اعملي بنفسك لوشن بعد ازالة الشعر الزائد لبشرة ناعمة جدا
كتير من البنات بيهملوا ازالة الشعر فترات طويلة بسبب ان جلدهم حساس وبعد الازالة خصوصا للي بيستخدموا مكنة الحلاقة البشرة بتتعرض للالتهاب والاحمرار والحكة عشان كده لازم يكون بعد الحلاقة في عناية بالبشرة عشان نتجنب كل المشاكل دي, وده اللي جايبينه النهاردة لكل بنات حوا هنقولك ازاي تعملي بنفسك في البيت بمكونات بسيطة لوشن بعد ازالة الشعر الزائد هيساعدك على ترطيب البشرة ويخليها ناعمة جدا وهيحميها من اي ضرر ممكن يحصل للبشرة بعد الحلاقة.
طريقة لوشن بعد ازالة الشعر الزائد:
فوايدة:
1- اول ميزة وفايدة فيه انه خالي من اي مكونات كيميائية ممكن تضر البشرة لان كله من مكونات طبيعية تماما.
2- آمن جدا لو في جروح او ندبات في البشرة بعد الحلاقة.
3- بيهدي البشرة وبيعالج الجلد من الالتهاب.
4- مغذي جدا للبشرة.
5- مش بيحرق البشرة بعد الازالة, لان في بعض انواع البشرة لما بتيجي تدهن اي حاجة بعد الازالة بتسبب لهم حرقان لكن اللوشن ده مش بيعمل اي حرقان او ضرر في البشرة.
6- ممكن يستخدموا البنات وكمان الرجالة, وممكن تستخدميه على اي مكان في الجسم سواء الساقين او الذراعين او تحت الابط او حتى الاماكن الحساسة.
دلوقتي هنعرف مع بعض طريقتين لعمل اللوشن:
1- الطريقة الاولى:
المكونات:
– ½ كوباية زيت جوز هند.
– ¼ كوباية زيت زيتون.
– 1 معلقة كبيرة شمع العسل:
– ¼ كوباية جل صبار الالوفيرا.
– 1 ½ معلقة كبيرة مية ورد.
– 10 نقط زيت النعناع.
طريقة التحضير:
اخلطي زيت جوز الهند مع شمع العسل في طبق وسيحيهم مع بعض على حمام مية سخنة, بعد ما يدوبوا مع بعض كويس ارفعيهم من على الحرارة وضيفي لهم زيت الزيتون وزيت النعناع وجل الصبار ومية الورد اللي تعتبر قابض طبيعي للبشرة, قلبي المكونات مع بعض واخلطيها كويس جدا, صبي الخليط في اي ازازة بمضخة او اي علبة فاضية عندك لو مش متوفر عندك الازازة, واستخدميه بعد الحلاقة.
شوفي من هنا 17 وصفة طبيعية لعلاج الحبوب اللي بتسببها مكنة الحلاقة بعد ازالة الشعر.
2- الطريقة التانية:
المكونات:
– ½ كوباية خل تفاح او مية ورد.
– 2 معلقة كبيرة مية مقطرة.
– 1 معلقة كبيرة جلسرين.
– من 2 – 3 كبسولات فيتامين E.
– من 6 – 10 نقط زيت روز ماري “اكليل الجبل”.
طريقة التحضير:
اخلطي كل المكونات مع بعض وصبيهم في ازازة بمضخة او سبراي ورجيها كويس جدا عشان تخلطي كل المكونات مع بعض, واستخدميها بعد الحلاقة, او ممكن تستخدميها في اي وقت حسب الحاجة لو لقيتي بشرتك محتاجة ترطيب.