10 تمرينات سهله تعمليهم وانتى فى المكتب
لو معندكيش وقت تروحى الجيم او بتكسلى تعملى وقت مخصوص للتمرين وسط مشغوليات كل يوم سواء كانت مشاغل الكلية او الشغل والبيت و الاولاد، لسه فى امل ! فى المقال ده جيبنلك حل سهل و بسيط جدا ، هنقولك على 10 تمرينات سهله تعمليهم وانتى قاعده على مكتبك فى الشغل ..
10 تمرينات سهله تعمليهم وانتى فى المكتب …
التمرين الاول : تمرين الـ caligraphy artist :
فى التمرين ده وباستخدام الانف وانتى قاعده فارده ضهرك حاولى ترسمى حروف T – U – P فى الهواء و بعدين حاولى تتخيلى كلمات و تكتبيها من اليمين للشمال و العكس .
التمرين التانى : تمرين The great thinker :
وانتى قاعده على الكرسي بتاعك ، اسندى بالكوعين على المكتب واسندى دقنك على الابهامين و زقى بدقنك على ايدك بقوة على قد ما تقدرى و عدى لحد 20 وانتى مستمرة فى الضغط ، بعد ما توصلى لـ 20 ارتاحى ثانيتين و كررى التمرين ده اكتر من مرة على قد ما تقدرى.
التمرين التالت: تمرين Prepare to fight :
جمعى قبضة ايديكى بقوة وافرديها اكتر من مرة علشان تحركى الدورة الدموية فى ايديكى و المعصمين و بعد تكرار الحركة دى كام مرة هزى ايديكى فى الهواء علشان تريحيهم.
التمرين الرابع: تمرين yoda master :
التمرين ده بيعتبر واحد من التمرينات السهلة جدا ، وانتى قاعدة على كرسي مكتبك ضمى اطراف صوابع ايديكى على بعض و اضغطيهم على بعض 20 ثانية و بعدين ريحى ايديكى وكررى التمرين تانى من 5 لـ 10 مرات .
التمرين الخامس: تمرين الكتاب exercise with a book :
حطى كتاب كبير له صفحات كتيرة بين رجليكى و من فترة للتانية قومى اقفى و الكتاب بين رجليكى او وانتى قايمة تيجيبى حاجه مثلا، و كررى التمرين لحد ما تحسي انه عضلات رجليكى بدأت تشد .
التمرين السادس: فوق و تحت و فى دايرة Up, Down and around :
فى التمرين ده هتقلعى الشوز بتاعك وانتى قاعدة على الكرسي و ترفعى رجل من رجليكى و تنزليها وبعدين ترفعى التانية و انتى بتزقى مشط رجلك لقدام ، كررى التمرين ده 20 مرة لكل رجل .
التمرين السابع : تمرين النوم على المكتب student at a lecture :
حطى ايديكى ورا راسك و نامى على المكتب واثبتى على الوضع ده دقيقة ، دقيقة على الوضع ده كافية انها تخليكى تحسي وكأنه فى حمل اتشال من على ضهرك لانها هتريح ضهرك و رقبتك جدا .
التمرين التامن knees to stomach :
تمرين كمان من التمرينات السهلة هو تمرين ثنى الرجلين للمعدة او knees to stomach ، وانتى قاعده على كرسي المكتب ابدأى اتنى رجليكى وارفعيها لمستوى معدتك و كرريه 20 مرة .
التمرين التاسع: تمرين شفط البطن strain and relax :
واحد من التمرينات المفيدة لشد عضلات البطن، وانتى فى مكتبك وحتى اثناء الشغل ، اشفطى بطنك و ريحيها 5 مرات ورا بعض و كررى التمرين 20 مرة .
التمرين العاشر : تمرين تنحيف الخصر waist of a bee :
آخر تمرين معانا من تمرينات سهله تعمليهم وانتى فى المكتب هو تمرين تنحيف الخصر، وانتى قاعدة على الكرسي ابعدى بيه شوية عن المكتب وامسكى فى طرف المكتب و ابدأى لفى بالكرسي يمين و شمال 20 مرة و حاولى تفضلى فاردة ضهرك وانتى بتعملى التمرين ده ، كرريه قد ما تقدرى فى فترات متباعدة من اليوم .
بكده تكونى عرفتى معانا 10 تمرينات سهله تعمليهم وانتى فى المكتب ، يلا ابدأى تمرينات واحكيلنا عن النتيجة…