12 علامة تقولك انك بتاكلي سكر كتير

ريهام محمود

في

10275

معظم الناس فاكرين ان مرضى السكر هما بس اللي بيعانوا من ارتفاع مستويات السكر في الدم, لكن ده مش صحيح لان اي شخص ممكن يعاني من ارتفاع مستويات السكر من غير ما يلاحظ الضرر اللي ممكن يحصل للاعصاب والاوعية الدموية واعضاء الجسم بسبب ارتفاع نسبة السكر, عشان كده النهاردة من خلال مقالنا هنقولك على علامات تقولك انك بتاكلي سكر كتير وتنبهك ان نسبة السكر عندك عالية ولازم تقللي من اكل السكريات.

علامات تقولك انك بتاكلي سكر كتير:

1- الجوع المستمر:

ارتفاع نسبة السكر في الدم بيمنع الجلوكوز انه يدخل للخلايا ونتيجة لده الجسم مش بتوصله الطاقة اللي لزماه وبالتالي ده هيخليكي تحسي بجوع مستمر وجسمك هيطلب الاكل طول اليوم من غير توقف.

2- زيادة التعب:

لو نسبة السكر في الدم عالية الجسم هيكون مش قادر انه يخزن ويمتص الجلوكوز بشكل صحيح والطاقة بتستخدم بشكل غير فعال, وخلايا الجسم مش بيوصلها الطاقة اللي لزماها, كل ده هيأدي في النهاية لشعور بالتعب والارهاق من غير سبب وهتحسي انك مش قادرة تمارسي نشاطاتك اليومية.

3- كثرة التبول:

لو نسبة السكر في الدم عالية في الحالة دي الكلى مش هتقدر تستوعب السوائل عشان كده الجسم عشان يحاول يحقق التوازن في تركيز الجلوكوز في الدم والخلايا, بيدوب الدم مع السائل داخل الخلايا وده بيرجع تركيز الجلوكوز لوضعه الطبيعي وبالتالي ده بيأدي لكثرة التبول.

4- جفاف الفم, والعطش الشديد:

جفاف الفم والعطش الشديد يعتبروا رد فعل على فقدان السوائل الشديد, وفي الحالة دي بتوصل اشارات للمخ ان الجسم محتاج مية, بس الافضل لو هتشربي حاجة اختاري المية او شاي ومشروبات من غير سكر.

5- خسارة الوزن:

مع ارتفاع مستوى الجلوكوز ممكن تفقدي الوزن في فترة قصيرة حتى لو بتاكلي وجبات كتير في اليوم وفيها سعرات حرارية عالية وده بيرجع لاكتر من سبب:

– فقدان السوائل بسبب كثرة التبول اللي احنا قولنا عليه انه واحد من علامات زيادة السكر بيأدي لانخفاض مستوى السوائل فس الجسم كله وبالتالي ده بيأدي لفقدان الوزن.

– لو الانسولين في الجسم مش كافي لاستقبال الجلوكوز, الجسم في الحالة دي بيتحول لحرق الدهون.

– كمية كبيرة من البول مع ارتفاع مستوى الجلوكوز في الجسم ده بيخلي الجسم يفقد كتير من السعرات الحرارية عشان يحاول تفريغ او التخلص من الجلوكوز الزيادة.

6- الامراض المعدية:

التهاب المسالك البولية, والتهابات الاعضاء التناسلية من يعتبروا من علامات ارتفاع السكر في الدم, لان وجود كمية كبيرة من السكر ده بيخلق بيئة لنمو البكتيريا والالتهابات.

7- الجلد الجاف:

جفاف الجلد ممكن يكون مرتبط بارتفاع مستويات السكر غي الدم لاكتر من سبب:

– لان كثرة التبول بتجفف الجسم من السوائل وبالتالي ده بيأدي لجفاف الجلد.

– مشاكل جلد الساق تعتبر علامة على تصلب وتضييق الشرايين وده بيأدي لانخفاض في الدورة الدموية وده المرض اللي غالبا بيحصل لما تكون مستويات السكر في الدم عالية.

– ارتفاع السكر في الدم ممكن يأدي لتلف الاعصاب اللي بدورها ممكن تأدي لتعطيل عمل الغدة الدرقية, وده هيأثر على توازن الجلد والمية.

8- صعوبة التركيز:

ارتفاع مستويات السكر في الدم بتمنع الجلوكوز من دخول خلايا المخ وبالتالي المخ بتقابله صعوبة في انه يوصله الطاقة اللي لازماه عشان يشتغل بشكل صحيح, وبالتالي ده بيأثر بشكل سلبي على التركيز وسرعة التفكير واخد القرارات.

9- عدم وضوح الرؤية:

عدم وضوح الرؤية ده بيحصل نتيجة الجفاف اللي بيحصل بسبب ارتفاع مستوى السكر في الدم, وبيأثر على خلايا العين ونتيجة لده العين بتفقد قدرتها على التركيز بشكل صحيح وبتبقى الرؤية مش واضحة.

10- بطء شفاء الجروح:

بيكون في بطء في شفاء الجروح وده بيحصل بسبب ضرر الاوعية الدموية الناتج عن ارتفاع السكر في الدم, وده بيخل بدورة الدم في الجسم وخاصة في الاطراف والانسجة مش بيوصلها التغذية الكافية وبالتالي الجروح مش بتخف بشكل سريع.

11- الضعف الجنسي:

ممكن يحصل صعوبة في الانتصاب بسبب ارتفاع مستوى السكر في الدم, لان الانتصاب الصحي محتاج اعصاب سليمة, وتدفق الدم بشكل سليم, وتوازن سليم للهرمونات, وزيادة السكر في الدم ممكن تأثر بشكل سلبي على كل الانظمة دي.

12- المزاج السيء:

الدراسات اثبتت ان الاشخاص اللي بيعانوا من ارتفاع السكر بيكونوا اكتر قلق, وتعكر للمزاج, وبيميلوا للاكتئاب, لان المخ بيعتمد على امدادات او نسب متساوية من الجلوكوز ولما يحصل ارتفاع فيه ده هيأثر بشكل سلبي على عمل المخ بشكل صحيح ونتيجة لده هيخلي المزاج سيء.

كمان السكر بيأثر على امتصاص باقي المغذيات المسئولة عن المزاج, ومنها معدن الكروم والمعدن ده وجوده ضروري جدا عشان يحافظ مستوى السكر مستقر في الدم لان الانسولين اللي بينضف الجلوكوز من الدم مش هيشتغل بشكل صحيح لو المغذيات دي موصلتش للمخ وبالتالي ده هيأدي للمزاج السيء.

كده بعد ما عرفنا كل العلامات بعد كده لو ظهر اي علامة منهم ده ينبهنا على طول ان نسبة السكر مرتفعة في الدم وناخد بالنا قبل ما تسبب لنا اي اضرار في الجسم.