علاج الشعر المعجزة تقدري تعمليه بنفسك في البيت

اكيد كل بنات بيتمنوا شعر مثالي وصحي وبيلمع ومفرود, والنهاردة جايبين لكل بنات حوا طريقة علاج الشعر بالجيلاتين هيساعد انه يخلي شعرك اقوى وبيلمع وصحي اكتر لانه بيعمل زي غلاف على الشعر بيحميه من عوامل الجو والحرارة والرطوبة اللي ممكن تأثر عليه.

– فوايد علاج الشعر بالجيلاتين:

1- طريقة العلاج بالجيلاتين بتحمي الشعر لانه بيعمل طبقة خارجية من الكولاجين المستخرج من الجيلاتين وبالتالي هتحمي شعرك من اي حاجة ممكن تضره.

2- بيساعد على علاج تلف الشعر, والهيشان وجفاف الشعر, وهيخليه كمان اقوى واكتر مقاومة لدرجات الحرارة العالية زي المكوى او السيشوار.

3- بيساعد على تكثيف الشعر, وبيديه لمعة, ووبيخلي الشعر انعم واسهل في التعامل معاه, كمان بيحمي لون الشعر.

– طريقة علاج الشعر بالجيلاتين:

المكونات:

– معلقة صغيرة جيلاتين.

– 3 معالق صغيرة مية مغلية.

– معلقة كبيرة حمام كريم او بلسم ” اي نوع بتستخدميه”.

– وممكن تضيفي معلقة كبيرة زيت زيتون او زيت جوز هند “اختياري”.

الطريقة:

1- اغلي المية وسيبيها تبرد لحد ما توصل لدرجة حرارة الغرفة وبعدين ضيفي لها الجيلاتين وقلبيهم كويس مع بعض في طبق زجاج, ولو شعرك طويل والكمية مش هتكفي شعرك زودي المقادير بس حافظي على نسبة 1:3 “يعني 3 معالق جيلاتين و 9 معالق مية”.

2- غطي الطبق وسيبيه, واغسلي شعرك بالطريقة العادية بالشامبو والبلسم, نشفي شعرك بالفوطة.

3- دلوقتي هنيجي لمرحلة تطبيق الماسك على الشعر لو لقيتي الجيلاتين لما تيجي تستخدميه اتجمد ممكن ترجعي تدوبيه تاني على حمام مية سخنة, وبعد ما يدوب ضيفي له حمام الكريم وقلبيهم كويس لحد ما يبقى الخليط سلس وتقدري تحطيه على شعرك, ابدأي طبقي الماسك على الشعر بفرشة الصبغة بس اتجنبي الجذور خاصة لو شعرك دهني.

4- غطي شعرك بفوطة سخنة, وسيبيه 45 دقيقة.

5- بعد ما يخلص الوقت اغسلي شعرك بالشامبو بالطريقة العادية, ونتيجة الماسك هتشوفيها بعد ما الشعر ينشف خالص هتلاقي شعرك ناعم وبيلمع وشكله صحي اكتر.

طبعا عشان نوصل للنتيجة اللي احنا عايزينها ونعمل علاج كامل للشعر ويستعيد صحته لازم ننتظم عليه مرة في الاسبوع هتلاقي شعرك بالتدريج بدأ يتغير وهتلاحظي الفرق.

الماسك السحري لبشرة نقية وشعر لامع باستعمال الحلبة بس