7 زيوت هتغير مظهرك في 7 ايام بس !

بقلمريهام محمود فيشعر visibility21773

كلنا بنبقى عايزين نغير مظهرنا بأسرع واسهل الطرق خصوصا لو انتي عايزة تستعدي لسفر او تطلعي اجازة وعايزة حلول سريعة, عشان كده النهاردة جايبين لكل بنات حوا 7 زيوت هتغير مظهرك في 7 ايام بس.

7 زيوت هتغير مظهرك في 7 ايام:

1- زيت السمسم لاسنان بيضا وصحية:

زيت السمسم غني جدا بالاحماض الامينية والفيتامينات والعناصر المفيدة جدا لصحة الاسنان, هيساعد على تبيضها, وتحسين وتجديد اللثة مع الوقت, وتحسين صحة تجويف الفم واللسان.

الحاجات اللي هتحتاجيها:

1 معلقة كبيرة زيت سمسم.

½ معلقة صغيرة كربوناتو.

¼ كوباية مية دافية.

الطريقة:

مضمي الفم بالزيت لمدة من 15 – 20 دقيقة, وبعدين اتخلصي منه, ولو لقيتي الاسنان محتاجة تبييض اكتر زودي مدة المضمضة.

اخلطي الكربوناتو مع المية الدافية ومضمضي بيها الفم كويس, وبعدين اغسلي الفم والاسنان واللسان بالمية العادية.

7 زيوت هتغير مظهرك في 7 ايام
7 زيوت هتغير مظهرك في 7 ايام

2- زيت الكركدية لنمو الشعر:

الكركدية يعتبر من افضل الحاجات اللي ممكن تستخدم لعلاج الشعر الخفيف, لانه غني بفيتامين C اللي بيساعد على زيادة الكولاجين في الشعر, والاحماض الامينية اللي موجودة فيه بتعزز وبتقوي الجذور وبالتالي ده بيساعد على نمو الشعر مرة تانية بشكل صحي والمساعدة على تكثيفة.

الحاجات اللي هتحتاجيها:

3 نقط زيت كركدية.

100 مل شامبو “اي نوع بتستخدميه”.

الطريقة:

اخلطي زيت الكركدية مع الشامبو وطبقي الخليط على شعر مبلول ودلكيه من الجذور للاطراف, سيبيه من 2 – 3 دقايق وبعدها اغسليه بمية دافية والبلسم, كرري الوصفة كل ما تحتاجي.

ملحوظة: ممكن الخليط يغير لون الشعر شوية بسبب الكركدية.

7 زيوت هتغير مظهرك في 7 ايام
7 زيوت هتغير مظهرك في 7 ايام

3- زيت الخروع لتكثيف الحواجب والرموش:

زيت الخروع بيحسن عملية التمثيل الغذائي للخلايا, والاحماض الدهنية واللينوليك اللي موجود فيه بيمنع الرطوبة من التبخر وده بدوره بيحمي الشعر الصغير من التساقط والجفاف واثار الحرارة والشمس.

الحاجات اللي هتحتاجيها:

من 3 – 5 مل زيت خروع.

انبوبة ماسكارا فاضية.

الطريقة:

هاتي انبوبة الماسكارا واغسليها هي الفرشة كويس جدا بمية سخنة عشان تتخلصي من اي بقايا ماسكارا فيها.

املي الانبوية بزيت الخروع وخزنيها في مكان يكون دافي لكن مش سخن.

كل يوم قبل النوم حطي على الرموش والحواجب بالفرشة من الزيت.

مع الانتظام يوميا هتلاحظي النتايج من اول اسبوع, وخلال اسبوعين هتلاقي الرموش اطول بكتير والحواجب اكتر كثافة.

7 زيوت هتغير مظهرك في 7 ايام
7 زيوت هتغير مظهرك في 7 ايام

4- زيت بذور الكتان ديتوكس للتخلص من سموم الجسم:

زيت بذور الكتان يعتبر من الحلول السحرية الطبيعية اللي بتستخدم من زمان, لانه غني بالاحماض الدهنية والفيتامينات والبوتاسيوم, بيساعد على ازالة السموم من الجسم, بيعيد تشغيل عملية التمثيل الغذائي بعد 7 ايام من الاستخدام المنتظم, عشان تحققي افضل النتايج دخليه في نظامك الغذائي اليومي.

