مجموعة حيل رائعة للخبز اكيد هتجربيهم
وصفات وحيل المطبخ اكيد مش بتخلص ولو انتي من محبات الخبز ودايما بتحبي تجربي حاجات جديدة في البيت بنفسك اكيد موضوعنا النهاردة هيساعدك جدا, جايبين لكل بنات حوا من هواة المطبخ والخبز حيل خبز هتسهل عليكي تعملي وصفاتك وتطلع ناجحة ومظبوطة.
حيل خبز رائعة:
1- من الحاجات اللي بتحصل معانا دايما لما بنيجي نكسر بيضه في الطبق ممكن يقع منها قطع قشر مكسور عشان تطلعيها بكل سهولة بلي صوباعك مية وحطيه على القشر هيلقطه زي المغناطيس وهيطلع بسهولة جدا.
2- لو هتعملي الكيك الجاهز اللي بيتباع في السوبر ماركت بدل ما تستخدمي زيوت نباتية زي ما بيكون مكتوب في المكونات استبدلية بالزبدة, واستبدلي المية باللبن هتطلع معاكي احلى بكتير.
3- زيني البسكويت او الكوكيز او الكيك بدقة وبطريقة سهلة وبسيطة باستخدام حقنة, املي الحقنة العادية بالكريمة او بالشوكولاتة او اي حاجة هتزيني بيها وابدأي في تزيين البسكويت او الكيك.
4- الكوكيز حلاوتة لما يكون طري مش ناشف وقطمتة مطاطية شوية وعشان يفضل كده بعد ما تعمليه اكسري كل واحدة كوكيز نصين واحتفظي بيها في علبة بلاستيك بالطريقة دي هيفضل محتفظ بطعمة زي ما هو ومش هيتغير.
5- لو بتقابلك مشكلة ان الكيك دايما بيلزق في القالب او الصينية وبيكون صعب تطلعيه, اخلطي شوية سمنة وزيت ودقيق مع بعض وبفرشة ادهني الصينية قبل ما تحطي فيها العجينة.
6- زيني الكب كيك بطريقة جديدة وسهلة باستخدام قطعة دانتيل حطيها فوق الكيك ورشي سكر بودرة عليها وبعدين شيليها بالراحة هيطلع السكر واخد شكل قطعة الدانتيل.
7- اسهل طريقة عشان تزيني الكيك بلونين فانيليا وشوكولاتة مثلا, حطي كيسين في قمع التزيين وحطي كل لون منهم في كيس واضغطي عليهم وزيني الكيك بتاعك بالطريقة العادية.
8- ابتكري واعملي الكيك بتاعتك بطريقة مختلفة باضافة الوان طعام, استخدمي الكريمة البيضا العادية وضيفي لها معلقة واحدة صغيرة من اي لون تختاريه.
9- كبديل للالوان لو مش متوفرة عندك ممكن تستخدمي الجيلي بدل كريمة التزيين البيضا.
10- السكر البني استخدامة صحي اكتر من السكر الابيض العادي لكن بيكون اصعب في التعامل معاه لانه بيبقى صلب اكتر, عشان يبقى اسهل في التعامل معاه حطيه في الميكروويف وحطي فوقية منديل ورقي مبلول بعد ما ترطبيه شوية بالمية وسيبيه 20 ثانية وطلعيه.
11- عشان السكر البني ميمسكش في بعضه تاني خزنيه مع شريحة خبز, يعني حطيه في علبة وحطي فوقية شريحة الخبز واقفليها.
12- لو الوصفة اللي بتعمليها في مكوناتها موجود تستخدمي سكر بني ومش متوفر عندك, ممكن تعملي السكر البني بنفسك في البيت استخدمي سكر ابيض عادي واخلطي معاه شوية عسل اسود.
13- لو ماشية على حمية غذائية ومش عايزة تستخدمي الدقيق العادي, ممكن تستبدلية بدقيق الشوفان, هاتي الشوفان العادي واطحنيه في الخلاط كده هيبقى عندك دقيق صحي خالي من الجلوتين اللي بيتعارض مع الحمية او الرجيم.
14- للناس النباتيين اللي مش بيستخدموا الزبدة في اكلاتهم ممكن تستبدليها بالافوكادو في وصفة الكيك.
15- لو نسيتي الكب كيك او المافن في الفرن وسيبتيه فترة زيادة واتحرق منك من تحت, ممكن تبشري الطبقة المحروقة بالمبشرة عشان تتخلصي منها.
16- لو مش متوفر عندك نشابة لفرد العجين ممكن تستخدمي بدالها اي ازازة زجاج فاضية تفردي بيها العجين.
