17 وصفة طبيعية لعلاج الحبوب اللي بتسببها مكنة الحلاقة بعد ازالة الشعر

بقلمريهام محمود فيبشرة visibility3290

الحبوب بعد ازالة الشعر بمكنة الحلاقة من المشاكل اللي بيعاني منها كتير من البنات وخصوصا اللي بشرتهم حساسة بيعانوا من الحبوب والالتهاب واحمرار البشرة, والنهاردة من خلال موضوعنا هنقولكم اسباب ظهور الحبوب, و وصفات طبيعية هتساعدك على علاج الحبوب بعد ازالة الشعر بمكنة الحلاقة, وكمان طرق الوقاية ومنع ظهور الحبوب.

– تعالوا نعرف الاول ايه اسباب ظهور الحبوب:

1- من اول الاسباب هو احتباس الشعر تحت الجلد لانه مش بيلاقي مسام مفتوحة يخرج منها وبالتالي ده بيسبب في ظهور الحبوب.

2- واحد من الاسباب في ظهور الحبوب هو ازالة الشعر في الاتجاه الغلط, المفروض اننا نزيل عكس اتجاه الشعر ايا كانت الوسيلة اللي بنستخدمها في الازالة سواء المكنة او السويت او الشمع.

3- استخدام منتجات غلط عند ازالة الشعر ممكن يضر البشرة ويسبب ظهور الحبوب والتهاب واحمرار البشرة.

4- استخدام نوع زيت غلط او مش مناسب لبشرتك مع المكنة.

5- لو بتشيلي الشعر بالشمع اتجنبي انه يكون سخن اوي لان ده هيسبب احمرار والتهاب البشرة وممكن يحرق الجلد.

6- متستخدميش ابدا مكنة حلاقة خاصة بشخص تاني.

علاج الحبوب بعد ازالة الشعر
علاج الحبوب بعد ازالة الشعر

– وصفات طبيعية لــ علاج الحبوب بعد ازالة الشعر:

1- جل صبار الالوفيرا:

الصبار بيحتوي على خصائص مضادة للبكتيريا والالتهابات عشان كده يعتبر من العلاجات الطبيعية الممتازة جدا للاحمرار والحكة والالتهاب والحبوب اللي بتسببها مكنة الحلاقة او اي وسيلة ازالة للشعر, وكمان بيدخل بعمق في الجلد وده بيساعد على قتل مسببات الالم والالتهاب.

اغسلي المنطقة الملتهبة او اللي فيها حبوب بمية باردة ونشفيها كويس, ادهنيها بطبقة من جل الصبار مع التدليك الخفيف لمدة ثواني لحد ما البشرة تتشرب الجل, كرري الوصفة مرتين في اليوم.

علاج الحبوب بعد ازالة الشعر
علاج الحبوب بعد ازالة الشعر

2- الضغط بالمية السخنة/الباردة:

الضغط البارد او السخن من العلاجات الفعالة لعلاج الالتهاب والاحمرار والحكة.

– للضغط البارد هتحتاجي مكعبات ثلج, وفوطة مبلولة.

امسحي المنطقة بمطهر او اغسليها كويس بالمية, حطي مكعبات الثلج في الفوطة واضغطي بيها على المنطقة المصابة لمدة 5 دقايق بشكل مستمر.

– وللضغط الساخن هتحتاجي مية سخنة, وفوطة.

طهري المنطقة ونضفيها كويس, حطي الفوطة في لتر مية سخنة واعصريها كويس لحد ما تتخلصي من المية الزيادة, اضغطي بيها على المنطقة لمدة 5 دقايق.

الكمادات الباردة بتساعد على تخدير المنطقة وازالة الشعر اللي تحت الجلد.

والكمادات السخنة بتطري وترطب المنطقة وبتحفز الشعر اللي تحت الجلد للخروج بسهولة.

ملحوظة: لو في التهاب قوي في البشرة او حرق في الجلد مستخدميش طريقة الضغط.

علاج الحبوب بعد ازالة الشعر
علاج الحبوب بعد ازالة الشعر

3- زيت شجرة الشاي:

زيت شجرة الشاي يعتبر مطهر طبيعي قوي وبيساعد على ازالة الاثار اللي ممكن يسببها ازالة الشعر, لانه بيحتوي على عامل مضاد للميكروبات وبيدخل بعمق في الجلد وبيحارب البكتيريا والفيروسات والالتهابات اللي بتسببها المكنة, كمان بيساعد على تهدئة المنطقة وبيقلل من الحكة والاحمرار.