الطريقة:

خدي كل يوم الصبح معلقة صغيرة من زيت بذور الكتان ممكن تشربي بعدها شوية مية سقعة لو احتاجتي تغيري الطعم, بعديني كلي وجبة الفطار بعدها بنص ساعة.

كرريها تاني خدي معلقة صغيرة قبل العشا من 30 – 40 دقيقة.

ممكن بعد اول اسبوع تزودي الكمية وتاخدي معلقة كبيرة بنفس النظام.

7 زيوت هتغير مظهرك في 7 ايام
7 زيوت هتغير مظهرك في 7 ايام

5- زيت شجرة الشاي لعلاج حب الشباب:

زيت شجرة الشاي بيحتوي على مضادات الالتهابات والجراثيم والفطريات ومضادات الفيروسات, وعلى خصائص التئام الجروح, عشان كده يعتبر من العلاجات الفعالة جدا لحب الشباب والسيطرة على الزيوت الزيادة في البشرة, وعلاج مشاكل الجلد.

الحاجات اللي هتحتاجيها:

2 معلقة صغيرة شوفان مطحون.

2 معلقة صغيرة طين.

2 معلقة صغيرة زبادي.

نقطتين زيت شجرة الشاي.

الطريقة:

اخلطي الشوفان المطحون مع الطين مع الزبادي لحد ما تتكون عندك عجينة سميكة, ضيفي الزيت للخليط وقلبيهم مع بعض كويس.

حطي الخليط على البشرة وسيبيه من 15 – 20 دقيقة, وبعدين اغسليه بمية باردة.

7 زيوت هتغير مظهرك في 7 ايام
7 زيوت هتغير مظهرك في 7 ايام

6- زيت الزيتون لتنعيم القدمين:

زيت الزيتون من الزيوت الممتازة جدا اللي بتساعد على تحسين حالة الجلد والشعر والضوافر.

الحاجات اللي هتحتاجيها:

200 مل زيت زيتون.

5 نقط عصير ليمون.

كحول طبي.

الطريقة:

سخني الزيت شوية وضيفي له عصير الليمون, انقعي رجلك في الخليط لمدة من 10 – 15 دقيقة, وبعدين امسحيها بالكحول ورطبيها بكريم مرطب.

وممكن تلبسي شراب قطن بعد نقع الرجل عشان توصلي لنتايج افضل.

7 زيوت هتغير مظهرك في 7 ايام
7 زيوت هتغير مظهرك في 7 ايام

7- زيت اللوز الحلو للضوافر والجلد اللي حوالين الضوافر:

زيت اللوز الحلو من الانواع اللي المفروض تستخدم بشكل يومي لحماية وتجديد خلايا الجلد, كمان ليه تأثير مضاد للفطريات وبالتالي هيساعد على منع فطريات الاظافر.

الحاجات اللي هتحتاجيها:

250 مل مية دافية.

1 معلقة كبيرة زيت لوز حلو.

الطريقة:

ضيفي الزيت للمية وانقعي ايدك في الخليط لمدة 10 دقايق, وبعدين نشفيها ورطبيها باي كريم مرطب بتستخدميه.

كرري الوصفة كل يوم, وعشان نتايج افضل ممكن تدلكي ايدك يوميا بعد الوصفة بدل الكريم بخليط من 50 مل زيت لوز حلو مع 30 نقطة زيت لافندر و 15 نقطة عصير ليمون, اعملي مساج للايد والضوافر بالخليط.

7 زيوت هتغير مظهرك في 7 ايام
7 زيوت هتغير مظهرك في 7 ايام

لافضل النتايج في كل الوصفات انتظمي على استخدامها بشكل يومي لمدة متقلش عن اسبوع, وبصرف النظر عن الوصفات اللي احنا قولناها ممكن تضيفي الزيوت اللي استخدمناها للبشرة للكريم المرطب اللي بتستخدميه بشكل يومي, واللي استخدمناها للشعر ممكن تضيفيها للبلسم او لاي نوع من انواع سيروم الشعر.

وصفات من الزيوت العطرية مفيدة لصحتك وجمالك

وصفات من الزيوت العطرية مفيدة لصحتك و جمالك .. اعرفيها
وصفات من الزيوت العطرية مفيدة لصحتك و جمالك .. اعرفيها