وصفات طبيعية لعلاج الشعر المصبوغ والجاف
صبغ الشعر او الهايلايت او استخدام اي مواد كيميائية من اكتر الحاجات اللي بتأثر بشكل سلبي جدا على الشعر وبتخليه جاف ومقصف لكن في في نفس الوقت البنات بيحبوا التغيير وتجديد اللوك ومن فترة للتانية بنحب نغير لون شعرنا, عشان كده النهاردة جايبين لكل بنات حوا مجموعة وصفات طبيعية لعلاج الشعر المصبوغ والجاف بشكل خاص تقدري تعمليها بعد الصبغة عشان تخلي الشعر صحي وتحافظي على رطوبته.
وصفات طبيعية لعلاج الشعر المصبوغ والجاف:
1- ماسك الموز:
هنجيب موزة نهرسها ونضيف عليها معلقة صغيرة عسل نحل ونضربهم مع بعض في الخلاط لحد ما الخليط يبقى ناعم وكريمي ومافيهوش اي كتل.
– وزعي الخليط على الشعر كله من الجذور للاطراف.
– سيبي الماسك 20 دقيقة وبعدين اغسليه بالمية والشامبو بالطريقة العادية.
2- ماسك المايونيز:
المايونيز يعتبر من افضل العلاجات للشعر المصبوغ اللي بترجعه صحي تاني وبتخليه طري ورطب وبتعالج تأثير المواد الكيميائية الموجودة في الصبغة, وكمان بتخلي لون الصبغة يثبت معاكي فترة اطول.
– هاتي كمية من المايونيز حسب طول وكثافة شعرم وزعيها على الشعر من الجذور للاطراف.
– غطي شعرك بطاقية الشعر او كيس بلاستيك, ولفي فوطة سخنة على الشعر.
– سيبي الماسك من 30 – 40 دقيقة وبعدين اغسليه بالمية دافية وشامبو وبعدين مية باردة عشان تقفلي مسام فروة الراس.
– كرري الماسك من 2 – 3 مرات في الاسبوع.
3- ماسك زيت الزيتون:
زيت الزيتون كمان من العلاجات الممتازة جدا للشعر المصبوغ, وبيغذي وبيرطب فروة الراس بعمق, وبيظهر لون الشعر اكتر.
– هاتي كمية من زيت الزيتون دفيهم شوية على النار.
– دلكي فروة الراس بالزيت على الاقل من 10 – 15 دقيقة.
– ممكن تكرري مساج زيت الزيتون يوميا على الشعر لافضل النتايج.
4- ماسك البيض:
البيض يعتبر مصدر ممتاز للزيوت الغذائية والبروتينات اللي بتغذي الشعر وبتساعد على علاجة من الجفاف وتأثير المواد الكيميائية اللي موجودة في الصبغة, وبتحافظ على رطوبة الشعر.
– ممكن تحطي البيض لوحده على الشعر وتسيبيه 20 دقيقة وبعدين تغسليه بالمية والشامبو.
– او اضربي موزة في الخلاط لحد ما تبقى ناعمة وضيفي عليها كوباية لبن وبياض بيضتين واضربيهم كلهم مع بعض وممكن تضيفي لهم معلقة كبيرة زيت زيتون او زيت خروع او زيت لوز حلو او زيت جوز هند اختاري اي نوع زيت منهم تفضليه, وزعي الماسك على الشعر كله بفرشة, سيبيه لمدة 30 دقيقة وبعدين اغسليه بالمية والشامبو.
5- ماسك القهوة:
لو شعرك غامق اوي القهوة تعتبر محسن للون, وبتديه لمعة وبترطبه.
– اعملي القهوة بالطريقة العادية وسيبيها تبرد خالص.
– حطي القهوة في ازازة ببخاخ وابدأي رشي الشعر كله, وبعدها سرحي شعرك بالمشط عشان توزعي القهوة كويس على الشعر كله.
– سيبيها على الشعر من 15 – 30 دقيقة, وبعدين اغسليه بالمية والشامبو.
– وممكن بعد الوقت ده تكرري رش الشعر تاني لو عايزة نتايج افضل.
6- ماسك الافوكادو:
الافوكادو كمان من العلاجات الهايلة جدا للشعر المصبوغ بيقلل تلف الشعر, وبيديه لمعه, وبالتالي بيخلي لون الشعر يستمر معاكي فترة اطول, وبيغذي الشعر وبيمده بفيتامين E و B و K.
1- اضربي ثمرة موز مع ثمرة افوكادو في الخلاط لحد ما يبقى المزيج ناعم وممكن تضيفي لهم كمية من اللبن الرايب لو عايزة تزودي فعالية الماسك اكتر.
2- وزعي الخليط على الشعر وسيبيه من 20 – 25 دقيقة, وبعدين اغسليه بالمية والشامبو.
نصايح للعناية بالشعر .. وازاي تحميه من الضرر والتلف وترجعيه صحي
