14 غلطة بتعمليهم لما تيجي تحطي الهايلايتر

ريهام محمود

في

7822

الهايلايتر واحدة من خطوات المكياج اللي بتدي لوك حلو جدا وبتظهر ملامح الوش اكتر, وزي ما قولنا قبل كده ان الهايلايتر بيتحط في اماكن معينة بس على الوش عشان يسلط الضوء عليها اكتر ويظهرها, لكن عشان اللوك يطلع حلو يبقى لازم اننا نعرف نحط الهايلايتر بشكل صح وبسيط ومش مبالغ فيه, عشان كده النهاردة هنقول لكل بنات اكتر اخطاء بتقعي فيها مع الهايلايتر عشان تتجنبيها.

اخطاء بتقعي فيها مع الهايلايتر:

1- وضع هايلايتر كتير زيادة عن اللزوم:

من اول الغلطات اللي ممك تكوني بتقعي فيها انك تحطي هايلايتر بكمية كبيرة زيادة عن اللزوم وتفكري ان اللوك هيطلع احلى او هيظهر الملامح اكتر لكن بالعكس الوش هيطلع فيه لمعة زيادة عن اللزوم ومش حلو, عشان كده حاولي انك تحطيه بكمية مناسبة.

2- طبقات اكتر من اللازم:

حتى لو بتحطي على المنطقة المناسبة على الوش ممكن تقعي في غلطة تانية انك تحطي طبقات كتير من الهايلايتر في منطقة واحدة من الوش وتركزي عليها زيادة عن اللزوم, عشان كده بدل التركيز على منطقة واحدة وزعي الهايلايتر على كل المناطق اللي عايزة تظهريها في الوش.

3- استخدام درجة غلط:

الهايلايتر عموما يعتبر شفاف ودرجاته اكيد افتح من كريم الاساس, لكن برغم كده اختيار الدرجة الغلط ممكن تكون من الغلطات اللي ممكن تقعي فيها لان بردو كل درجة بشرة ليها درجة هايلايتر تناسبها اكتر, كقاعدة عامة لو انتي بشرتك سمرا يبقى اختاري درجات الهايلايتر اللي على دهبي وبرونزي, وللبشرة الفاتحة اختاري درجة الهايلايتر العاجي.

4- بتركزي على الاماكن الغلط:

من الغلطات انك ممكن تحطي الهايلايتر في اماكن غلط على الوش, افضل اماكن لتطبيق الهايلايتر هي عضم الخد, قوس كيوبيد, الزاوية الداخلية للعيون, طرف الانف, وممكن تشوفوا توزيع الهايلايتر لو هتستخدميه مع الكونتور زي ما هو باين في الصورة اللي قدامنا.

5- بتحطيه على الوش كله:

الهايلايتر عشان بيدي لوك حلو للوش ممكن ده يغريكي انك تحطيه على الوش كله ودي الغلطة اللي ممكن تقعي فيها وهيديكي نتيجة عكسية وهيبين الوش كلنه عرقان ده غير انه مش هيسلط الضوء على الملامح اللي عايزة تظهريها.

6- مش بتدمجيه كويس:

الهايلايتر لازم تدمجيه كويس على الوش لانه لو مندمجش هيبقى عبارة عن خطوط منفصلة بتلمع على الوش, عشان كده لازم يندمج كويس على البشرة ويطلع بشكل سلس وناعم مع باقي المكياج مش مكون منفصل.

7- مش بتستخدمي الاداة المناسبة:

عشان الدمج انتي محتاجة تستخدمي الاداة المناسبة, للهايلايتر الكريمي ببساطة ادمجية على البشرة بصوابعك, ومع الهايلايتر البودر استخدمي الفرشة ال Fan Brush زي اللي مستخدماها في الصورة بالظبط.

8- بتطبقيه على الخدين والانف بس:

الخدين والانف هي اكتر المناطق المشهورة اللي بيتحط فيها الهايلايتر لكن مش هي الاماكن الوحيدة اللي ممكن يتطبق عليها الهايلايتر, ممكن تحطي على قوس كيوبيد “المكان اللي في منتصف الشفة العليا”, وعضم الحاجبين, والدقن.

9- اختيار نوع هايلايتر غلط:

الهايلايتر في منه نوعين الكريمي والبودر, والاتنين ممتازين جدا لاستخدامهم لكن بس بيعتمد امتى هتستخدميهم, لو بشرتك دهنية او عايشة في منطقة دافية الافضل تستخدمي الهايلايتر الكريمي لانه مات اكتر وبيتفاعل بشكل افضل مع الرطوبة, واستخدمي الهايلايتر البودر لو عايزة لوك دراماتيكي اكتر ويقعد معاكي فترة اطول.

10- بتحطيه مع كريم اساس غلط:

من الغلطات اللي ممكن تقعي فيها انك تحطيه مع نوع كريم اساس غلط, ومن هنا بنقولك متحطيش ابدا هايلايتر كريمي مع كريم اساس بودر, لان ده ممكن يخلي كريم الاساس بتاعك يشقق ويعمل خطوط وقشور, عشان كده كقاعدة عامة اختاري نوع الهايلايتر نفس نوع كريم الاساس.

11- بتحطيه في ترتيب غلط:

اكيد ترتيب المكياج مهم جدا عشان يطلع مظبوط على الوش, لو انتي بتستخدمي هايلايتر بودر ممكن تحطيه قبل كريم الاساس عشان تدي لوك ناعم, لكن لو بتستخدمي هايلايتر كريمي يبقى حطيه بعد كريم الاساس يعني بيتوقف على نوع الهايلايتر اللي انتي بتستخدميه.

12- مش بتفكري في اضاءة المكان:

اضاءة المكان اللي انتي هتكوني فيه كمان من الحاجات اللي ممكن تخليكي تشوفي هتحطي الهايلايتر ازاي, لو رايحة مكان الاضاءة بتاعته عالية اوي وقوية او تحت اضاءة طبيعية بالنهار يعني يبقى ابعدي عن الهايلايتر اللي بيلمع اوي وجربي حاجة مات اكتر, وعلى العكس لو رايحة مكان اضاءتة خافتة او خفيفة يبقى في الحالة دي استخدمي الهايلايتر ال Glittery او اللامع.

13- بتحطي بلاشر بيلمع اوي مع هايلايتر لامع اوي:

لو حاطه بلاشر بيلمع اوي او برونزر مع هايلايتر لامع هتلاقي صعوبة انك تطبيقهم على البشرة صح او بشكل دقيق ومش هيطلع مظبوط على الوش, عشان كده الافضل انك تختاري نوع مات اكتر منهم هما الاتنين.

14- التركيز الزيادة على الحاجات التريندي:

طبعا زي ما قولنا ان الاماكن التريندي او اتجاهات الهايلايتر هي على عضمة الخدين والانف وعضمة الحاجبين لكن مش كل اتجاهات المكياج بتناسب الجميع يعني ممكن مش كل الاماكن دي ينفع يتحط عليها الهايلايتر للكل, مثلا ممكن يكون في بنات الهايلايتر بيخلي وشهم دهني اكتر او بيبين المسام اوسع لو اتحط في منطقة معينة يبقى اكيد نتجنب نحط هايلايتر فيها يعني متسلطيش الضوء على مكان ممكن يبين عيب او ديفوه في الوش لان الهايلايتر الهدف منه يظهر ملامح الوش بشكل احلى, عشان كده الافضل انك تجربي وتشوفي افضل الاماكن في الوش اللي بتطلع حلوة وهي دي اللي تركزي عليها الهايلايتر.