8 حاجات افتكريهم لو حسيتي انك مكسورة من جوه

ريهام محمود

في

11834

اكيد كلنا بتمر علينا في الحياة من وقت للتاني ضغوطات زيادة او ظروف بتدفعنا للحظات بنحس فيها باليأس او اننا مكسورين من جوه لكن ده مش معناه انك تستسلمي لمشاعر الاحباط واليأس انتي بس محتاجة انك تعرفي تتعاملي مع المشاعر دي عشان تقدري انك تتخلصي منها, وتعرفي ان اي ظروف بتمري بيها هي تعتبر دروس في الحياة تتعلمي منها عشان تبقي اقوى لمواجهة الحياة, والنهاردة هنساعد كل بنات حوا في التخلص من المشاعر السلبية والاحباط وهنقولك ازاي تتخلصي من شعور اليأس والكسر وتحوليه لشعور ايجابي يخليكي شخص اقوى واحسن.

ازاي تتخلصي من شعور اليأس والكسر:

1- افتكري ان الحاجة المكسورة بتسمح لدخول الضوء:

افتكري دايما ان الحاجة المكسورة بتسمح ان الضوء يدخلها, يعني لو متعرضيش للكسر من وقت للتاني مش هتسمحي للضوء يدخل لروحك من الاساس, لان الشعور ده هو اللي بيخلينا نكتسب خبرات في الحياة ونعيد حساباتنا في حاجات كتير حوالينا, تجارب الحياة هي اللي بتعلمنا وتخلينا نتكيف ونتأقلم اكتر مع الحياة ونبقى اقوى على مواجهة اي مصاعب ممكن تقابلنا.

2- اقبلي وخليكي فخورة بمشاعرك, متحاربيهاش:

متبقيش قاسية على نفسك او تحسي باحساس محبط عشان عندك مشاعر سلبية او تقيلة عليكي صعب انك تتحمليها لكن بالعكس انتي لو معملتيش كده هتسقط منك صفة الانسانية او انك تبقي انسانة طبيعية, ساعات بنمر بمواقف او ظروف بتتطلب مننا رد فعل قوي اننا نعيط او نصرخ او حتى ننهار ده طبيعي جدا ومتحاوليش انك تمنعي المشاعر دي انها تخرج لان كبت المشاعر ممكن في النهاية يأدي لنتايج عكسية, عشان كده متخفيش مشاعرك ابدا وتخافي من ردود فعل اللي حواليكي, لان محاربة المشاعر هي بس مجرد انك بتأخري مرحلة الانهيار مش اكتر, والمشكلة هتزيد وكل المشاعر السلبية اللي جواكي هتبقى حمل اتقل عليكي, عشان كده خليكي شجاعة واجهي مشاعرك بقوة وخرجيها من غير خوف عشان تقدري تفكري كويس وتخرجي من الشعور ده وترمي كل المشاعر السلبية بعيد عنك.

3- افتكري دايما او حطي في بالك “ليه”:

خلال الظروف الصعبة اللي ممكن تمر بينا ممكن ننسى اللي احنا عايزينه فعلا من الحياة او اولوياتنا ايه, لما توصلي لمرحلة الكسر او اليأس بسهولة جدا هتنسي اولوياتك و “ليه” انتي موجوة في الحياة وايه هدفك منها, لكن بالعكس الاوقات الصعبة بتدي عمق واهمية اكتر لهدفنا في الحياة, عشان كده خلي دايما كلمة “ليه” في الاعتبار, وفكري في المواقف السلبية اللي بتمري بيها وبصي لها بمنظور ايجابي, وفكري في هدفك وسبب وجودك في الحياة.

4- افتكري كل اللي حواليكي ومتركزيش كل تفكيرك على حالة اليأس او الكسر:

مش عشان انتي حاسة بحالة يأس يبقى لازم الدنيا كلها تشاركك شعورك او وجهة نظرك يعني مش لازم الكوكب كله يبقى محبط عشان انتي محبطة او مريتي بيوم سيء او تجربة صعبة, حاولي توسعي رؤيتك ووجهة نظرك للحياة وفكري في الحاجات الايجابية اللي عندك فكري انك لسه بتتنفسي هوا نقي, بتشوفي السما والشمس والسحاب والطبيعة حواليكي, بتحسي بالهوا, كلها اشياء يمكن تشوفي انها صغيرة وبسيطة لكن لسه بتعمليها وبتحسي بيها كل يوم حتى لو كنتي مكسورة ومحبطة, افتكري كل الحاجات الكويسة اللي ممكن تكون بتحصل على الكوكب برغم الحالة اللي انتي عايشاها, وساعتها مش هتشوفي الدنيا ضلمة او سودا في عينك.

5- افتكري اصدقائك وعيلتك الموجودين لدعمك:

كل ما تحسي باليأس او الاحباط افتكري دايما ان في حياتك اصحابك وعيلتك اللي موجودين دايما عشانك لو احتاجتيهم وبيدعموكي في اي وقت, متترديش ابدا انك تلجأي لهم او تطلبي منهم المساعدة لان مافيش حد في الدنيا مش محتاج مساعدة اللي حوالية كلنا بيجي علينا وقت بنحتاج لبعض, ولو مترددة انك تطلبي مساعدتهم وبتحسي انك ممكن تكوني عبء عليهم افتكري ساعتها انك كنتي جنبهم وقت ما هما احتاجوا ليكي لان اللي انتي هتهتمي بيهم وهتدعميهم اكيد هما كمان هيكونوا مرحبين جدا انهم يهتموا ويدعموكي في وقت ما تحتاجي لهم.

6- ركزي على الحاجات اللي بتفرحك:

في اغلب الوقت لما بنكون في حالة يأس او مكسورين بيبقى كل تركيزنا على حالة اليأس دي وبننسى الحاجات اللي ممكن تفرحنا, زي مثلا الخروج في مكان مفتوح وطبيعة حلوة تغير مودنا, او الخروج مع اصحابنا, او ممارسة هواية بنحبها يعني اي حاجة بتفرحك حتى لو كانت بسيطة, مش معنى انك حاسه بيأس او مكسورة يعني تقضي كل دقيقة في حياتك تفكري في المشاعر السلبية بس وتدخلي في يأس متخرجيش منه.

7- متخليش مشاعرك تسيطر عليكي:

خليكي عارفة انك مش بتملكي مشاعرك او تفكيرك لان المشاعر ممكن تروح وتيجي في اي وقت من غير سيطرة مننا عليها او من غير استئذان, عشان كده افتكري دايما ان المشاعر دي مؤقتة وهتاخد وقتها وتروح فمتخليهاش تسيطر عليكي.

8- افتكري ان الحياة سلسلة احداث ما بين فوق وتحت:

بالظبط زي المشاعر ما بتكون مؤقتة الحياة كمان مؤقتة وقصيرة واحنا دايما بننسى حقيقة ان الدنيا في النهاية مش هنقعد فيها للابد, فاتمتعي بيها للنهاية حتى في فترات المصاعب واليأس, لانك لما تبصي للظروف الصعبة اللي مريتي بيها او حالة الكسر اللي انتي كنتي فيها بعد ما تمر هتشكري الظروف دي لانك هتعرفي انها علمتك دروس في الحياة وغيرتك للاحسن وخليتك انسانة اقوى.