6 اكلات لو اكلتيهم قبل النوم هتخليكي متعرفيش تنامي!

بقلمريهام محمود فيصحة visibility4148

معظمنا اكيد عارف ان شرب القهوة قبل النوم من الحاجات اللي بتسبب الارق وممكن متخليناش ننام طول الليل, لكن اللي في كتير ميعرفهوش ان في اكلات صحية لكن بتسبب الارق وممكن تخليكي متعرفيش تنامي لو اكلتيها قبل ما تنامي على طول, وفي دراسات كتير اثبتت ان الحرمان من النوم او الارق ممكن يأدي لارتفاع مؤشر كتلة الجسم وبيخلي عندك رغبة شديدة في الاكل الغير صحي اللي بتكون سعراته الحرارية عالية عشان تعوضي بيه الاجهاد الزايد الناتج عن قلة النوم, وعشان تحافظي على وزنك وصحتك بشكل عام لازم تاخدي كفايتك من النوم يوميا ما بين 7 – 8 ساعات, والنهاردة من خلال موضوعنا هنقولكم ايه الاكلات اللي ممكن تسبب ارق عشان نتجنب اكلها قبل النوم.

الاكلات اللي ممكن تسبب ارق:

1- الخضروات الخضرا الورقية:

الخضروات الورقية اللي زي الكرنب, القرنبيط, الخس, البروكلي ممكن تسبب لك الارق الخضروات دي كلها هي غنية جدا بالمعادن المهمة والمواد الكيميائية النباتية المفيدة للصحة جدا, لكن كمان بتحتوي على التربتوفان وده نوع من الاحماض الامينية اللي بتساعد على انتاج السيروتونين اللي هيخليكي متعرفيش تنامي, ده غير ان الخضروات دي تعتبر من اصعب انواع الخضروات في الهضم لانها بتحتوي على كمية عالية جدا من الالياف الغير قابلة للذوبان والنوع ده بياخد وقت طويل جدا على ما يتهضم وبالتالي لما تاكليها قبل النوم على طول جسمك هيضطر يشتغل عشان يهضم الاكل بدل ما يستعد للنوم وده معناه انه هياخد من ساعات نومك.

الاكلات اللي ممكن تسبب ارق
الاكلات اللي ممكن تسبب ارق

2- الشوكولاتة الغامقة:

الشوكولاتة الغامقة غنية جدا بالمواد المضادة للاكسدة والمعادن اللي بتساعد على التقليل من خطر الاصابة بأمراض القلب, وتقليل ضغط الدم وكمان بتحمي الجلد من الشمس ومن التجاعيد, لكن لو اكلتيها قبل النوم على طول هتخليكي صاحية طول الليل لانها بتحتوي على نسبة كافيين زي اللي موجودة تقريبا في كوباية القهوة, وكل ما كانت الشوكولاتة اغمق كل ما زاد فيها نسبة الكافيين, كمان بتحتوي على التيروزين وده حمض اميني بيحفز الجسم وبيخليه ينام بشكل اصعب.

الاكلات اللي ممكن تسبب ارق
الاكلات اللي ممكن تسبب ارق

3- اللحوم المشبعة والجبنة القديمة:

اللحوم المملحة او المقددة او المدخنة وانواع الجبن القديمة من انواع الاكلات اللي ممكن تسبب لنا ارق لانها بتحتوي على التيرامين وده حمض اميني بيفرز مادة منبهه في الجسم وبالتالي ده هيخليكي متعرفيش تنامي.

الاكلات اللي ممكن تسبب ارق
الاكلات اللي ممكن تسبب ارق

4- صلصة الطماطم:

صلصة الطماطم من الحاجات اللي بنستخدمها في كتير من الاطباق اللي بناكلها بشكل يومي تقريبا والطماطم غنية بالفيتامينات والمعادن ومضادات الاكسدة المهمة جدا في الحماية من امراض القلب والسرطان, لكن كمان هي من انواع الخضروات الحمضية جدا اللي ممكن تسبب حرقة المعدة وعسر الهضم لو اكلتيها في وقت متأخر قبل النوم, عشان كده حاولي انك تاكليها قبل ما تنامي بكذا ساعة عشان لما تيجي تنامي تكون اتهضمت ومتسببش اي حرقة.

الاكلات اللي ممكن تسبب ارق
الاكلات اللي ممكن تسبب ارق

5- اللحوم الحمرا:

الدراسات اثبتت ان الاكلات الغنية بالدهون زي اللحوم الحمرا بتاخد وقت اطول في الهضم من الالياف والاكلات الغنية بالكربوهيدرات لان الاكلات الغنية بالدهون بترسل اشارات للمعدة انها تهضم بشكل ابطأ, واللحوم تقريبا بتاخد 24 ساعة عشان تخرج من الجهاز الهضمي بسبب ارتفاع الدهون فيها, عشان كده الافضل انك تتجنبي اكلها قبل النوم, لكن ممكن تاكلي فراخ او اسماك بدل اللحوم الحمرا بالليل لانها اسهل في الهضم, لكن لازم نحط في الاعتبار ان النظام الغذائي اللي بيحتوي على نسبة بروتين عالية ممكن يسبب مشاكل التنفس اثناء النوم عشان كده قللي من كمية البروتين قبل النوم على طول, واتأكدي انك بتاكلي كمية كافية من الالياف عشان تحافظي على النظام الغذائي بتاعك صحي ومتوازن.

الاكلات اللي ممكن تسبب ارق
الاكلات اللي ممكن تسبب ارق

6- الاكل الحار:

الاكلات الحارة او الحراقة ممكن تسبب حرقة في المعدة وعسر الهضم وده بالتالي هيخلي صعب جدا انك تنامي مرتاحة, كمان الاكلات الحراقة بتعزز عملية التمثيل الغذائي  وبترفع درجة حرارة الجسم وده بدوره هيخليكي حاسه بعدم راحة ومش هتعرفي تنامي, فلو انتي من محبات الاكل الحراق الافضل انك تتجنبي اكله قبل النوم على طول الافضل تاكليه قبل ما تنامي بكذا ساعة عشان تديه فرصة يتهضم بشكل سليم.

الاكلات اللي ممكن تسبب ارق
الاكلات اللي ممكن تسبب ارق

تكتيك مذهل وفعال للتخلص من الارق هيخليكي تنامي في دقيقة واحدة بس!

طريقة للتخلص من الارق
طريقة للتخلص من الارق