4 نصايح لازم تعرفيهم قبل ما تلبسي البلوزة الدانتيل .. وافكار ازاي تلبسيها
الدانتيل من الخامات اللي بتدينا لوك انثوي وناعم جدا, وممكن تلبسيه بلوك Vintage او رومانسي, وتطلعي بلوك انيق وراقي جدا وممكن تلبسيها بطرق مختلفة سواء كاجوال على الجينز, او تلبسيه للسهرات يعني مناسب لكل الاوقات تقريبا, والنهاردة هنقول لكل بنات حوا 4 نصايح لازم تعرفيهم قبل ما تلبسي الدانتيل عشان تختاريه بطريقة صح وتطلعي باحلى لوك, ومجموعة افكار للبس البلوزة الدانتيل تقدري تختاري منها اللي يناسبك.
نصايح اعرفيهم قبل ما تلبسي الدانتيل:
1- الستايل:
اول حاجة لازم نعرف ان الدانتيل في منه اكتر من ستايل مختلف, في النوع اللي بيكون الدانتيل مداري الجسم تقريبا بشكل كبير, والنوع التاني اللي بيكون الدانتيل مبين الجسم بشكل اكبر, اختاري اللي تشوفيه افضل بالنسبة لك ومناسب ليكي اكتر.
2- الخامة:
الخطوة دي مهمة جدا لان الخامة هي اللي بتحدد اللوك النهائي, اختاري خامة دانتيل كويسة يعني متكونش باينة انها رخيصة, لان الغرض من لبس الدانتيل انه بيدي اناقة ورقي للوك بتاعنا عشان كده لازم تختاري الخامة بعناية جدا.
3- متظهريش الجسم زيادة عن اللزوم:
زي ما هو معروف ان الدانتيل شفاف وبيبين الجسم, فلو لقيتي البلوزة الدانتيل مبينة اجزاء من الجسم زيادة عن اللزوم ممكن تلبسي تحتها بادي او توب هيغير اللوك بتاعك خالص وهيطلع بشكل اشيك.
4- نسقيه صح:
بعد ما تختاري البلوزة الدانتيل المناسبة نسقي باقي الطقم بتاعك بشكل صح عشان تكملي اللوك واختاري البنطلون او الجيبة المناسبة ليها, ولما تختاري خلي التركيز على الدانتيل يعني متنسقيش حاجة معاه تغطي عليه خليه هو اللي يلفت النظر في اللوك بتاعك.
مجموعة افكار للبس البلوزة الدانتيل اختاري منها اللي يناسبك:
زي ما هنشوف في الالبوم بتاعنا انك ممكن تنوعي في لبس البلوزة الدانتيل ما بين الكاجوال لخروجاتك الصبح على البنطلون الجينز او الجيبة مع شوز رياضي او فلات مريح, او اللوك الكلاسيك لخروج بعد الضهر او سهرة ممكن تلبسيها على جيبة قصيرة او ميدي او ماكسي مع شوز بكعب حسب اللوك اللي تفضليه اكتر.
الفستان الدانتيل من احلى القطع اللي لازم تبقى في دولابك
