على البشرة كلها, ولما تيجي تشتري الواقي لازم تدوري على التلات مكونات دول فيه “اكسيد الزنك” و “ثاني اكسيد التيتانيوم” و “افوبنزون”.
لان اكسيد الزنك وثاني اكسيد التيتانيوم تعتبر واقيات شمس طبيعية مش كيميائية, فلو انتي بتعاني من بشرة حساسة يبقى لازم تدوري على واقيات الشمس اللي بتحتوي على المكونات دي لانها آمنة ومش بتسبب تهيج البشرة, وفي نفس الوقت بتحقق الحماية لبشرتك من اشعة الشمس الضارة وبتبقى زي القناع على الوش, وبالاضافة لده ممكن تحطيه بشكل آمن جدا تحت المكياج, ومتنسيش تحطي الواقي على اي جزء في البشرة هيتعرض للشمس مش الوش بس يعني الايد والرقبة او اي مكان تاني.
– لو المكياج بيحتوي على SPF:
في انواع مكياج بيبقى فيها نسبة عامل حماية SPF هل ده كافي لحماية البشرة؟ اكيد لا يعني عامل الحماية اللي في المكياج ميغنيش عن واقي الشمس ومتعتمديش عليه هو بس, بالاضافة لده ان المكياج احيانا مش بيتوزع بالتساوي على البشرة زي الكريم وبالتالي ده هيخلي في اماكن في البشرة مافيش فيها حماية كافية, عشان كده حتى لو مكياجك فيه عامل حماية لازم بردو تحطي واقي الشمس تحت المكياج وكمان الواقي يعتبر اساس لتطبيق المكياج على البشرة بشكل افضل.
والطريقة الصح انك تحطي واقي الشمس وتستني كام دقيقة وبعدين تحطي كريم الاساس, عشان تدي الواقي فرصة كافية ان البشرة تتشربه كويس قبل المكياج.
ولازم يكون من روتينك اليومي كل يوم الصبح تطبيق واقي الشمس قبل المكياج, وحطي طبقة كافية من الواقي قبل ما تحطي اي مستحضرات تجميل تانية على البشرة.
– ازاي تجددي الواقي خلال اليوم؟
تجديد الواقي خلال اليوم بيعتمد على اكتر من حاجة, لو انتي بتعرقي كتير او نزلتي البحر او حمام السباحة يبقى لازم تجددي الواقي على البشرة كل ساعتين لتلات ساعات, لكن لو انتي مش بتعرقي او مش هتتعرضي لمية ممكن يستمر معاكي من 4 – 6 ساعات, هنا السؤال ازاي تجددي الواقي وانتي حاطة مكياج؟
المفروض عشان بشرتك تبقى محمية بشكل كامل ان الواقي يتحط على الجلد بشكل مباشر تحت المكياج او المرطب او اي منتجات للعناية بالبشرة, لكن في حالة انتي بره وحاطة مكياج تقدري تحطي واقي الشمس على كريم الاساس, لكن اكيد الافضل انك تغسلي بشرتك وتحطي الواقي وتطبقي المكياج مرة تانية لكن طبعا لان تقريبا معظم البنات مش هيعملوا ده فهيبقى في الحالة دي انك تحطي طبقة من الواقي فوق كريم الاساس.
ممكن بدل كريم الاساس تستخدمي اللوس بودر Loose Powder او البودرة المعدنية اللي بتحتوي على عامل حماية من الشمس, وزي ما قولنا حطي الاول الواقي من الشمس وبعدها طبقي البودرة.
والخلاصة انه لو هتقضي فترة طويلة بره البيت يبقى لازم تجددي واقي الشمس كل كام ساعة, وحتي لو بتستخدمي نوع واقي الشمس السايل بردو ده مش هيمنع انك تجدديه فوق المكياج طول ما انتي بره, لان اكيد حماية بشرتك من الشمس واضرارها اهم بكتير من مكياج مثالي من غير عيوب.
افضل انواع الصن بلوك لكل نوع بشرة
