وصفات طبيعية لعلاج جفاف وتشققات الايدين
جفاف وتشققات الايدين ليها اسباب كتير منها اننا مش بنرطب الايد بشكل كافي, او بسبب الجو, تعرض الايد للمية والمواد الكيميائية كتير, او اشعة الشمس, كل الاسباب دي بتأدي لضرر الطبقة الخارجية للجلد وجفافها وتسريع عملية الشيخوخة, عشان كده النهاردة جايبين لكل بنات حوا مجموعة وصفات طبيعية لعلاج جفاف وتشققات الايد وهترجع لايدك رطوبتها ونعومتها.
وصفات طبيعية لعلاج جفاف وتشققات الايد:
1- وصفة الافوكادو:
المكونات:
½ ثمرة افوكادو.
معلقة كبيرة زيت زيتون.
معلقة كبيرة خل تفاح.
الطريقة:
اهرسي الافوكادو وضيفي لها زيت الزيتون وخل التفاح وقلبيهم مع بعض كويس هتتكون عندك عجينة, افرديها على ايديك وسيبيها 15 دقيقة, وبعدين اغسليها بمية دافية.
2- وصفة خل التفاح:
المكونات:
مية.
خل تفاح.
اخلطي كميات متساوية من المية وخل التفاح, انقعي ايديك في الخليط لمدة دقايق, وبعدين امسحيها او اغسليها بالمية, خل التفاح من الحاجات اللي بتساعد جدا على علاج الجفاف والتشققات.
3- وصفة الجلسرين:
جلسرين.
كريم مرطب.
الطريقة:
الطريقة دي سهلة وبسيطة جدا وتقدري تستخدميها اي وقت, هاتي الكريم المرطب العادي بتاعك اللي انتي بتستخدميه وحطي له كمية من الجلسرين وقلبيه مع الكريم كويس, وادهني بيه ايديك على مدار اليوم او بعد كل مرة تعرضيها للمية, وممكن تخلي علبة الكريم في شنطتك كمان تستخدمي منها اي وقت بره البيت.
4- وصفة البيض:
المكونات:
صفار بيضة.
معلقة صغيرة عصير ليمون.
معلقة كبيرة زيت زيتون.
الطريقة:
اخلطي المكونات كلها وقلبيهم كويس مع بعض, ادهني ايديك بالخليط وسيبيه 15 دقيقة وبعدين اغسليه بمية دافية, الوصفة دي هايلة جدا لمنع شيخوخة وتجاعيد الايد وبتساعد على تنعميها.
5- وصفة بياض البيض:
الوصفة دي بسيطة جدا وهي من مكون واحد بس وهو بياض البيض, بس ادهني ايديك بالبياض وسيبيه 15 دقيقة او لحد ما ينشف وبعدين اغسليه بمية دافية, الوصفة دي ليها خصائص مكافحة للشيخوخة وبتساعد على تجديد خلايا الجلد وبتشد البشرة.
6- كريم الجلسرين ومية الورد:
المكونات:
مية ورد.
معلقة كبيرة جلسرين.
معلقة صغيرة عصير ليمون.
الطريقة:
- – هاتي كمية من مية الورد زي ما انتي عايزة وضيفي عليها الجلسرين وعصير الليمون اخلطيهم مع بعض واحتفظي بيهم في اي ازازة عندك واستخدميه بشكل يومي دلكي بيه الايدين, الكريم ده يعتبر من الحاجات الفعالة جدا في ترطيب وتنعيم الايد وكمان بيساعد على ازالة البقع من الجلد, احتفظي بيه في التلاجة للاستخدام اليومي.
– ممكن تستبدلي الجلسرين بزيت الزيتون.
7- كريم العسل ومية الورد:
المكونات:
2 معلقة كبيرة عسل نحل.
2 معلقة كبيرة زيت لوز حلو.
3 معالق كبيرة مية ورد.
معلقة كبيرة خل تفاح.
