طريقة جديدة وسهلة لعمل الارز بالفراخ One Pot Chicken Rice
كلنا بيجي علينا وقت بنبقى زهقانين من الاكل وعايزين نجرب حاجات جديدة وتكون سهلة في نفس الوقت, والنهاردة جايبين لكل بنات حوا وصفة الارز بالفراخ بطريقة جديدة ومختلفة والميزة فيها انها بتتعمل كلها مع بعض في حاجة واحدة وطعم الفراخ والبهاريز بتاعتها كلها هتنزل مع الارز هتديه طعم مختلف واحلى من الارز العادي اللي احنا متعودين عليه.
وصفة الارز بالفراخ:
– استخدمي في الوصفة اوراك الفراخ هتطلع احلى.
– لو عايزة الاكلة تكون سبايسي او حراقة استخدمي فلفل حار او زودي مقدار الشطة في المكونات, ولو عايزاها تكون عادية ضيفي لها فلفل اخضر عادي.
– مدة تحضير الاكلة 10 دقايق, وقت الطهي 45 دقيقة, يعني كلها بالتحضير والطهي بتاخد 55 دقيقة.
– الوصفة تكفي 4 افراد.
المقادير:
– تتبيلة الفراخ:
– 1 معلقة صغيرة ملح.
– 1 معلقة صغيرة بودرة ثوم.
– 1 ½ معلقة صغيرة بابريكا.
– ½ معلقة صغيرة فلفل.
– ½ معلقة صغيرة بودرة بصل.
– ½ معلقة صغيرة شطة.
– ½ معلقة صغيرة اوريجانو.
– 1 معلقة صغيرة عصير ليمون.
– معلقة كبيرة زيت زيتون او كمية كافية لحد ما يبقى الخليط عندك متجانس.
– باقي المقادير:
– 2 معلقة كبيرة زيت زيتون.
– باكيت هوت دوج او سجق مقطع حلقات “الكمية حسب رغبتك”.
– 4 اوراك فراخ.
– بصلة متوسطة الحجم مقطعة مكعبات.
– ثمرة فلفل حار مقطع مكعبات.
– 2 سيقان كرفس مقطعة مكعبات.
– ¼ معلقة صغيرة شطة.
– 1 كوب ارز حبة طويلة “ارز بسمتي”.
– 2 ¼ كوب شوربة فراخ او مرقة دجاج.
– طرنشات بصل اخضر وبقدونس مفروم للتزيين.
– طريقة التحضير:
1- اول حاجة اخلطي كل مكونات تتبيلة الفراخ مع بعض في طبق كبير وقلبيهم كويس مع بعض وتبلي اوراك الفراخ بيهم وغطيهم كويس بالتتبيلة.
2- سخني الفرن على درجة حرارة 350 درجة اثناء ما انتي بتحضري باقي المكونات.
3- ضيفي رذاذ من زيت الزيتون في حلة او طاسة غويطة ممكن تتحط في الفرن وحطيها على نار متوسطة وضيفي لها السجق او الهوت دوج وحمريه لحد ما لونه يتغير ويبقى بني, وبعدين طلعيه في طبق.
4- ضيفي اوراك الفراخ في الحلة مكان السجق وحمريهم من 2 – 3 دقايق لكل جنب لحد ما لونهم يبقى دهبي.
5- طلعي الفراخ مع السجق في الطبق, امسحي الحلة اللي حمرتي فيها بمنديل المطبخ عشان تتخلصي من اي حاجة نزلت من السجق او الفراخ عشان متتحرقش في الحلة.
6- قللي النار خليها منخفضة وضيفي في نفس الحلة البصل المقطع والفلفل الحار والكرفس وقلبيهم مع بعض لمدة من 2 – 3 دقايق لحد ما يدبلوا.
7- ضيفي الشطة والملح والفلفل وقلبيهم مع باقي المكونات كويس.
8- ضيفي الارز والشوربة قلبيهم, سيبيهم على نار منخفضة لمدة دقيقة.
9- ضيفي اوراك الفراخ والسجق اللي احنا حمرناهم على الارز من فوق, سيبيهم ياخدوا غلوة على النار مع بعض وبعدين غطي الحلة.
10- حطيها في الفرن لمدة 35 دقيقة وهي متغطية في درجة حرارة 350.
11- شيلي الغطا وسيبيها في الفرن من 10 – 15 دقيقة كمان, لحد ما الارز يتشرب كل السائل اللي فيه.
وكده يبقى الطبق جاهز عندنا زينيه بالبصل المقطع والبقدونس.