9 حقايق مذهله عن الالماس diamond ماكنتيش تعرفيهم قبل كده!

آية حسان

في

1885

الألماس حاجة بيتمنوا الناس انهم يمتلكوها طول الوقت والناس شغوفة جدا بامتلاك الألماس لانه مخصص للملكات و العائلات الملكية حوالين العالم ، زى تاج ملكة بريطانيا المعروف باسم Kohinoor، وحب الستات بالتحديد للألماس مالوش نهاية وهيفضل موجود طول ما احنا عايشين ، لانه فى مقولة مشهورة بتقول انه ” الالماس افضل صديق للبنت” فامفيش بنت اكيد مش نفسها يبقى عندها خاتم او حلق من الألماس، وعلشان ماينفعش يبقى بتحبى حد اوى كده وانتى مش عارفاه كويس، فى المقال ده بنات حوا هتقولك على 9 حقايق مذهله عن الالماس ماكنتيش تعرفيهم قبل كده !

9 حقايق مذهله عن الالماس ماكنتيش تعرفيهم قبل كده!

1- النظرية الاوروبية القديمة :

فى اسطورة بتقول انه الرومان والاغريق القدماء كانوا بيؤمنوا انه الألماس بيتكون بسبب دموع الآلهة والنجوم اللى بتقع من السماء، وكمان كان فى اعتقاد شائع زمان عند الرومان انه سهم كيوبيد الحواف بتاعته من الألماس علشان كده ارتبط الحب والرومانسية بالألماس لحد وقتنا ده.

2- التكوين :

الألماس او الـ diamond هى فى الحقيقة تكوينات من الفحم والحفريات بتاخد ملايين السنين علشان تتكون فى باطن الارض، وعلشان تطلع على السطح بتحتاج هزات ارضية عنيفة او انفجارات بركانية ! لكن المميز فى الألماس انها زى ما قلنا بتتكون فى الاساس من الفحم الاسود والكاربون اللى بيتعرض لضغط كبير وحرارة عالية جدا تحت سطح الارض فجزيئات الكربون دى بترتبط ببعضها مكونة الشكل الكريستالى اللى بنشوفه للألماس.

3- ليه أتسمى diamond :

الجوهرة دى واخدة اسمها من كلمة “adamas,” والكلمة دى اصلها يونانى ولما اتحرفت للانجليزية بقت Diamond، و المعنى الحرفى ليها هو ” غير قابلة للتدمير أو لا يقهر” . مادة الألماس هى اقوى مادة عرفتها البشرية على الارض لسنين طويلة جدا ، لدرجة انه علشان يقدروا يقطعوا ألماسة او يخدشوها بيحتاجوا ألماسة تانية، لانه مفيش اى مادة تانية تقدر عليها بسبب صلابتها الكبيرة .

4- حقايق تاريخية :

الألماس طول عمره له قيمة كبيرة جدا من آلاف السنين ولحد دلوقتى. فى أدلة بتقول انه حتى فى الهند القديمة من حوالى 4 قرون قبل الميلاد الألماس مكانش بيتاجر فيها ولا بيتعامل بيها الا الاغنية و أفراد العائلات الملكية، وفى اقتباس من من عالم الطبيعة الرومانى ” Pliny ” من القرن الأول الميلادى بيقول انه “Diamond is the most valuable, not only of precious stones, but of all things in this world ” يعنى انه الألماس مش بس هو الأغلى من بين باقى الأحجار، لكنه أغلى حاجة موجودة فى العالم كله، وكانوا بيعتقدوا زمان انه الحواف الحادة للماسة بتحمى صاحبتها من كل الأخطار. وفى العصور الوسطى كانوا بيعتقدوا انه للألماس قدرات شفائية وانه بيقدر يعالج الأمراض و التعب العقلى.

5- موجود فين :

عايزة تعرفى تلاقى فين الألماس؟! فى مصادر رئيسية للألماس اتكونت من ملايين السنين ، فى بداية القرن الـ 14 الهند كانت اكبر مصدر للألماس على الارض و جذبت ليها التجار من اوروبا، لكن بمرور الوقت قل انتاج الألماس فى الهند و البرازيل حلت محلها كأكبر منتج للألماس فى العالم وفضلت البرازيل كده فترة لحد ما تم اكتشاف مخزون كبير من الألماس فى جنوب افريقيا فى القرن الـ 18. وحاليا مناجم الألماس بقت منتشرة فى اكتر من مكان حول العالم لكن اغنى الاماكن دى بالألماس هى كندا، بتسوانا، روسيا و ناميبيا.

6- اكبر ألماسة :

اكبر ألماسة موجودة فى العالم هى الـ Cullinan ، وزنها حوالى 603 او 3106 قيراط ! الألماسة دى تم اهدائها للملك ادوارد من مٌلاك المنجم اللى اكتشفوها فيه و فى الاخر اتقسمت لقطع تانية مختلفة فى الحجم.

7- ليه مخصص للجواز :

حقيقة كمان لطيفة من حقايق مذهله عن الالماس هى انه مرتبط بشكل كبير اوى بالحب والرومانسية، و وراء الارتباط ده قصة ! كان ف اتنين بيحبوا بعض زمان فى “اوستريا Austria ” اسمهم Archduke Maxmillian و Mary، واول خاتم خطوبة يبقى فيه ألماسة كان هو خاتم خطوبتهم، كان عبارة عن خاتم دهب عادى جدا وعليه ألماسات صغيرة على شكل حرف M اول حرف من اسم Mary ، و من وقتها وارتبطت الخواتم الألماس بالحب والرومانسية والجواز وبقت رمز لارتباط كل اتنين بيحبوا بعض.

8- The Test Tube baby diamond :

فى ايامنا دلوقتى وبسبب التطور الكبر فى العلم والتكنولوجيا بقوا يقدروا يصنعوا فى المعامل مجوهرات ليها نفس خصائص الشكل والتكوين بتاعت الألماس الطبيعى تقريبا عن طريق تكونولوجيا الـ Test Tube، وحتى العلماء المتخصصين فى الاحجار والمجوهرات مابيقدروش يطلعوا فروق بين الالماسة الطبيعية والالماسة المصنعة فى المعمل حتى بفحصها بأجهزة دقيقة وخاصة بفحص الجواهر.

9- ألماس من النجوم :

اكتر حقيقة مذهلة من حقايق مذهله عن الالماس هى انه العلماء اتوصلوا لاكتشاف كوكب متكون بشكل كامل من الكربون، وده معناه وجود مكون طبيعى جديد للألماس ، وسموه “55 Cancri e” ، الكوكب ده تم اكتشافه فى سنة 2004 و بيدور حوالين نجمة قريبة فى الطريق اللبنى او the Milky Way ، فى كمان حقيقة علمية تانية بتقول انه الكوكب ده هو عبارة عن نجمة بيوصل وزنها لـ 10 مليار تريليون تريليون قيراط ! والعلماء اللى اكتشفوا الكوكب ده سموه Lucy على اسم الاغنية المعروفة لفرقة الـ Beatles “Lucy in the Sky with Diamonds” .