اغسلي المنطقة بمية باردة ونشفيها كويس, هاتي فوطة نضيفة حطي عليها كام نقطة من زيت شجرة الشاي وحطيها على المنطقة المصابة لمدة دقايق, كرري الطريقة مرتين في اليوم.

علاج الحبوب بعد ازالة الشعر
علاج الحبوب بعد ازالة الشعر

4- صودا الخبز “الكربوناتو”:

صودا الخبز كمان من العلاجات الطبيعية الفعالة اللي بتساعد في علاج حبوب والحكة والالتهاب, ويعتبر مناسب جدا لصاحبات البشرة الدهنية والمختلطة بشكل خاص.

ضيفي معلقة كبيرة من صودا الخبز لكوباية مية عادية والافضل تكون مية مقطرة, هاتي قطعة قطن وحطيها في الخليط سيبيها 5 دقايق لحد ما تتشرب من الخليط كويس وبعدين طلعيها وحطيها على المنطقة المصابة وسيبيها 5 دقايق وبعدين اغسليها بمية باردة, كرري الطريقة 3 مرات في اليوم وسيبي وقت ما بين كل مرة والتانية حوالي 3 ساعات.

علاج الحبوب بعد ازالة الشعر
علاج الحبوب بعد ازالة الشعر

5- مية الورد/زيت الورد:

مية الورد تعتبر عامل مضاد للبكتيريا والميكروبات بتساعد على علاج مشاكل الجلد, وتعتبر مطهر بيساعد على محاربة الجراثيم والبكتيريا والفطريات والعدوى, وعلاج الاحمرار والالتهاب.

اغسلي المنطقة كويس وطهريها ونشفيها, هاتي قطعة قطن بليها بمية الورد وادهني بيها المنطقة المصابة وسيبيها لحد ما تنشف, كرري الوصفة مرتين في اليوم وما بين كل مرة والتانية سيبي وقت حوالي من 5 – 6 ساعات.

وممكن تستخدمي زيت الورد حطي منه كام نقطه على كوباية مية وادهني بيه المنطقة وسيبيه ينشف.

علاج الحبوب بعد ازالة الشعر
علاج الحبوب بعد ازالة الشعر

6- خل التفاح:

خل التفاح بيساعد على علاج الالتهاب والالم المرتبط بازالة الشعر, وحمض الخليك اللي موجود فيه بيساعد على علاج العدوى والحبوب.

نضفي المنطقة كويس, هاتي قطعة قطن بليها بخل التفاح, ادهني المنطقة بخل التفاح وسيبييها لحد ما تنشف ولو حستي بوخزة في البشرة ده طبيعي مافيش منه قلق ولا مشكلة, كرري الوصفة 3 مرات في اليوم.

علاج الحبوب بعد ازالة الشعر
علاج الحبوب بعد ازالة الشعر

7- عسل النحل:

العسل بيحتوي على مضادات للبكتيريا والجراثيم, وبيساعد في علاج الجروح والحبوب والتهاب الجلد والاحمرار والحكة والتورم, والعسل بيعمل طبقة عازلة على الجلد بتحميه من العدوى.

نضفي المنطقة ونشفيها, خدي كمية كافية من العسل تقريبا 5 معالق كبيرة دلكي بيها المنطقة لمدة 5 دقايق واستني لحد ما العسل ينشف خالص على البشرة وبعدين اغسليه بمية باردة.

الخطوة التانية اخلطي معلقة كبيرة خل تفاح مع 5 معالق كبيرة عسل نحل امزجيهم مع بعض كويس, دلكي المنطقة المصابة بلطف وسيبي الخليط على البشرة لمدة من 10 – 15 دقيقة لحد ما تنشف, وبعدها اغسليها بمية باردة, كرري الطريقة مرتين في اليوم.

ملحوظة: لو بشرتك دهنية او مختلطة الافضل متستخدميش الوصفة دي.

علاج الحبوب بعد ازالة الشعر
علاج الحبوب بعد ازالة الشعر

8- زيت جوز الهند:

زيت جوز الهند يعتبر من انواع الزيوت اللي بتعالج معظم مشاكل البشرة بما فيها الحبوب والاثار اللي بتسببها ازالة الشعر, وكمان هو مطهر وعامل مضاد للجراثيم, وبينضف مسام الجلد.

