8 دروس حياتية اتعلمناهم من الاب كانوا سبب فى تكوين شخصياتنا دلوقتى
لو اتكلمنا عن دور الاب فى حياتنا عمرنا ما هنعرف نوفيه حقه ، لانه هو الى بيدعمنا و يوجهنا ويحتوينا و بيرشدنا فى كل حاجة فى حياتنا،و بيأثروا بشكل كبير فى تكوين شخصياتنا .. وعلشان نفكرك قد ايه وجوده نعمة و مهم ، فى المقال ده هنفولك على 8 دروس حياتية اتعلمناهم من الاب كانوا سبب فى تكوين شخصياتنا دلوقتى
8 دروس حياتية اتعلمناهم من الاب كانوا سبب فى تكوين شخصياتنا دلوقتى ..
1- الاستقلال معناه المسؤولية :
الاستقلال المالى مهم ، لكن فتح حساب باسمك فى البنك او انك تشترى عربية باسمك خاصة بيكى معناه انه مسؤولياتك زادت و لازم تاخدى بالك من تصرفاتك ، الاب دايما بيعلمنا انه مع الاستقلال بتيجى المسؤولية.
2- قبل ما تنتقدى غيرك انتقدى نفسك الاول :
لازم البنت تبقى متواضعة و بسيطة فى تعاملاتها مهما كانت ناجحة او جميلة او غنية، ولازم لما تيجى تنتقدى حد يبقى نقدك بناء بهدف النصيحة مش الاهانة، علشان كده اتعلمنا انه لازم تبقى متواضعة وقبل ما تنتقدى الناس تبصى لنفسك فى المراية وتنتقدى نفسك الاول.
3- حاربى علشان اللى بتحبيهم ودافعى عنهم :
عيلتك واصحابك اهم حاجة فى حياتك، اتعلمنا من الاب انه لازم دايما ندافع عنهم و نحارب علشانهم.
4- قبل ما تكونى بتتكلمى كويس لازم تكونى مستمعة كويسة :
درس تانى من دروس حياتية اتعلمناهم من الاب هو انه مهم صحيح تكونى لبقة وبتعرفى تتكلمى ، لكن كمان لازم تكونى مستمعة كويسة و تدى لغيرك الفرصة انه يتكلم ، اهالينا دايما بيقولولنا انه ربنا خلقنا بودنين وبق واحد، وده علشان نسمع اكتر ما نتكلم .
5- أتعلمى تسامحى :
ماتشيليش من الناس ولا تكرهيهم علشان ده هيصعب عليكى الدنيا ويخلى قلبك ماليان كره وحقد، اتعلمى دايما تسامحى.
6- أعرفى انه اجتهادك فى شغلك مهم :
ماتستسهليش او تكروتى فى شغلك ، اعرفى انه اجتهادك فى شغلك وتعبك دلوقتى هينعكس على مستقبلك ويخليكى ترتاحى قدام .
7- لازم لما تقعى تقومى تانى وتكملى :
عادى اننا ننجرح و ننهزم ونقع ، بس لازم تعرفى تقوى نفسك وتقومى وتبدأى من جديد.. لازم تبقى قوية.
8- اكتبى كل حاجة :
طبيعى اننا ننسى ومانفتكرش كل حاجة ، علشان كده اتعلمنا انه نكتب دايما ، الحاجة اللى بتكتبيها بايدك عمرك ما هتنسيها.