17- لو مش متوفر عندك شوكولاتة ملونة او الكاندي الملونة اللي بتترش على الحلويات, ممكن تعمليها بنفسك في البيت بطريقة سهلة, بمكونات بسيطة عبارة عن 2 كوب سكر بودرة مع معلقة صغيرة بياض بيض ومعلقة صغيرة مية دافية و1/4 معلقة صغيرة فانيليا او اي نكهة تفضليها وذرة ملح والوان طعام.
في طبق او بوله اخلطي بياض البيض مع المية واضربيهم كويس لحد ما يتحول لرغوة وبعدين ضيفي له السكر والملح واضربي الخليط تاني لحد ما توصلي للقوام المناسب ميكونش سايل يعني يبقى سلس وناعم لكن سميك جدا, ولو لقتيها سميكة زيادة عن اللزوم ممكن تضيفي لها شوية مية زيادة ولو سايلة اوي ضيفي لها سكر لحد ما توصلي للقوام المناسب, بعد كده ضيفي الوان الطعام اللي اختارتيها وقلبي كل المكونات مع بعض, حطي الخليط في كيس حلويات, افردي ورقة زبدة على صينية وابدأي اعملي خطوط رفيعة طويلة جنب بعض, سيبيه ينشف في درجة حرارة الغرفة, شيلي الخطوط اللي انتي عملتيها بالراحة من على ورق الزبدة وقطعيها على لوح التقطيع بالحجم اللي انتي عايزاه.
18- ممكن تستخدمي بدائل لبعض الحاجات اللي بتستخدميها في الخبز:
– ½ معلقة صغيرة كريمة الترتار + ¼ معلقة صغيرة كربوناتو = معلقة صغيرة بيكنج باودر.
– الشوفان = دقيق البقسماط او فتات الخبز.
– كوباية لبن + معلقة صغيرة خل, او كوبابة لبن + معلقة صغيرة عصير ليمون, او كوباية زبادي = كوباية زبدة.
– ¼ معلقة صغيرة شطة + ½ معلقة صغيرة زعتر مجفف + ¼ معلقة صغيرة ريحان + فص ثوم مفروم = معلقة صغيرة من توابل الكاجون “تعتبر اشهر نوع توابل في امريكا الشمالية اللي بتستخدم في المعجنات”.
– مكعب شوكولاتة من غير سكر + معلقة صغيرة سكر, او 3 معالق صغيرة شوكلت شيبس = مربع شوكولاتة الحلويات.
– 3 معالق صغيرة كاكاو + ومعلقة صغيرة Shortining, او 3 معالق صغيرة كاكاو + معلقة صغيرة زيت نباتي = مربع شوكولاتة.
– 2 معلقة صغيرة دقيق لجميع الاستخدمات = معلقة صغيرة نشا.
– ¾ كوباية شراب ذرة فاتح + ¼ كوباية عسل اسود = كوباية شراب ذرة غامق.
– كوباية سكر ابيض + ¼ كوباية مية = كوباية شراب ذرة فاتح.
– كوباية خبز ناشف مطحون = كوباية دقيق بقسماط.
– معلقة صغيرة زبدة سايحة + كوباية لبن كامل الدسم = كوباية كريمة.
– ¼ ثمرة بطاطس مهروسة, ¼ كوباية قرع, او ¼ كوباية خوخ, ½ معلقة صغيرة نشا البطاطس, او 2 بياض بيض, او 2 صفار بياض = بيضة كاملة.
19- لو العجينة محتاجة صينية اصغر من اللي عندك ومافيش صينية على قدها متوفرة في البيت ممكن تفرديها في الصينية الكبيرة عادي وتحطي لها في الجنب ورق فويل كبديل لحرف الصينية.
20- لو عندك موز اخضر وعايزة توفري في الوقت ويستوي بسرعة, حطي في الفرن على درجة حرارة 300 لحد ما لون قشرته يتحول للون الاسود.
21- اعملي الكب كيك بطريقة مختلفة, بعد ما تصبي الكب كيك في القوالب حطي في نص كل واحدة منهم واحدة مارشيملو وحطيها في الفرن المارشميلو هيسيح على الوش وهيدي الكيك شكل وطعم مختلف.
22- شوفوا في الفيديو اكتر من طريقة لتزيين حروف الفطيرة وعشان تخليها مقرمشة.