هاتي 3 معالق كبيرة من زيت جوز الهند دفيهم شوية على النار وسيبيه يبرد شوية لحد ما يبقى فاتر, اغسلي المنطقة ونشفيها كويس, دلكي المنطقة كويس بالزيت وسيبيه شوية لحد ما الجلد يتشرب الزيت كويس تقريبا حوالي 10 دقايق وبعدين كرري التدليك مرة تانية وسيبيه ينشف وبعدين امسحيه بفوطة نضيفة, كرري الطريقة 3 مرات في اليوم وما بين كل مرة والتانية سيبي وقت 3 ساعات.

ملحوظة: في انواع بشرة بتكون حساسة من زيت جوز الهند الافضل تجربي الاول على جزء صغير لو لقيتي في اي حساسية منه متستخدميش الوصفة.

علاج الحبوب بعد ازالة الشعر
علاج الحبوب بعد ازالة الشعر

9- الشاي الاسود او الابيض:

الشاي بيحتوي على مضادات الاكسدة اللي بتحارب الجذور الحرة والالتهابات والعدوى الجلدية والحبوب.

اغسلي المنطقة كويس ونشفيها, رطبي باكيت الشاي بمية دافية حطيه على المنطقة المصابة لمدة 5 دقايق لحد ما تلاقي السائل اللي في الباكيت نزل على الجلد, شيليه وسيبيه ينشف, كرري الوصفة مرة تانية بعد ساعات.

ملحوظة: متستخدميش اكياس شاي تكون مستخدمة وسخنة اوي او تكون متحلية بالسكر.

علاج الحبوب بعد ازالة الشعر
علاج الحبوب بعد ازالة الشعر

10- عصير الليمون:

الليمون بيحتوي على خصائص مضادة للجراثيم والميكروبات, وفيتامين C اللي بيغذي الجلد وكل ده بيدخل بعمق في الجلد وبيساعد على محاربة البكتيريا والالتهابات وبيقلل من التورم.

اغسلي البشرة بالمية وصابون طبي مضاد للبكتريا, هاتي قطعة قطن وبليها بعصير الليمون, حطي القطنة على المنطقة المصابة وسيبيها لمدة 5 دقايق, وبعدين شيليها وسيبيه 5 دقايق كمان لحد ما ينشف على البشرة, وبعدها امسحي البشرة بمنديل رطب او فوطة مبلولة, كرري الوصفة 3 مرات في اليوم وما بين كل مرة والتانية 3 ساعات.

ملحوظة: لو بشرتك حساسة او جافة متستخدميش الوصفة دي.

علاج الحبوب بعد ازالة الشعر
علاج الحبوب بعد ازالة الشعر

11- البيبي بودر “بودرة الاطفال”:

بودرة الاطفال بتحتوي على خصائص مبردةة ومهدئة للبشرة, وبتحتوي على الزنك اللي بيساعد على تقليل الالتهابات والاحمرار والحكة والتورم.

اغسلي المنطقة وطهريها كويس ونشفيها, حطي كمية كافية من بودرة الاطفال على المنطقة المصابة من غير تدليك ولا فرك, سيبي البودرة على البشرة لمدة 10 دقايق وبعدين امسحيها.

علاج الحبوب بعد ازالة الشعر
علاج الحبوب بعد ازالة الشعر

12- الفراولة:

الفراولة غنية جدا بمضادات الاكسدة والمعادن والفيتامينات اللي بتساعد على تغذية الجلد, وبتحارب الجذور الحرة اللي بتسبب تجاعيد البشرة والالتهابات وبتطهر الجلد.

اغسلي المنطقة ونشفيها, اهرسي الفراولة وضيفي عليها معلقة كبيرة Sour Cream “كريمة طبخ” وامزجيهم مع بعض كويس وادهني المنطقة المصابة بالخليط ودلكيها وسيبيها 10 دقايق وبعدين اغسليها بمية باردة ويفضل تكون مية باردة فيها ثلج, كرري الوصفة 3 مرات في اليوم وما بين كل مرة والتانية 3 ساعات.

ملحوظة: لو جلدك ملتهب اوي ووارم يبقى الافضل متستخدميش الوصفة دي.

علاج الحبوب بعد ازالة الشعر
علاج الحبوب بعد ازالة الشعر

13- سكراب السكر:

سكراب السكر بيساعد جدا في التخلص من الشعر المحبوس تحت الجلد انه يخرج من المسام وبالتالي بيمنع الحبوب.

اخلطي 4 معالق كبيرة سكر مع معلقة كبيرة عسل نحل و 2 معلقة كبيرة سكر بني اضربيهم مع بعض في الخلاط لحد ما يشكل عندك عجينة, اغسلي المنطقة ونشفيها, دلكي المنطقة المصابة بالعجينة وسيبيها 30 دقيقة ولما الخليط ينشف اغسليه بمية باردة.

