اطعمة محتاجاهم هتساعدك على تسريع نمو الشعر بشكل صحي

ريهام محمود

في

39921

الشعر الطويل هو هدف وحلم كل بنت انها توصله, لكن عشان نوصل لده منعتمدش بس على وصفات تطويل الشعر واستخدام الشامبو ومنتجات الشعر المختلفة في حاجة تانية مهمة جدا مؤثرة على نمو وتطويل الشعر وهي التغذية ليها دور كبير وفعال جدا في مساعدة الشعر انه ينمو ويطول بشكل اسرع, والنهاردة هنقول لكل بنات حوا اطعمة لتسريع نمو الشعر, ومش بس هتسرع نموه كمان هتساعد انه يبقى صحي اكتر.

اطعمة لتسريع نمو الشعر:

1- سمك السلمون:

السلمون غني جدا بالاحماض الدهنية الاوميجا 3 اللي بتساعد على تقوية بصيلات الشعر وتحفيز نمو الشعر, والتجارب العلمية اثبتت ان استهلاك المنتجات اللي بتحتوي على عنصر الاوميجا 3 بتقصر مرحلة التيلوجين ” فترة الراحة من بصيلات الشعر” لمدة نص سنة, كمان السلمون بيحتوي على فيتامين. B12 والحديد اللي بتساعد جدا على زيادة نمو الشعر بشكل اسرع.

وفي اكلات تانية غنية بالاوميجا 3 ممكن ندخلها في نظامنا الغذائي بشكل يومي زي الزيوت النباتية, زيت الزيتون, المكسرات, التونة, الفاصوليا, بذور الكتان.

2- المحار:

المحار غني جدا بعنصر الزنك اللي بيساعد الشعر جدا انه ينمو بشكل اسرع وبيديه لمعه, والمحار بيعوض حاجة الجسم للزنك اللي محتاجة يوميا, وكمان من الاكلات اللي فيها نفس فايدة المحار اللحم البقري, الكبدة, الرده, اللحوم الحمرا قليلة الدهون, المكسرات, السردين, فول الصويا, المشمش, الافوكادو, الموز, الكيوي, الخوخ, الفراولة, الزبيب.

3- الفراخ:

الفراخ غنية بالبروتين الحيواني واحنا محتاجين لها لانتاج الكيراتين اللي بيتكون منه الشعر بنسبة 80%, ونقص البروتين من الحاجات اللي بتوقف نمو الشعر وتخليه ميطولش وكمان ممكن تسبب تساقطه, كمان لحم الديك الرومي والارانب من الاطعمة الغنية بالبروتين الحيواني.

4- البيض:

البيض بيحتوي تقريبا على العناصر اللازمة لنمو الشعر والحفاظ عليه صحي زي البروتين والبيوتين, عنصر البيوتين بيساعد على وقف تساقط الشعر, والبيض بيحتوي كمان على الليوسين المسئول عن انقسام الخلايا بالاضافة انه غني بالاحماض الامينية اللي محتاجها الشعر لتسريع نموه.

5- اللوز:

اللوز بيحتوي على فيتامين E اللي بيساعد على تنشيط نم والشعر وتقويته, وحوالي 30 جرام من اللوز “من 15 – 20 حبة لوز” بتحتوي تقريبا على 70% من احتياج الجسم اليومي من فيتامين E, ده غير انه بيحتوي على البيوتين والاحماض الدهنية وفيتامينات B المفيدة جدا للشعر.

6- بذور القرع:

بذور القرع بتحتوي على فيتامينات B4, B1, B2, B3, المسئولة عن نمو الشعر والحفاظ على فروة الشعر صحية, لو بتعاني من تساقط الشعر يبقى اكيد انتي محتاجة تدخلي بذور القرع في نظامك الغذائي لانه الدراسات اثبتت انه فعال جدا في علاج مشكلة تساقط الشعر.

وممكن ندخل بذور القرع في نظامنا الغذائي بطريقة بسيطة جدا حمصيها في طاسة من غير زيت وضيفيها لسلطة الخضار او سلطة الفاكهة, وممكن تضيفي البذور لاطباق الخضار المطبوخ العادي, او لاطباق الشوربة.

ممكن تعملي مشروب بذور القرع بطريقة بسيطة اخلطي كوباية مية مع معلقة كبيرة بذور قرع مجفف واغليهم مع بعض لمدة من 5 – 10 دقايق وبعدين صفيه واشربيه.

7- العدس:

العدس من الاكلات الغنية بالحديد وده واحد من اهم العناصر لنمو شعر صحي, وتقريبا ½ طبق من شوربة العدس بيمد الجسم بنص حاجة الجسم لعنصر الحديد اللي بيحتاجه بشكل يومي, كمان العدس بيحتوي على الزنك والكولين اللي بيحافظوا على ان الدم يوصل لفروة الراس بشكل طبيعي وبالتالي ده بيأدي لتسريع نمو الشعر بشكل صحي.