23- اعملي كريم شانتيه في البيت بطريقة سهلة, هاتي برطمان فاضي, حطي فيه كوباية لبن او حسب كمية الكريم شانتيه اللي انتي عايزاها وضيفي عليهم معلقة صغيرة سكر بودرة ومعلقة صغيرة مستخلص الفانيليا, واقفلي البرطمان ورجيه جامد لمدة تقريبا 3 او 5 دقايق لحد ما الخليط يتحول عندك لكريمة.
الطريقة بالفيديو:
24- عشان تحافظي على الكيكة بتاعتك طرية زي ما هي لما تحفظيها حطي فوقيها شريحة خبز.
25- عشان تتخلصي من اي هوا في عجينة الكيكة وتخليها متساوية في الصينية, قبل ما تدخليها الفرن امسكي الصينية واخبطيها في الرخامة كذا مرة.
26- ساعات كتير الكيك بيفشل مننا ومش بنبقى عارفين السبب ايه لكن فشله ليه اسباب كتير:
– لو طلعت منفوخة او عالية من النص اكتر من الجناب ده ممكن يكون سببه ان الفرن كانت سخنة اوي اول ما حطتيها في الفرن, او استخدمي كمية دقيق زيادة.
– لو غامقة من تحت اوي, يبقى ممكن تكون الصينية كبيرة اوي او غويطة اوي, الصواني الغامقة بتمتص الحرارة اكتر عشان كده لو حاطه الكيك في صينية غامقة خليها على رف فوق بعيد عن حرارة الفرن من تحت.
– ممكن يكون قعر الصينية نفسه مش مستوي وده ممكن يسبب حرق الكيك من تحت.
– لو وش الكيك عامل شقوق ممكن يكون بسبب ان الحرارة كانت عالية اوي, او تكوني حطيتي كمية زيادة من الدقيق او البيكنج بودر.
– لو الكيك سقط منك لتحت, ممكن تكون الحرارة كانت واطية اوي, او فتحتي الفرن عليها اثناء الخبز, او طلعتيها من الفرن بدري قبل ما تستوي كويس, او ممكن تكوني حطيتي كمية زيادة زبدة او سكر او كربوناتو او بيكنج بودر, او محطتيش دقيق كفاية.
– لو ملمسها خشن, ممكن تكون الحرارة مش عالية كفاية, او تكوني ضربتي الخليط زيادة عن اللزوم, او ضيفتي كمية زيادة من البيكنج بودر او الدقيق.
– لو طلعت بره الصينية, يبقى ممكن تكون الحرارة مش عالية كفاية, الصينية مش كبيرة كفاية, او تكوني ضيفتي كمية زيادة من البيكنج بودر او السكر.
– لو ناشفة يبقى ممكن يكون السبب ان الحرارة كانت عالية اوي, او مضفتيش زبدة او سكر كفاية, او حطيتي دقيق زيادة.
– لو طلعت كبسة, ده معناه ياما الحرارة كانت واطية اوي, او سيبتيها كتير في الصينية بعد ما طلعتيها من الفرن.
– لو طلعت مش كلها لون واحد او فيها لون فاتح, ياما الحرارة كانت واطية اوي, او كان في صينية تانية قريبة منها اثناء الخبز.
– لو الحروف بني او غامقة, ممكن تكون الفرن مليانة اوي يعني حاطة اكتر من حاجة مع بعض, او حروف الكيك لامسة صينية تانية او جوانب الفرن نفسها.
– متنفختش كفاية, ممكن يكون السبب الحرارة كانت عالية اوي, او مش حاطة بيكنج بودر كفاية, او ضربتي المكونات مع بعض زيادة عن اللزوم, او الصينية كبيرة اوي.
27- لو معنديش صينية مافن او كب كيك ممكن تستخدمي غطيان البرطمانات حطي العجينة في القوالب الورق الخاصة بالكب كيك وتحطيها على غطا البرطمان.
28- لو مش متوفر عندك القوالب الورق الخاصة بالكب كيك ممكن تستخدمي بدالها ورق الزبدة او ورق الخبز.
29- اكتبي على الكيك او التورتة بطريقة سهلة جدا, خرمي سطح التورتة بخلة سنان بالكلمة اللي عايزة تكتبيها يعني اكتبيها الاول بالنقط دي وبعدين امشي على النقط بكيس الحلويات, هتلاقي الكلمة طلعت معاكي مظبوطة جدا.
30- عشان تمنعي ان اي حاجة تخرج بره الطبق وتبهدل المكان حواليكي وانتي بتضربي المكونات بتاعتك بالمضرب, حطي في المضرب طبق كارتون هيبقى زي غطا هيمنع اي حاجة تخرج بره.