ملحوظة: لو بشرتك حساسة او جافة متستخدميش الوصفة دي.

علاج الحبوب بعد ازالة الشعر
علاج الحبوب بعد ازالة الشعر

14- الزيوت الاساسية:

الزيوت الاساسية زي زيت اللافندر او البابونج من العلاجات الطبيعية اللي بتساعد في التخلص من مشكلة الحبوب لانها بتحتوي على مضادات للبكتيريا والجراثيم والفطريات, وبتساعد على علاج احمرار والتهاب وتورم الجلد, بيساعد كمان على خروج الشعر المحبوس تحت الجلد.

اختاري اي نوع زيت اساسي تفضليه وحطي منه كام نقطة في كوباية مية باردة ويفضل يكون فيها ثلج, اغسلي المنطقة كويس وهاتي فوطة نضيفة بليها من الخليط وحطيها على المنطقة المصابة وسيبيها 5 دقايق وبعدين شيليها وامسحيها بفوطة ناشفة, كرري الطريقة 3 مرات في اليوم.

ملحوظة: متستخدميش وصفة الزيوت لو بشرتك جافة او مقشرة, ومتستخدميش اي زيت اساسي على البشرة من غير ما تخففيه.

علاج الحبوب بعد ازالة الشعر
علاج الحبوب بعد ازالة الشعر

15- الاسبرين:

الاسبرين يعتبر عامل مضاد للالتهابات اللي بتساعد على تهدئة التورم والالم, وعلاج الحبوب.

اغسلي المنطقة كويس ونشفيها, اطحني قرصين اسبرين وضيفي عليهم معلقة كبيرة مية لحد ما تتشكل عندك عجينة, حطيها على المنطقة المصابة من غير فرك ولا تدليك, سيبيها تنشف وبعدين امسحيها, كرريها تاني بعد 5 ساعات.

ملحوظة: لو بشرتك حساسة او ملتهبة اوي او جافة متستخدميش الوصفة.

علاج الحبوب بعد ازالة الشعر
علاج الحبوب بعد ازالة الشعر

16- الخيار:

الخيار يعتبر مهديء طبيعي للبشرة وبيساعد على علاج الحبوب الناتجة عن ازالة الشعر لانه بيحتوي على مضادات للبكتيريا, وكمان بيحافظ على توازن البشرة, بيساعد على علاج الالتهاب والتورم والاحمرار والحكة المرتبطة بازالة الشعر.

اغسلي المنطقة ونشفيها, قطعي الخيار شرايح وحطيها على المنطقة المصابة, سيبيها 10 دقايق وبعدين شيليها وامسحي المنطقة.

او انقعي شرايح الخيار في كوباية لبن بارد شوية, وبعدين خدي الشرايح حطيها على المنطقة المصابة لمدة 10 دقايق  وبعدين اغسليها بمية باردة.

ملحوظة: لو جلدك ملتهب اوي بلاش تستخدمي الوصفة.

علاج الحبوب بعد ازالة الشعر
علاج الحبوب بعد ازالة الشعر

17- النشا:

النشا من الحاجات الهايلة جدا في علاج الحبوب الناتجة جدا عن ازالة الشعر, كمان بيساعد على توفير الكولاجين للجلد, وبيمنع الحكة والتورم والالتهاب.

اغسلي المنطقة كويس ونشفيها, هاتي ½ كوباية نشا وضيفي عليها مية باردة لحد ما تشكل عندك عجينة, طبقيها على المنطقة المصابة وسيبيها لحد ما تنشف وبعدين اغسليها بالمية, كرريها تاني بعد 5 ساعات.

ملحوظة: متستخدميهاش لو بشرتك جافة او مقشرة.

علاج الحبوب بعد ازالة الشعر
علاج الحبوب بعد ازالة الشعر

– طرق الوقاية من الحبوب بعد ازالة الشعر:

1- متحلقيش باستمرار:

لو في شعر مجعد على البشرة وفي احتمال ان الشعر اللي شيلتيه ممكن ميطلعش بشكل سليم او يتحبس تحت الجلد الافضل تأجلي ازالة الشعر مرة تانية لان ده ممكن يسبب التهاب واحمرار للبشرة.

