25 علامة لو بيعملها معاكي تبقى اعتراف بحبه ليكي
غالبا افضل علاقات الحب اللي بتستمر للنهاية بتكون هي اللي خارجة من الاساس من علاقة صداقة يعني الحب مجاش بين يوم وليلة او من مجرد نظرة لكن انتي بتكوني مع الشخص ده كصديقة وكل يوم بتكتشفي فيه حاجة تخلي مشاعر الصداقة جواكي تتحول لمشاعر حب, وفجاة تلاقي نفسك بتحبي الشخص اللي مكنتيش تتخيلي انه يبقى حبيب ليكي في يوم من الايام وكنتي معتبراه مجرد صديق بس.
وغالبا او في معظم الحالات دايما البنت هي اللي بتعبر عن مشاعرها الاول او بتبينها, لكن الراجل غالبا بتكون الصورة مبهمة شوية ومش بتقدري تحددي اذا كان بيحبك ولا لا, لان معظم الرجالة تقريبا بيكون عندهم صعوبة في التعبير عن مشاعر الحب على الاقل بالكلام او انه يقولك كلمة بحبك, عشان كده النهاردة هنقولك على علامات لو عملها تبقى اعتراف بحبه ليكي يعني هتخليكي تستنتجي منها او هتسهل عليكي انك تفهمي تصرفاته اكتر.
علامات لو عملها تبقى اعتراف بحبه ليكي:
1- من اول العلامات اللي ممكن تبينك حبه ليكي انه بيبان عليه الاهتمام بيكي في اي مكان, يعني لو قعدين في مكان مع مجموعة او ناس كتير هو هيكون مركز معاكي ومهتم بيكي انتي عن اي حد تاني موجود.
2- بيكبت او بيمنع اي تصرف او اي رد فعل مزعج حتى في ابسط الحاجات, يعني بيخاف على مشاعرك دايما وبيحب انه قدامك ميعملش تصرف يضايقك او يزعجك باي شكل.
3- بيفتكر على طول الايام او التواريخ المهمة بالنسبة لك, زي عيد ميلادك او اي تاريخ يعتبر مهم بالنسبة لك.
4- مش بيتردد ابدا انه يخليكي رقم واحد في حياتة او من اول اولوياتة حتى لو ده معناه انه ميعملش حاجة بيحبها او متعود يعملها عشانك.
5- بيدافع عنك لو اي شخص اتكلم عليكي بطريقة سيئة او مش كويسة قدامه او حاول يأذيكي باي طريقة يمكن تخيلها.
6- دايما بيحب يقضي معظم الوقت معاكي وبيحب كل لحظة تكونوا فيها مع بعض, وهتلاقيه ممكن يلغي حاجات او مواعيد تخصه هو عشان يبقى معاكي باي طريقة.
7- بيتكلم دايما وبيحكي لك كل حاجة عن حياتة من اول حياتة الشخصية واصحابة لحد شغله, يعني مش بيخبي عليكي حاجة وكل تفاصيل حياتة تقريبا بيقولهالك.
8- ميقدرش يبعد عنك لفترة طويلة, ولو حصل بينكم اي خلاف هتلاقية بيبذل مجهود وبيعمل كل حاجة عشان يعتذرلك او يصالحك.
9- هيحاول دايما انه يكون في محيطك ويتعرف على اهلك واصحابك, وهيهتم جدا انه يعرف منهم حاجات اكتر عنك عشان يقرب منك اكتر.
10- هيضحي بسعادتة وراحته واي حاجة لو ده هيخليكي احسن او هيسعدك ويبسطك.
11- هيتصل بيكي او هيبعت لك رسالة قبل ما يروح ينام عشان تكوني انتي اخر شخص بيكلمه قبل ما ينام.
12- دايما محترم بغض النظر عن الوضع او الموقف, يعني وهو معاكي مش بيلتفت مثلا لبنت تانية, مش بيقاطعك وانتي بتتكلمي وبيحترم ارائك.
13- دايما بيعرفك كل حاجة بتحصل في حياتة اول بأول حتى لو حاجة او موضوع بسيط.
14- مش بيخاف او يتردد انه يعتذر لو غلط في حقك او اذى مشاعرك باي شكل.
15- هتلاقيه دايما موجود لو طلبتي منه اي مساعدة من اصغر حاجة ممكن تطلبيها منها لاكبر حاجة ممكن تحتاج منه مجهود عشان يعملها.
16- هيبقى عايز يعرف كل حاجة عن حياتك من اول مراحل طفولتك لحد شغلك, يعني هيبقى عايز يعرف كل تفاصيل حياتك حتى الحاجات البسيطة او الصغيرة.
17- بيحاول يحميكي ويطمن عليكي دايما بكل الطرق, يعني مثلا لو انتي بره البيت هتلاقيه بيتصل بيكي كذا مره عشان يطمن عليكي او يطمن انك وصلتي البيت بأمان, وانتوا مع بعض هيبقى خايف عليكي طول الطريق او وانتوا بتعدوا الشارع يعني هيبقى خايف عليكي على طول وعايزك تبقي في امان دايما.
18- هيقول دايما كلمة “احنا” بدل كلمة “انا” في كل كلامة لو بتتاقشوا في حاجة تخصكوا انتوا الاتنين, لانه عايز تبقي انتي موجودة في اكتر الحاجات الممكنة معاه.
19- هيقف جنبك او قريب منك لو لقى رجالة تانيين في نفس المكان اللي انتي موجودة فيه, وده تعبير منه للي حواليكم ان انتي تخصيه او حد يهمه ويعرفوا انهم المفروض يكونوا بعيد عنك.
20- بيحترم ارائك حتى لو اختلفت تماما عن ارائه, ولو في اي قرار يخصكم انتوا الاتنين لازم يعرف رايك الاول يعني مش بياخد قرار لوحده لازم يكون قرار مشترك بينكم.
21- بيمسك ايدك في الاماكن العامة او وهو ماشي معاكي في اي مكان, وده نوع من التعبير منه انه بيحميكي وبيطمنك.
22- دايما عنده احلام كبيرة عن المستقبل والاحلام دي انتي دايما موجودة من ضمنها, يعني تخطيطه لمستقبله دايما انتي موجودة فيه.
23- بيلبي احتياجاتك بسرعة من اصغر حاجة لاكبر حاجة, وبيفهم انتي عايزة ايه او محتاجة ايه بالظبط وبيكون جنبك دايما في كل الاوقات.
24- مجامل ومهذب ولطيف في كل حاجة بيعملها معاكي وفي كل تصرفاته في كل الاوقات والظروف, يعني باختصار “جنتلمان”.
25- بيفتكر كل محادثاتك وكل كلامك اللي قولتيه حتى اللي اتقال من فترة طويلة بيفضل فاكر كل حاجة وكل التفاصيل.
10 حاجات لازم تكون موجودة في شريك حياتك المناسب