الطريقة:
سخني العسل تسخين خفيف على نار هادية وبعدين ضيفي له زيت الزيتون وقلبيهم وارفعيهم من على النار, اخلطي مية الورد وخل التفاح مع بعض وحطيهم على نار هادية ودفيهم شوية وبعدين ارفعيهم من على النار وضيفيهم لخليط العسل وزيت الزيتون وقلبيهم كلهم مع بعض كويس لحد ما الخليط يبرد, حطي الكريم في علبة فاضية او ازازة وادهني بيه الايد بشكل يومي قبل النوم.
8- وصفة عصير الخيار:
المكونات:
عصير خيار.
جلسرين.
الطريقة:
ابشري الخيار او اضربيه في الخلاط وطلعي منه العصير واخلطي معاه كمية متساوية من الجلسرين وادهني ايديك يوميا بالخليط, ممكن تدهنيه من بالليل زي الكريم وتغسليه الصبح, احتفظي بالخليط في ازازة في التلاجة للاستخدام اليومي.
9- وصفة السكر وزيت الزيتون:
المكونات:
3 معالق كبيرة سكر.
معلقة كبيرة زيت زيتون او زيت اللوز الحلو.
الطريقة:
– اخلطي السكر مع الزيت ودلكي الايد بالخليط لمدة 5 دقايق, الوصفة دي بتساعد على تقشير الجلد وازالة الخلايا الميتة وبالتالي ده بيساعد على التخلص من التشققات وتنعيم البشرة.
– ممكن نعملها بطريقة تانية نضيف عصير الليمون مع معلقة كبيرة سكر ومعلقة مية, وتدلكي بيهم الايدين, والوصفة دي تنفع كمان لخشونة الكوعين والركبتين.
10- وصفة عصير البطاطس:
ابشري ثمرة بطاطس كبيرة حطيها في شاشة واضغطي عليها طلعي منها العصير, ادهني ايديك بيه وسيبيه لحد ما ينشف وبعدين اغسليه بالمية, الوصفة دي مش بس بتنعم الايد وبتعالج التشققات كمان بتساعد على تبييضها, وبتبييض مفاصل الصوابع.
11- وصفة اللبن البارد:
ادهني ايديك بلبن بارد وسيبيه لحد ما ينشف وبعدين اغسليه بمية باردة, اللبن بيساعد جدا على ترطيب الايد وعلاج التشققات وكمان البثور اللي ممكن تظهر على الايد بسبب الجفاف والتشققات, وبيساعد على تبييض الايد.
12- وصفة الجيلاتين:
دوبي شوية جيلاتين في حمام مية سخنة, ولما يبرد شوية وجلدك يقدر يستحمله حطي ايديك فيه مع التدليك لمدة 15 دقيقة, وبعدين اغسليه, الوصفة دي بتساعد على علاج تشققات الايدين وكمان الاظافر, كرري الوصفة مرة في الاسبوع.
13- وصفة دقيق الحمص:
المكونات:
2 معلقة كبيرة دقيق حمص.
معلقة كبيرة زبادي.
الطريقة:
اخلطي الزبادي مع دقيق الحمص كويس لحد ما يتكون عندك عجينة, افركي ايدك بيها وسيبيها 15 دقيقة وبعدين اغسليها بالمية الدافية.
14- زيت جوز الهند:
ادهني ايدك يوميا قبل النوم بزيت جوز الهند واغسليها الصبح لانه لازم متتعرضيش للشمس وانتي داهنة الزيت على بشرتك, زيت جوز الهند من الحاجات الفعالة اللي بتساعد على تنعيم وترطيب الايد وعلاج التشققات.
15- الصابون الطبيعي:
الافضل تستخدمي لغسل الايدين صابون طبيعي مرطب تكون مكوناتة من مواد طبيعية تفيد البشرة, زي صابونة زيت الزيتون, او صابونة الغار, وغيرها من انواع الصابون الطبيعية الخالية من المواد الكيميائية اللي ممكن تضر البشرة.
6 وصفات طبيعية لتنعيم وتبييض الايدين