2- متستخدميش نفس المكنة كتير:

لو استخدمتي نفس المكنة عدد مرات كتير لازالة الشعر مع الوقت هتبقى شفراتها تلمه وده هيخليكي تمشيها على المنطقة اكتر من مرة عشان تشيل الشعر وبالتالي ده هيسبب التهاب الجلد وظهور الحبوب.

3- اغسلي المكنة بالكحول قبل الاستخدام:

اكيد مش كل مرة هنستخدم مكنة حلاقة جديدة ونرمي القديمة لان ده هيبقى كتير على ميزانيتنا, عشان كده ممكن قبل كل استخدام المكنة ممكن تنضفي الشفرات بالكحول الطبي هيساعد انه يقتل اي بكتيريا ممكن تتنقل للبشرة وتضرها وتقدري في الحالة دي تستخدميها مرة تانية.

4- اعملي تقشير:

اعملي تقشير للبشرة قبل وبعد الحلاقة لانها بتساعد على ازالة خلايا الجلد الميت وتطهير المسام, وهيساعد على ازالة الشعر بشكل اسهل.

5- استخدمي كريم الحلاقة او اي بديل:

كريم الحلاقة بيساعد على ازالة الشعر بشكل اسهل, كمان بيساعد على ازالة حساسية الجلد.

6- زيلي الشعر بعد حمام دافي:

الدش الدافي بيساعد على فتح المسام وهيساعد ان الشعر اللي تحت الجلد يخرج بسهولة, والمية الدافية بتساعد على ترطيب الجلد وهيخلي ازالة الشعر اسهل.

7- متضغطيش بالمكنة على البشرة اثناء الحلاقة:

وانتي بتحلقي الشعر متضغطيش بالمكنة على البشرة لان ده ممكن يسبب جروح وحفر وندبات على البشرة, خلي ايدك خفيفة اثناء الازالة.

8- اتجنبي الحلاقة ضد الحبوب:

لو في حبوب على البشرة متمشيش المكنة رايح جاي على الحبوب لان ده ممكن يسبب احمرار والتهاب الجلد استخدمي المكنة في اتجاه واحد واحلقي المنطقة كلها وممكن تكرريها مرة واحدة كمان بشكل خفيف لو احتاجتي.

9- اغسلي المنطقة بمية باردة:

بعد ما تخلصي ازالة الشعر اغسليها بمية باردة عشان تقفلي المسام فورا وتمنعي اي عدوى او بكتيريا تدخل المسام وتسبب لك حبوب.

10- حافظي على المنطقة جافة بعد الحلاقة:

بعد الحلاقة حافظي على المنطقة جافة لانه ده هيمنع اي بكتيريا او التهابات ممكن تحصل للجلد بعد الازالة.

11- استخدمي كريم بعد الحلاقة:

بعد الحلاقة والتنضيف رطبي بشرتك بكريم او لوشن مناسب لنوع بشرتك, لان ده هيساعد على الحفاظ على رطوبة البشرة وهيخليها نضره وهيمنع مشكلة ظهور الشعر تحت الجلد.

12- البسي ملابس داخلية قطن او ملابس فيها مسامات:

الافضل بعد الحلاقة او ازالة الشعر باي وسيلة انك تلبسي قطن او ملابس فيها مسامات وتكون واسعة عشان تدي فرصة للهوا يدخل والبشرة تتنفس ومتعرقش عشان تمنعي اي عدوى او بكتيريا.

علاج الحبوب بعد ازالة الشعر
علاج الحبوب بعد ازالة الشعر

شوفي من هنا نصايح هتفيدك لو بتفضلي استعمال مكنة الحلاقة.

– نصايح عامة:

1- متخليش حد تاني يستخدم المكنة بتاعتك, لازم تكون المكنة خاصة بيكي بس ومافيش اي حد تاني يستخدمها غيرك عشان تمنعي اي عدوى او بكتيريا ممكن تتنقل لك من شخص تاني.

2- متحلقيش المكان اللي فيه حبوب بقوة او تخدشي المنطقة, لان ده ممكن يسبب ندبات وجروح على البشرة هيكون صعب علاجها.

3- متحطيش عطور او مزيل عرق على المنطقة المصابة لان المواد الكيميائية الموجودة في المنتجات دي ممكن يسبب تهيج الجلد زيادة.

علاج الحبوب بعد ازالة الشعر
علاج الحبوب بعد ازالة الشعر

ازاي تعملي كريم الحلاقة بنفسك في البيت ؟

ازاى تعملى كريم الحلاقة بنفسك فى البيت؟
ازاى تعملى كريم الحلاقة بنفسك فى البيت؟