دليلك الكامل لـ تحديد ميزانية فرحك فى 7 خطوات بس

بقلمآية حسان فيمنوعات visibility775

تحديد ميزانية فرحك ممكن يكون تحدى كبير محتاج تخطيط وترتيب مش سهل خصوصا لو كنتى انتى وعريسك  ليكوا آراء ووجهات نظر مختلفة عن هتعملوا الفرح ازاى وفين و ازاى تصرفوا على الفرح. وبغض النظر عن حجم الفرح سواء كان على الضيق او فرح كبير مهم جدا تبقى قادرة على تحديد ميزانية فرحك و انك تلتزمى بيها خصوصا انه تفاصيل الافراح كتيرة، المكان، الورد، الأكل ، الفوتوجرافر، المزيكا وغيرها كتير. طيب، ازاى تقدرى تحددى ميزانية فرحك صح علشان ماتصرفيش فلوس على الفاضى، ده اللى هنعرفه سوا فى المقال ده. 

دليلك الكامل لـ تحديد ميزانية فرحك فى 7 خطوات بس ..

1- حددى مصدر الفلوس :

لازم تعرفى مصدر الفلوس ايه هو! يعنى عريسك هيتكفل بكل تكاليف الفرح ولا انتى هتساعديه النص بالنص، ولا اهله هيساعدوه فى التكاليف؟ اول خطوة قبل ما تحطى خطة لميزانية فرحك هى انك تعرفى مصدر الفلوس بالتحديد و تعرفى الفلوس قد ايه بالضبط علشان تتصرفى و تخططى على قد الفلوس المتاحة معاكى. وماتحطيش خطط تفوق امكانياتك وتبقى معتمده انه اهلك او اهله اكيد هيساعدوكوا، علشان فى معظم الحالات ده مش هيحصل ولو فى اى حد هيساهم معاكم فى الفرح يبقى لازم تبقى متأكده منه ومش كلام وخلاص.

2- حطى لنفسك goal معين توصليله وحد أقصى للزيادة : 

تانى خطوة معانا فى دليلك الكامل لـ تحديد ميزانية فرحك هى انك تحطى لنفسك goal او limit معين توصليله ، وبمجرد ما تجمعى الفلوس كلها” يعنى المبلغ النهائى لتكاليف الفرح” حطى المبلغ ده على انه الـ Limit او الحد الاقصى ليكى فى المصاريف، وحطى فى بالك انه مش معنى انك معاكى مبلغ معين انك تصرفيه كله ، حددى الـ goal بتاعك فى المصاريف انه يبقى تحت الحد الاقصى اللى حددتيه للميزانية ، يعنى مثلا لو الـ maximum معاكى فى المصاريف 25000 ، حاولى يبقى الـ goal بتاعك من 17000 لـ 20000 و المبلغ الزيادة اللى هيتوفر ممكن تسافروا تقضوا شهر العسل بيه مثلا. 

3- حددى اولوياتك : 

حددى اولوياتك وشوفى اكتر حاجة كان نفسكم تبقى موجودة فى الفرح انتى و عريسك وحاولى توفريها ضمن الامكانيات المتاحة، مهم اننا نقتصد لكن فى نفس الوقت ماينفعش تحرمى نفسك من حاجة كان نفسك فيها فى يوم مهم زى ده ، التوفير اللى بنقصده يبقى فى الحاجات اللى ممكن تستغنى عنها بسهولة و مش مهمة اوى بالنسبة لك ، ووفرى الفلوس للحاجات الاهم. 

4- دورى على الاسعار الاقل : 

بمجرد ما توصلوا للقرار النهائى للمبلغ اللى هتصرفوه على الفرح يبقى ده الوقت اللى لازم تبدأى فىه تدورى على الخيارات المتاحة و الاسعار الاقل فى الحاجات اللى انتى عايزاها، وده بيعتمد على المكان اللى هتعملى فيه الفرح، و تفاصيل الفرح بشكل عام علشان كده مهم تدورى على الاسعار المناسبة علشان تتجنبى انك ترهقى الميزانية بتاعتك بأسعار غالية على الفاضى ممكن يبقى ليها بدايل اقل. 

5- اعملى ميزانية تقريبية : 

بعد ما تخلصى بحث وتكونى عرفتى الاسعار و الاماكن الانسب ليك ابدأى امسكى ورقة وقلم واعملى ميزانية تقريبيه حسب الحاجات اللى انتى حددتيها تبقى موجودة فى فرحك خلاص. يعنى ايجار مكان الفرح، الورد، الاكل، الموسيقى و اى تفاصيل تانية و ابدأى شوفى انتى محتاجة كام تقريبا ومعاكى كام. 

6- توفير الفلوس اهم من لفت الانظار :

حتى لو حطيتى خطة فى حاجات ممكن تظهر فجأة و تغير شوية من الخطة اللى انتى حطاها ، ومش بالضرورة الحاجات دى تزود عليكى مصاريف، بالعكس فى حاجات بتحصل  ممكن نعتبرها  shortcuts توفر عليكى من غير ما تقلل من الشكل اللى انتى عايزة الفرح يطلع بيه، وهنا لازم نرجع لأهمية خطوة انك تحددى اولوياتك علشان تستغنى عن الحاجات اللى مش مهمة حتى لو الناس هتعارضك فى ده، افتكرى دايما انه توفير الفلوس اهم من البهرجة و التباهى. 

7- خلى الميزانية النهائية مرنة : 

آخر خطوة معانا فى دليلك الكامل لـ تحديد ميزانية فرحك هى انك تدى لنفسك شوية مساحة وتخلى الميزانية بتاعتك مرنة، بمعنى انه بعد ما تحددى مصاريفك، و الحاجات اللى لازم تبقى موجودة و الحاجات اللى  هتستغنى عنها راجعى الميزانية بتاعتك مرة تانية و حددى المبلغ المطلوب لكل حاجة بالضبط وحاولى تخليكى فى range قريب من اللى انتى محدداه لكن فى نفس الوقت اعملى حسابك على هامش معين من الفلوس ممكن تحتاجيه فى الطوارئ. 

اعرفى معانا كمان ايه هى تحضيرات استقبال العريس لأول مرة؟!