11 نصيحة تخليكى تستمتعى بالوقت اللى بتقضيه لوحدك

بقلمآية حسان فيمنوعات visibility2629

ناس كتير من حواليكى بتشكر فى الوقت اللى بتقضيه لوحدها وبتوصفه على انه احلى وقت في حياتها، طيب وانتى؟ لما بتقضى وقت لوحدك بتفضلى رايحة جاية فى البيت ومش عارفة تعملى ايه !

يمكن ده مش هو رد الفعل المناسب بس هو طبيعى، خصوصا لو كنتى متعودى انك تبقى connected  24 ساعة بكل الناس من حواليكى ويومك دايما بيبقى مشغول فطبعا فكرة انك تقضى وقت لوحدك هتبقى صعبة عليكى فى الاول شوية. والحقيقة هو ده السبب انه فى ناس كتير اوى مابتقدرش تقضى وقت لوحدها  لانهم بيبقوا فاكرين انه الوقت ده هيضرهم اكتر ما هيفيدهم و بيشوفوا انهم لما يبقوا مشغولين طول الوقت ده هيشتت انتباههم بعيد عن مشاكلهم او الحاجات اللى بتضايقهم ومش عايزين يفكروا فيها.

علشان كده احنا فى المقال ده هنغير تفكيرك خالص  وهنقولك على 11 نصيحة تخليكى تستمتعى بالوقت اللى بتقضيه لوحدك.

11 نصيحة تخليكى تستمتعى بالوقت اللى بتقضيه لوحدك..

1- ماتخافيش تقضى وقت لوحدك:

لو فكرة انك تقضى وقت لوحدك بتخوفك او بتخليكى تقلقلى يبقى ماتضغطيش على نفسك وخدى الموضوع واحدة واحدة، يعنى لو لسه جديدة فى حوار انك بتقضى وقت لوحدك يبقى مش اول حاجة تعمليها انك تروحى تاخدى اجازة طويلة وتسافرى مثلا! فى البداية حاولى تعرفى ايه النشاطات اللى بتحبيها وفى نفس الوقت ممكن تخليكى ترتاحى وتسترخى وابدأى اعمليها بالتدريج، واكيد انك هتستمتعى بيها .ومع الوقت مش هتخافى تقضى وقت لوحدك، بالعكس انتى هتستمتعى بيه. 

2- أقنعى نفسك انك مش محتاجة حد تانى :

حاجة حلوة طبعا انه يفضل تليفونك طول الوقت بيرن و طول الوقت يبقى بيجيلك مسجات ومكالمات، بس خدى ثانية كده وفكرى ليه انتى محتاجة للاهتمام ولفت النظر 24 ساعة فى اليوم! يمكن لانك مابتعرفيش ترتاحى وتخصصى وقت لنفسك؟ لو  الاجابة آه يبقى خصصى وقت لنفسك فى اليوم واقفلى فيه التليفون والتابلت واى حاجة ممكن توصلك بأى حد وركزى فعلا مع نفسك وحاولى تسترخى ..مع الوقت هتتأكدى وتقتنعى انك فعلا مش محتاجة حد تانى غيرك. 

3- ارجعى مارسي هواياتك المفضلة:

معظم الناس اللى بيقولوا انهم مابيحبوش يقضوا وقت لوحدهم بيبقوا ببساطة لانهم بيملوا بسرعة ومابيلاقوش حاجة يعملوها فى الوقت ده.. لو دى مشكلتك يبقى لازم ترجعى تمارسي هواياتك المفضلة فى اسرع وقت ممكن، او لو “ماعندكيش هوايات” مع انه ده صعب شوية، حاولى تدورى على هواية جديدة وممتعة تعمليها، استخدمى الوقت الهادى اللى بتقضيه لوحدك فى انك تقرى، ترسمى، تسمعى مزيكا، اتعلمى ازاى تطبخى لنفسك مثلا.. ده الوقت اللى تتعلمى فيه حاجة جديدة. 

4- ماتمسكيش تليفونك:

لو خلاص قررتى انك تقضى شوية وقت مع نفسك يبقى لازم تبعدى ايدك عن التليفون تماما، لانه لما تمسكى التليفون وتقلبى فيه انتى كده مابقيتيش لوحدك ومش هو ده المطلوب، وكمان اكيد هتشوفى status update ممكن يضايقك او يحسسك انك وحيدة، وفرى على نفسك كل القلق ده وماتمسكيش تليفونك خالص. 

