5 اسباب ليه الماغنسيوم مفيد فى المساعدة على النوم و كمان وصفات

بقلمآية حسان فيصحة visibility1302

  5 اسباب ليه الماغنسيوم مفيد فى المساعدة على النوم و تلاقيه فين 

لو كنتى بتعانى من صعوبة فى النوم او من الارق، يبقى انتى اكيد دورتى على طرق كتير تحاولى بيها تتغلبى على المشكلة ، وعرفتى وجربتى وصفات كتير. لكن وصفة مهمة وحاجة مفيدة جدا فى المساعدة على النوم اغلبنا مايعرفهاش هى الماغنسيوم، علشان كده هتتعرفى معانا فى المقال ده على 5 اسباب ليه الماغنسيوم مفيد فى المساعدة على النوم ومصادره المختلفة وازاى تستفيدى منه، يلا خلينا نبدأ على طول.

 5 اسباب ليه الماغنسيوم مفيد فى المساعدة على النوم و تلاقيه فين 

  الاول خلينا نعرف ايه هو الماغنسيوم؟

الماغنسيوم مكون بيدخل فى اكتر من 300 مركب مختلفين فى جسمنا ، كل عضو من أعضاء الجسم بيحتاج للماغنسيوم خصوصا القلب  و الكليتين و العضلات وحتى الاسنان و العظام. ورغم أهميته الا انه للأسف حوالى من 54% لـ 75% من سكان الارض عندهم نقص فى الماغنسيوم!

ليه الماغنسيوم مفيد فى المساعدة على النوم وازاى؟

السهر لفترات طويلة والنوم بالنهار  و شرب كميات كبيرة من الكافيين والقلق و التوتر بتعتبر اهم الاسباب اللى بتأدى الى قلة النوم ، الماغنسيوم بيساعد على التغلب على الأرق بأنه بيخليكى تسترخى تماما و كمان بيساعد على مكافحة الاكتئاب ، اللى هو سبب تانى من أسباب الارق وقلة النوم.

خلينا نعرف مع بعض ليه الماغنسيوم مفيد للنوم بتفاصيل اكتر :

  • 1- النوم :

وقتنا طول النهار بيبقى مشغول جدا ومليان حركة وتوتر ، علشان كده النوم بيعتبر اساسي و مهم جدا . و الماغنسيوم بيعتبر طريقة مثالية تساعدك تنامى شوية ، طبعا ده مش معناه انه اول ما تاخدى حاجة فيها ماغنسيوم هتنامى فورا، لكن بنقصد انه هيساعدك تهدى و تسترخى وبالتالى تقدرى تنامى.

  • 2-استرخاء العضلات :

كتير مابتعرفيش تنامى بسبب وجع عضلاتك من لف وتعب طول النهار! او لانه رقبتك متنشنة و مش قادرة تحركيها ومش مرتاحة فى اى وضع تنامى فيه،يبقى انتى محتاجة مكمل غنى بالماغنسيوم علشان يساعدك فى تهدئة و استرخاء عضلاتك.

  • 3-صحة القلب:

الماغنسيوم مفيد كمان فى مقاومة امراض القلب التاجية، و الدراسات قالت انه تناول اغذية غنية بمركبات الماغنسيوم بتقلل من احتمال الاصابة بالسكتات القلبية ، ونقص الماغنسيوم من اهم مسببات اضطرابات دقات القلب.

  • 4-صحة العظام :

الماغنسيوم له دور مهم فى تكوين العظام وكمان بيأثر بشكل كبير لما العظام تتكسر او تلتأم تانى علشان كده المكملات الغذائية الغنية بالكالسيوم والماغنسيوم مهمة جدا علشان نحسن من كثافة العظام وقوتها، مش بس كده نقص الماغنسيوم بيأثر على امتصاص العظام للكالسيوم وده ممكن يسبب هشاشة العظام ، مهم جدا انك تبقى حريصة على وجود نسبة صحية من الماغنسيوم فى نظامك الغذائى.

  • 5- مقاومة الاصابة بالسكر :

الماغنسيوم بيساعد كمان فى التمثيل الغذائي للكربوهيدرات ،و بيتحكم بنسبة ما فى افراز الانسولين و مستويات الجلوكوز فى الدم، علشان كده النسب المعتدلة من الماغنسيوم بتساعد فى مقاومة الاصابة بمرض السكر. وكل 100 ملليجرام من الماغنسيوم فى اليوم بتقلل من احتمالية الاصابة بمرض السكر بنسبة 15% .

