8 عادات بيعملوها الـ couples اللى فاهمين بعض كويس

لو كنتى فى علاقة او مرتبطة، يبقى انتى اكيد عارفة انه الموضوع صعب وبيحتاج مجهود وشغل كتير اوى علشان ينجح، لانه بتقابلنا مشاكل وصعوبات كتير طول الطريق. علشان كده الطريقة اللى بتتواصلى بيها انتى والطرف التانى مع بعض مهمة وبتحدد شكل كبير اذا كنتوا هتقدروا تتخطوا المشاكل دى وتعدوا الاوقات الصعبة مع بعض ولا لاء، فلو كنتى بتدورى على نصايح او طريقة تقدرى تعرفى بيها ازاى تتواصلوا مع بعض واذا كنتوا فاهمين بعض ولا لاء.. اعرفى مع بنات حوا فى المقال ده 8 عادات بيعملوها الـ couples اللى فاهمين بعض كويس

8 عادات بيعملوها الـ couples اللى فاهمين بعض كويس  ..

1- مابيتكلموش بشكل عام او غير محدد : 

الكلام العام او زى ما بيسموه فى علم النفس الـ Universal statements هو الكلام الغير محدد و اللى مابيركزش على وقت او موقف بعينه، وعادة كلام زى ” انت طول عمرك .. ” او ” انت عمرك ما بتعمل … ” هو اللى بيستخدم فى الـ Universal statements دى، الطريقة دى فى الكلام بتكون مؤذية وبتوجع لانها دايما بتصدر الاحساس الوحش وبتركز على عيوب الطرف اللى بيسمع الكلام ده. علشان كده الـ couples  اللى فاهمين بعض كويس مابيستخدموش الطريقة دى فى كلامهم.

2- بيسمعوا لبعض : 

لما تكونوا منفعلين او بتشدوا قصاد بعض، عادة اى حد فينا مابيبقاش مركز انه يسمع الكلام اللى بيتقاله لانه بيبقى بيفكر فى هيرد يقول ايه، الافضل من انك تفكرى فى الرد هو انك تسمعى الكلام اللى بيتقالك وهو كمان يسمع كويس علشان توصلوا لحل بعيدا عن الشد والخناق.

3- بيحترموا مشاعر بعض : 

كل حد فينا بتهمه مشاعره علشان كده مهم اوى انك تهتمى بمشاعر الطرف التانى وتقدريها وتحترميها، ومهم انه الطرف التانى هو كمان يعمل كده حتى لو ماتفقتوش او كنتوا مختلفين على موضوع معين. لانه قلة الاهتمام بالمشاعر هتبنى حواجز بينكم وتخلى التفاهم والتواصل بينكم اقل، وبالتالى عمر العلاقة بينكم هيفضل يقصر.

4- بيضيفوا الفكاهة لعلاقتهم :

حتى لو كنتوا بتتكلموا فى موضوع مهم مش لازم يبقى الكلام ناشف وجاد زى ما تكونوا فى ميتنج شغل! دايما هزروا مع بعض وافتكرى انه دمه الخفيف هو من اكتر الحاجات اللى شدتك له من البداية.

5- صادقين مع بعض :

اوقات كتير الحقيقة مابتريحش وبتبقى بتوجع حبتين، لكن الحقيقة والصراحة والصدق مهمين جدا فى اى علاقة او ارتباط، خصوصا انه كل كدبة صغيرة هتجيب وراها كدبة كمان صغيرة لحد ما تكبر وتبقى كدبة كبيرة تهدد علاقتكم، علشان كده حتى لو كان سماع الحقيقة صعب على الطرف التانى وهتوجعه قوليها، وهو على المدى الطويل هيقدر صدقك وصراحتك.

6- منفتحين مع بعض وبيقولوا لبعض كل حاجة : 

افتكرى دايما انه هو مابيقراش افكارك! يعنى لو انتى ماقولتيلوش انتى عايزة ايه او ايه اللى مزعلك هو عمره ما هيعرف لوحده ” حتى لو كان مهتم”، علشان كده اتكلموا دايما مع بعض وعرفوا بعض باحتياجاتكم و الحاجات اللى بتبسطكم او بتضايقكم.

7- بيتكلموا دايما بصيغة الحاضر : 

لو مثلا بتتكلموا عن مشاكلكم المالية، خلوا الحوار كله مركز على الموضوع اللى بتتكلموا فيه وماتدخلوش اى مشاكل او موضوعات تانية زى مسؤولية البيت او الخروجات مثلا فى وسط الكلام، وماتتكلموش كمان عن اى التزامات او ترتيبات انتوا ناويينها فى المستقبل، الكلام بصيغة الحاضر من اهم عادات بيعملوها الـ couples الناجحين.

8- مرنين فى علاقتهم ببعض : 

آخر عادة من عادات بيعملوها الـ couples الناجحين هما انهم مرنين جدا، بمعنى انه ممكن يكون رأيك هو الصح وانتى شايفة كده بس مهم تتقبلى رأيه كمان وتفكرى فيه، ده مش بس هيوصل للطرف التانى الانطباع انك بتحترمى رأيه وبتقدرى تفكيره، لكن ممكن يكون رأيه فعلا هو الصح والمناسب.

اعرفى معانا كمان 10 حاجات لازم كل اتنين متجوزين يعملوها هتزود الحب بينهم !