5- ده الوقت اللى تثقى فيه فى نفسك:

ممكن تكونى متعودة انك تكرهى الوقت اللى بتقضيه لوحدك لكن مع الوقت هتعرفى انه ده غلط تماما، لانه الوقت ده معناه انك تقدرى تعملى كل  واى حاجة انتى عايزاها، هو ده الوقت اللى لازم تثقي فيه فى نفسك وتعملى كل اللى نفسك فيه، اقعدى فى البيت ببجامتك القديمة اللى بتحبيها وبتتحرجى تلبسيها قدام حد، غنى، ارقصى، شوفى الكارتون اللى بتحبيه، كلى الاكل اللى كان نفسك فيه من زمان ! 

6- انزلى واتمشي واتفسحى:

انك تقضى وقت لوحدك مش معناه ابدا انك تحبسي نفسك فى البيت وماتخرجيش، بالعكس لو مابتحبيش تقعدى فى البيت علشان بتكسلى وبتحسي بملل قومى انزلى اتمشي واخرجى وفسحى نفسك واعملى الحاجات اللى بتحبيها، روحي اشربي قهوة لوحدك فى مكانك المفضل او اقعدى اقرى كتاب فى جنينة او حتى روحى الملاهى. استمتعى بالوقت على قد ما تقدرى.

7- استغلى الوقت لمصلحتك انتى مش لشغل البيت:

نصيحة كمان تقدرى بيها تستمتعى بالوقت اللى بتقضيه لوحدك هى انه لازم تعرفى ان شغل البيت ده مش وقته خالص! ماتعمليش شغل البيت فى وقتك الخاص بيكى حتى لو عارفين انه شغل البيت مابيخلصش وانتى عايزة ترتاحى منه، بس وقتك الخاص مش هو الوقت المناسب للتنضيف، ولو لازم تعملى كده.. يبقى شغلى مزيكتك المفضلة بصوت عالى و قومى يلا فى حركة نشيطة اخلصى من شغل التنضيف بس حاولى تخلى الموضوع ممتع و تستمتعى بالوقت ويبقى fun . 

8- قولى لنفسك  انه ده مفيد علشانك:

لما تقضى وقت لوحدك ده هيخليكى تفكرى وتفهمى نفسك اكتر وبالتالى هيخليكى تقدرى تاخدى قرارات افضل بشكل عام فى حياتك، وهيحسن من تعاملك مع عيلتك وبيتك واصحابك لانك هتبقى اهدأ وبالتالى تعاملاتك معاهم هتبقى افضل، لو بدأتى تحسي نفسك وحيدة افتكرى دايما انه كل دقيقة هتقضيها لنفسك هتخليكى شخص افضل.

9- استغلى الوقت فى انك تطورى من نفسك:

بقالك شهور بتقولى لنفسك انك عايزة تكتبى، او تنزلى تجرى، او تلعبى رياضى او تلعبى بيانو مثلا و كل مرة مابيبقاش فى وقت! طيب يلا اهه الوقت جه، استغلى الوقت اللى بتقضيه لوحك فى انك تعملى الحاجات اللى كان نفسك فيها ومأجلاها و طورى من نفسك.

10- اشتغلى على علاقاتك :

انك تقضى الوقت لوحدك مش معناه ابدا انك تحسي انك وحيدة ومفيش حد معاكى، لكن معناه انك تفكرى ف اللى بتحبيهم وتقدريهم اكتر لانك بالشكل ده هتقدرى كل دقيقة بتقضيها معاهم وهتعرفى قيمتهم اكتر وهيخليكى تركزى على اللى بتحبيهم، وده هيخلى حياتك اسهل بكتير.

11- استمتعى بالوقت واسترخى:

آخر نصيحة علشان تعرفى ازاى تستمتعى بالوقت اللى بتقضيه لوحدك هى انه اكيد مفيش حاجة وحشة فى انك تهتمى باللى حواليكى وتنزلى تخرجى معاهم وكل الحاجات دى، لكن خليكى حرة انك فى اى وقت تحبى تفضلى فى البيت وتكنسلى اى خطط وتسترخى  و تستمتعى بوقتك، وتاخدى bubble bath طويل مثلا او تقعدى قدام التليفزيون.

اعرفى معانا كمان 20 نصيحه يساعدوكى فى تحسين شخصيتك وثقتك بنفسك