ايه هى الاغذية الغنية بالماغنسيوم؟

  • نخالة الارز :

100 جرام من نخالة الارز بتحتوى على حوالى 781 جرام من الماغنسيوم و ده تقريبا ضعف الكمية اللى بيحتاجها جسمك كمكمل غذائى.

  • الاعشاب المجففة :

الاعشاب المجففة زى الكزبرة والريحان مش بس بتمد جسمك بالالياف و المعادن و المركبات الغذائية الدقيقة، لكن كمان معلقة واحدة من الاعشاب دى على الاكل بتمد جسمك بحوالى 690 ميلليجرام من الماغنسيوم. حاولى تضيفيهم اكتر لاطباقك كل يوم.

  • الشوكولاتة الغامقة :

استخدام كمان نعرف بيه ليه الماغنسيوم مفيد للنوم هو انه موجود بكثرة فى الشوكولاتة الغامقة dark chocolate  ، مكعب واحد من الشوكولاتة الغامقة فيه حوالى 24% من احتياج الجسم اليومى من الماغنسيوم لكل 145 كالورى، وبيساعد على تحسين صحة الجسم ككل.

  • النباتات الورقية الغامقة :

النباتات الورقية اللى لونها اخضر غامق زى السبانخ والسلق غنية جدا بالفيتامينات و المعادن والمركبات الغذائية المفيدة للصحة ، و كمان خالية تماما من الجلوتين ، فلو كنتى من اللى عندهم حساسية من الجلوتين يبقى الخضروات دى مثالية بالنسبة لك، وهتمد جسمك بكمية كافية جدا من الماغنسيوم اللى هتحتاجيه علشان تحسنى من نومك.

  • الفاصوليا والعدس :

الفاصوليا والعدس والبقوليات عموما زى الشوفان و القمح والحبوب الكاملة بتعتبر مصدر ممتاز للماغنسيوم.

  • الافوكادو :

واحد من المصادر الغنية جدا بالماغنسيوم و المتوفرة بشكل كبير هو الاوفوكادو وكمان ماليان فيتامينات مختلفة ، ضيفى شريحة واحدة من الافوكادو لغداكى كل يوم مع السلطة مثلا وهيوفرلك حوالى 15% من الكمية اللى بيحتاجها جسمك من الماغنسيوم كل يوم.

  • منتجات الالبان :

بنوصى بمنتجات الالبان لو عايزة تحصلى على كمية اكبر من الماغنسيوم،  علبة الزبادى فيها حوالى 19 ملليجرام ماغنسيوم و ده بيسهل انك تضيفيه لاكلك بنسبة كبيرة لانه الزبادى بيدخل فى اكلات كتير و متوفر بسهولة.

الآثار الجانبية للماغنسيوم:

لو خدتى الماغنسيوم فى شكل حبوب او اقراص مكملة ” مش من مصادر طبيعية” ده ممكن ييسبب بعض الاثار الجانبية هنقولك عليها دلوقتى، علشان كده بننصحك تحاولى تحصلى عليه من المصادر الطبيعية اللى قولنا عليها و لو ضرورى تاخديه فى صورة ادوية يبقى لازم تحت اشراف دكتور. طيب ايه هى الاثار الجانبية للماغنسيوم ؟

– الغثيان و القئ.
العرق الزايد.
انخفاض ضربات القلب.
احمرار البشرة.

حاجات خدى بالك منها قبل ما تبدأى تاخدى الماغنيسوم :

  • لو هتخدى الماغنسيوم فى صورة مكملات او اقراص يبقى لازم دكتور هو اللى يحددلك الكمية المناسبة اللى لازم تاخديها علشان تتجنبى انه يعملك اى مشاكل او يسبب اثار جانبية. الرجاله بشكل عام بيحتاجوا حوالى 300 ميلليجرام يوميا من الماغنسيوم، لكن الستات بيحتاجوا حوالى 270 ميلليجرام بس . وماينفعش فى اى حال انك تتخطى 400 ملليجرام فى اليوم والا ممكن يسبب الاسهال.

  • المكملات الغنية بالماغنسيوم ممكن تتداخل مع غيرها من الادوية لو كنتى ماشية على علاج معين.