بالصور : ازاى تقدرى تفرقى بين الجلد الطبيعى والجلد الصناعى خطوة بخطوة
الجلود دايما ليها قيمتها الغالية و لما حد فينا بيبقى عندها شنطة او شوز من الجلد الطبيعى اكيد بتبقى خايفة عليها، بس بيبقى مقلب وحش اوى لو اشتريتى شنطة ودفعتى فيها فلوس كتيرة وانتى فاكراها جلد طبيعى و بعدين اكتشفتى انها مش كده! وعلشان تتجنبى انه ده يحصل، فى المقال ده بنات حوا هتعرفك بالصور ازاى تقدرى تفرقى بين الجلد الطبيعى والجلد الصناعى خطوة بخطوة
بالصور : ازاى تقدرى تفرقى بين الجلد الطبيعى والجلد الصناعى خطوة بخطوة
1- خدى بالك اذا كانت الشنطة مكتوب عليها انها جلد طبيعى او لاء :
لو لقيتى الشنطة مكتوب عليها انها man made material يبقى اتاكدى ساعتها انها معمولة من جلد صناعى ومش طبيعى ، لو لو مالقيتيش مكتوب عليها حاجة خالص ، يبقى ده علشان المصنع بتاعها بيحاول يخبى انها جلد صناعى وبيحاول يبيعها على انها حلد طبيعى . لانه الطبيعى لو المصنع ده بيشتغل بجلد طبيعى انه يبقى فخور بده وبيحاول يسوقلها لانه تكلفة الجلود الطبيعية عالية جدا و ليها طبيعة خاصة فمش أى حد بيقدر يصنعها ، المصنوعات من الجلد الطبيعى هيبقى مكتوب عليها الحاجات دى :
جلد طبيعى real leather .
جلد طبيعى genuine leather.
مصنوع من منتجات حيوانية Made with animal products.
2- افحصى سطح الجلد واتاكدى انه موجود فيه ثقوب وحبوب صغيرة اوى :
تانى طريقة تقدرى تفرقي بيها بين الجلد الطبيعى والجلد الصناعى هى انك تفحصيه بعينيكى عن قرب، هتلاحظى وجود ثقوب او حبوب صغيرة اوى تشبه مسام الجلد، وده لانه الجلد الطبيعى بيشبه جلد الانسان بنسبة كبيرة جدا، اما الجلد الصناعى فهتلاقي سطحه املس وناعم ومستوى من غير اى ثقوب او مسام.
3- اتاكدى من وجود خطوط وتجاعيد :
افتكرى دايما ان الجلد الطبيعى مصنوع من جلد الحيوانات وعشان كده كل حتة فيه بتكون فريدة ومختلفة زى الحيوان اللى مصنوع منه.
و بيكون فيه خدوش وتنيات وتعريجات وكل مايكون عمال المصنع مهارتهم عالية كل ما يبقى تقليد الجلد الطبيعى احسن عشان كده على النت لما بتشوفى صورة بس بيبقى صعب التمييز بين الطبيعى والصناعى، لازم لما تشتري شنطة جديدة تتاكدى انه شكلها شبه جلد ايدك فيه خطوط رفيعة اوى وبثرات صغيرة لكن مش مستوى او املس بالكامل.
4- شمى الجلد واتاكدى من وجود ريحه طبيعية مش ريحة بلاستيك :
شمى الجلد واتاكدى انه ريحته طبيعية مش زى ريحة صناعية او ريحة بلاستيك، ولو مش متأكده انه الريحة اللى شمتيها هى الريحة المظبوطة، ادخلى محل تكونى متأكده انه بيبع منتجات من جلود اصلية وافحصى اى شنطة فيه كويس واعرفى مميزاتها ايه هى واتاكد منهم اذا كان عندهم اى جلود صناعية علشان تعرفى تقارنى بينهم ، اول ما تعرفى الفرق وتلاحظيه مستحيل هتتلغبطى تانى بين الطبيعى والصناعى.
افتكرى دايما انه الجلد الطبيعى هو فى الاخر جلد حيوان له سمات طبيعية قريبة لجلد الانسان بعكس الجلد الصناعى اللى بيبقى معمول بشكل اساسي من البلاستيك.
5- قربى من الجلد ولاعة واتاكدى انه الجلد بيتجعد تحتها :
اعملى التجربة على جزء صغير اوى من الشنطة او الجزمة يبقى صعب متلاحظ،لانه نار الولاعة اكيد هتسبب ضرر بسيط. قربى نار ولاعة من جزء متدارى من الشنطة لمدة من 5 لـ 10 ثوانى ولاحظى الحاجات دى :
– الجلد الطبيعى هيترحق على خفيف تحت النار على طول و ريحته هتبقى شبه ريحة الشعر المحروق.
– الجلد الصناعى النار هتمسك فيه بسرعة هتبقى ريحته زى البلاستيك المحروق.
6- افحصى الاطراف ، الجلد الطبيعى اطرافه خشنة :
افحصى اطراف وحواف الشنطة ، لو الشنطة دى جلد طبيعى هتلاقى انه الحواف خشنة و متعرجة بسيط اما الجلد الصناعى فالحواف ناعمة وملساء .
7- اتنى الجلد ولاحظى اللون هتغير ولا لاء :
لما تتنى الجلد هتلاحظى انه اللون بيتغير على خفيف اوى فى حالة لو كان الجلد طبيعى، وهيتجعد تحت ايدك بشكل طبيعى زى ما تكونى بتتنى اى منطقة فى جلدك بالضبط. انما الجلد الصناعى بيبقى مشدود ومنتظم اكتر وصعب يتنى اساسا فلونه مابيتغيرش.
8- اعملى test المية :
حطى كام نقطة مية على الجلد ، الجلد الطبيعى بيتشرب الرطوبة و السوائل فطبيعى هيشرب الماية فى ثوانى، لكن الجلد لو صناعى المية هتفضل على السطح والجلد مش هيتشربها لانه البلاستيك اللى بيعتبر المادة الاساسية فى تصنيع الجلد الصناعى مابيشربش المية ولا بيمتصها.
9- الجلد الطبيعى مش رخيص ابدا :
افتكرى دايما انه فى فرق كبير واساسي بين الجلد الطبيعى والجلد الصناعى وهو انه الجلد الطبيعى عمره ما هيبقى رخيص ابدا او تمنه قليل، وهتلاقى اسعارهم متقاربة فى كل المحلات اللى بتبيع منتجات من الجلود الطبيعية، علشان كده لفى فى اكتر من محل واعرفى فروقات الاسعار بين الجلد الطبيعى و الصناعى و المجمع. الشنط او المنتجات المصنوعة من جلود البقر هى الاعلى فى السعر بسبب متانتها وسهولة الدباغة ” تلوين الجلد”، انما الجلود السطحية بتبقى سعرها اقل .
10- ابعدى عن الـ bonded leather :
آخر نصيحة معانا من ازاى تفرقى بين الجلد الطبيعى والجلد الصناعى هى انك تبعدى عن الجلد المُجمع او الـ bonded leather ، وبنقصد بيه تجميع بقايا الجلود اللى اتبقت من تصنيع المنتجات، فى مصانع بتجمعها مع بعضها وتعيد تصنيعها تانى ، المنتجات دى بتبقى رخيصة وجودتها سيئة جدا وعلشان كده بيستخدموا النوع ده من الجلد المجمع فى اغلفة الكتب والمنتجات البعيدة عن اللبس، حاولى تتجنبى انك تشترى اى حاجة معمولة من bonded leather .
