وصفات مشروب الخيار لطرد السموم من الجسم .. واعرفي كل فوايده الصحية
لو عايزة تزيلي السموم من الجسم لكن معنديش وقت وعايزة حاجة سريعة ومختلفة, جربي معانا النهاردة وصفات مشروب الخيار لطرد السموم من الجسم واعرفي كل فوايدة الصحية.
– فوايد مشروب الخيار:
1- بيحافظ على ترطيب الجسم.
2- بيمد الجسم بالفيتامينات والمعادن.
3- بيساعد على خفض ضغط الدم.
4- بيساعد في السيطرة على الشهية.
5- بيهدي الجلد, وبيدي نضارة للبشرة.
6- بيحافظ على توازن الجسم.
7- بيزيل السموم من الجسم.
– وصفات مشروب الخيار:
1- مشروب الخيار والليمون والنعناع:
دمج الخيار مع الليمون والنعناع بيدو الجسم فوايد اضافية لما بيتحطوا مع بعض, بيدي تبريد وترطيب للجسم, بيمد الجسم بالفيتامينات, بيعزز جهاز المناعة, لان الليمون والنعناع مصادر غنية بفيتامين C بالاضافة للمعادن المهمة زي الكالسيوم والمغنسيوم, والخيار يعتبر مصدر ممتاز جدا للالياف, بالاضافة لده كله المشروب ده يعتبر من افضل الوصفات لانقاص الوزن.
المكونات:
– مية مفلترة.
– 2 شريحة خيار مع حوالي قشر ½ خيارة.
– مكعبات ثلج.
– شرايح ليمون رفيعة.
– ورق نعناع مفروم.
الطريقة:
– هاتي طبق حطي فيه مكعبات الثلج وضيفي له شرايح الخيار وسيبيهم نص ساعة على الاقل.
– حطي المية في الابريق وضيفي لها مزيج الخيار والثلج وحاولي تخلي الثلج فوق شرايح الخيار وبعدين ضيفي لهم شرايح الليمون واوراق النعناع وقلبيهم مع بعض بشكل خفيف.
– حطي الابريق في التلاجة لمدة ساعتين على الاقل.
– دلوقتي تقدري تشربي منه, ممكن تشربي منه طول اليوم بدل المية العادية.
2- مشروب الخيار والفراولة:
كمان مزيج الخيار والفراولة والليمون في المشروب ده بيمد الجسم بفيتامين C اللي بيساعد على تخليص الجسم من السموم.
المكونات:
– مية مفلترة.
– 2 شريحة خيار مع قشر ½ خيارة.
– مكعبات ثلج.
– شرايح فراولة.
– شرايح ليمون رفيعة.
– اوراق نعناع مفروم.
– ريحان مفروم “اختياري”.
الطريقة:
– ضيفي شرايح الخيار مع مكعبات الثلج وسيبيهم نص ساعة.
– حطي المية في ابريق وضيفي لها الفراولة ومزيج الخيار والثلج وخلي الثلج فوق شرايح الخيار والفراولة, بعدين ضيفي لهم شرايح الليمون واوراق النعناع وقلبيهم بشكل خفيف.
– حطي الخليط في التلاجة لمدة ساعتين على الاقل, وبعدها اشربي منه على مدار اليوم.
ازاي تطلعي السموم من جسمك عن طريق القدمين بطريقة فعالة
