ازاي تداري عيوب البشرة بالمكياج بطريقة صح
اكيد كلنا بنعاني كتير من عيوب البشرة سواء بقع او حبوب او غيرها حتى البشرة اللي معندهاش مشاكل دايما بيجي عليها وقت ممكن تظهر لها عيوب والمشكلة بتكون اننا مش بنعرف نداريها ازاي واحنا خارجين على ما نعالج بشرتنا, وده اللي هنقوله النهاردة في موضوعنا لكل بنات حوا هنعرف مع بعض ازاي تداري عيوب البشرة بالمكياج بطريقة صح وتعملي لها تغطية عالية والمعروف في عالم المكياج باسم مكياج ال Camouflage او Corrective Makeup.
ازاي تداري عيوب البشرة بالمكياج:
مكياج تصحيح البشرة فايدته انه بيداري اي عيوب سواء حبوب او بقع او ندبات او غيرها من العيوب اللي ممكن تكوني بتعاني منها بشرتك.
ازاي تختاري مكياج تصحيح البشرة:
عشان نضمن تغطية مناسبة وعالية لعيوب البشرة لازم نختار المكياج بطريقة صح.
1- اول حاجة اتأكدي انه المنتج اللي بتشتريه سواء كريم اساس او كونسيلر بيعمل تغطية كاملة.
2- اتأكدي ان الدرجة تكون مناسبة للون بشرتك.
3- اتأكدي انه يكون المكياج من النوع المات او المطفي من غير لمعة.
4- اتأكدي انه يكون ووتر بروف Water Proof او ضد المية.
5- اتأكدي ان المنتج هيبوالرجينيك Hypoallergenic ولا لا وده النوع اللي بيعمل تغطية كاملة للبشرة وهتلاقي مكتوب على العبوة.
ازاي تعملي مكياج تصحيح البشرة:
1- اول خطوة نضفي بشرتك كويس بالغسول المناسب.
2- تاني خطوة بعد التنضيف استخدمي مرطب خفيف وغير دهني.
3- الخطوة التالتة هي تحديد لون البشرة بالظبط عشان تعرفي ايه اللون المناسب اللي ممكن تستخدميه عشان تداري عيوب البشرة, وهنا هنستخدم عجلة الوان المكياج اللي هتقولك اللون المناسب لكل مشكلة على البشرة.
– لو في لون ازرق على البشرة سواء تحت العين او تصبغات يبقى في الحالة دي تستخدمي كونسيلر مرجاني.
– لو اللون على البشرة بنفسجي استخدمي كونسيلر مرجاني.
– لو اللون على البشرة اخضر يبقى استخدمي كونسيلر احمر.
– لو اللون على البشرة احمر استخدمي كونسيلر اخضر.
– لو اللون على البشرة ازرق ارجواني هتبقي محتاجة كونسيلر برتقاني.
4- لما تيجي تطبقي الفونديشن على البشرة هتبقي محتاجة انك تركزي على دمج الفونديشن مع لون الكونسيلر اللي انتي حطتيه كويس على البشرة, ولازم يكون كريم الاساس مناسب للون بشرتك.
استخدمي نوع كريم الاساس العازل المضغوط اللي بيكون بودر وكريم اساس مع بعض لمشاكل البشرة الشديدة, وكريم الاساس السائل استخدميه لمشاكل البشرة الخفيفة للمتوسطة, واستخدمي صوابعك عشان تحطيه على البشرة وبعدين بسفنجة رطبة ادمجيه على البشرة.
شوفي من هنا انواع كريم الاساس المناسبة لكل بشرة وازاي تحطيه صح.
5- اخر خطوة حطي بودرة شفافة TL4 عشان تثبتي كريم الاساس وتخلصك من اي لمعة في البشرة وخصوصا لو بشرتك دهنية.