31- بدل ما تقطعي التورتة بالطريقة العادية والباقي بتاعها ينشف لما تسيبيه, ممكن تقطعيها من النص بالطول, وترجعي النصين جنب بعض تاني عشان تحافظي عليها طرية زي ما هي.
32- عشان توزعي عجينة المافن او الكب كيك في القوالب بتاعتها من غير ما تعملي فوضى حواليكي او العجينة تنقط بره القالب, هاتي سبراي ضد الالتصاق ومغرفة الايس كريم ورشي المغرفة بالاسبراي وخدي من العجينة وحطيها في القالب.
33- ممكن تعملي سكر ملون لتزيين الحلويات بطريقة سهلة بنفسك في البيت, ممكن تشوفوا الطريقة بالتفصيل في الفيديو.
34- اربطي شريط قماش مبلول حوالين الصينية من بره هتخلي الكيكة طبقات وخفيفة وتطلع مظبوطة معاكي.
35- لو معندكيش كيس حلويات ممكن تستخدمي بدالة كيس زيبلوك وتفتحي فتحة صغيرة فيه وتبدأي تزيني الكيك بتاعك بالطريقة العادية.
36- لو الوصفة مطلوب في مكوناتها زبدة ناعمة مش سايحة ممكن تخليها ناعمة بطريقة بسيطة جدا, هاتي كوباية ازاز فاضية وامليها مية دافية وسيبيها شوية لحد ما الكوباية تدفى من المية, اتخلصي من المية وبعدين حطي الزبدة في طبق واقلبي عليها الكوباية وسيبيها شوية لحد ما تطرى.
الطريقة بالفيديو:
37- عشان تظهري نكهة وملمس الشوكولاتة والزبدة في الكوكيز قبل ما تدخليها الفرن رشي عليها رشة بسيطة جدا على الوش ملح بحر خشن.
38- عشان متعمليش فوضى حواليكي ولا تتعذبي وانتي بتحطي كريمة التزيين في الكيس, استخدمي الحيلة البسيطة دي حطي الكيس جوه كوباية وحطي الكريمة بالمعلقة في الكيس ولما تخلصي طلعيه من الكوباية واستخدميه.
39- اعملي كيكة بطريقة بسيطة وسهلة جدا بالكوكاكولا:
سخني الفرن على 350 درجة, هاتي علبة كيك شوكولاتة جاهز من العادي اللي بيتباع في السوبر ماركت وضيفي عليه ازازة كوكاكولا, اخلطيهم مع بعض كويس لحد ما يبقى الخليط ناعم مافيهوش اي كتل, هاتي صينية حطي فيها ورق زبدة وصبي الخليط فيها, حطيها في الفرن لمدة 35 دقيقة تقريبا او لحد ما تستوي لما تدخلي فيها السكينة وتطلع نضيفة من غير عجين, بعدها طلعيها وسيبيها تبرد الاول وبعدين قطعيها.
40- اعملي كيكة بالايس كريمة بطريقة سهلة:
سخني الفرن على 350 درجة, هاتي كوباية ونص كبيرة ايس كريم وسيبيه يسيح شوية في درجة حرارة الغرفة لمدة من 10 – 15 دقيقة, في طبق او بولة كبيرة اخلطي الايس كريم مع 3 كوبايات دقيق, هاتي القالب اللي هتصبي فيه الخليط ادهنيه زبدة ورشي فيه شوكولاتة فارمسيه ملونة وبعدين صبي عليها الخليط ودخليها الفرن لمدة 35 دقيقة تقريبا او لحد ماتستوي, وبعدين طلعيها واقلبيها على طبق وسيبيها تبرد وبعدين قطعيها.
41- لو عايزة تحفظي عجينة الكوكيز عشان تعمليها في اي وقت تاني, هاتي قوالب التلج وحطي فيها بالمعلقة عجينة الكوكيز واحفظيها في الفريزر لاي وقت حابة تستخدميها طلعيها من القالب وحطيها في الصينية واخبزيها في الفرن على طول.
42- لو عايزة الكوكيز تطلع كلها بحجم واحد وشكلها مظبوط بدل ما تحطيها في الصينية ممكن تحطيها في قوالب المافن او الكب كيك.
43- ممكن تعلمي كوكيز على شكل قالب بطريقة بسيطة جدا, هاتي عجينة الكوكيز وحطيها على قوالب الكبك كيك بالمقلوب وحطيها في الفرن هتطلع معاكي بالشكل ده.
11 حيلة مدهشة للطبخ ميعرفهمش غير المحترفين
