افكار هدايا انيقة ومش مكلفة لشريك حياتك

ريهام محمود
ريهام محمود
في
حب
33182

لو ميزانيتك صغيرة او مش معاكي فلوس كفاية ومش هتقدري تجيبي هدية غالية لشريك حياتك في اي مناسبة خاصة ممكن تقدمي له هدية مبتكرة وانيقة وفي نفس الوقت رخيصة ومش مكلفة وهتوصل نفس الرسالة لان الهدية اكيد مش بتمنها المهم انها تعبر عن حبك ومشاعرك ليه يعني تقدري تعملي يوم رومانسي من غير ما تصرفي فلوس كتير وتأكدي انه هينبسط بيها جدا وهيقدرها, والنهاردة من خلال موضوعنا هنقولك افكار هدايا لشريك حياتك مش مكلفة او بميزانية صغيرة.

افكار هدايا لشريك حياتك مش مكلفة:

1- روحوا اماكن مش غالية:

كل مدينة او محافظة بيكون فيها اماكن مش غالية يعني مش لازم عشان تتفسحوا تروحوا اماكن غالية تدفعوا فيها فلوس كتير لكن ممكن تروحوا مكان اقتصادي على قد ميزانيتك وهتنبسطوا المهم تقضوا يوم حلو مع بعض ايا كان المكان اللي هتروحوه, ممكن تاخديه مطعم صغير مش غالي, او تروحوا تاكلوا اكلة شعبية, ولو انتوا عايشين مثلا في مدينة ساحلية ممكن تتمشوا على البحر, او لو هو بيحب التاريخ والحاجات الاثرية ممكن تروحوا تزورا متاحف.

افكار هدايا لشريك حياتك مش مكلفة 1
افكار هدايا لشريك حياتك مش مكلفة 1

2- قدمي له الفطار في السرير:

من اكتر الافكار الرومانسية اللي هيحبها جوزك جدا انه تقدمي له الفطار في السرير حتى في الايام العادية مش لازم يكون في مناسبة عشان تعمليها يعني ممكن تعمليها على فترات على سبيل التجديد والتغيير, لكن لو في مناسبة خاصة ممكن تقدميه بشكل مختلف وتبتكري فيه يعني مثلا تعملي كيك على شكل قلب ومعاه العصير اللي بيحبه, ومعاهم ممكن تحطي ورد عشان تظهري له حبك, والهدية على قد ما هي بسيطة جدا ومش هتكلفك حاجة لكن هيفضل فاكرها ومش هينساها لوقت طويل.

افكار هدايا لشريك حياتك مش مكلفة 2
افكار هدايا لشريك حياتك مش مكلفة 2

3- اكتبي له رسايل:

في المناسبات الخاصة زي عيد ميلاده او عيد الحب او عيد جوازكم, ممكن تكتبي رسايل تحطيها في اماكن متفرقة في البيت وعارفة انه هيفتحها او هيشوفها وتكتبي فيها الحاجات الحلوة واللحظات الحلوة بينكم عشان تفتكروها مع بعض او الحاجات اللي بتحبيها فيه, او تكتبي الرسايل وتحطيها جوه بالونات, ودي تعتبر هدية بسيطة جدا ومش مكلفة لكن في نفس الوقت معبرة جدا.

افكار هدايا لشريك حياتك مش مكلفة 3
افكار هدايا لشريك حياتك مش مكلفة 3

4- اتفرجوا على افلام:

اكيد انتي هتبقي عارفة ذوقه في الافلام ممكن تقضوا يوم مع بعض في البيت وتشوفوا الافلام الرومانسية اللي بيحبها مع بعض يعني مش لازم تروحوا سينما او مسرح, اعملوا انتوا جو السينما في البيت واستمتعوا بالفرجة على الافلام سوا.

افكار هدايا لشريك حياتك مش مكلفة 4
افكار هدايا لشريك حياتك مش مكلفة 4

5- اهديه اغنية:

ممكن لو هو متابع محطة اذاعية معينة تهديه عليها اغنية ومعاها رسالة رومانسية موجهه ليه وعبري له عن حبك قدام العالم كله, اللحظة دي هتفضل في قلبه وعقله طول العمر مش هينساها ابدا.

افكار هدايا لشريك حياتك مش مكلفة 5
افكار هدايا لشريك حياتك مش مكلفة 5

6- اعملي عشا رومانسي:

ممكن تفاجئيه في يوم وتعملي عشا رومانسي على ضوء الشموع, وتحطي موسيقى هادية او اغاني رومانسية تمشي مع المناسبة اللي انتوا بتحتفلوا بيها, يعني مش لازم تروحوا مطعم او تدفعي فلوس كتير ممكن تحتفلوا باقل التكاليف وفي نفس الوقت هتبقي عبرتي عن حبك ليه.

افكار هدايا لشريك حياتك مش مكلفة 6
افكار هدايا لشريك حياتك مش مكلفة 6

7- برواز صورة:

ممكن في عيد ميلاده تختاري صورة حلوة ليه وتحطيها في اطار حلو وممكن انتي تنفذي اطار بنفسك باي طريقة تفضليها وتعلقيها ولما يرجع البيت يتفاجأ بيها, ولو في مناسبة مشتركة بينكم زي عيد الحب او عيد جوازكم ممكن تحطي صورة ليكم انتوا الاتنين مع بعض وتعلقيها عشان تفكركم دايما بحبكم لبعض وبذكرى حلوة بينكم.

افكار هدايا لشريك حياتك مش مكلفة 7
افكار هدايا لشريك حياتك مش مكلفة 7

8- اعملي له هدية خاصة:

دلوقتي منتشر جدا في اماكن كتير انك تكتبي اسم او تحطي صورة على تيشرت او مج او كفر الموبايل او ميدالية مفاتيح, ممكن تطبعي اسمه او صورته على اي حاجة من دي او تطبعي عليها اي حاجة انتي عارفة انه بيحبها, الهدية بسيطة لكن هتعني له كتير جدا لما يحس انها معمولة عشانه مخصوص.

افكار هدايا لشريك حياتك مش مكلفة 8
افكار هدايا لشريك حياتك مش مكلفة 8

9- مخدات رومانسية:

ممكن تجيبي له مخدة على شكل قلب وتكتبي عليها كلمات حلوة كل ما يجي ينام عليها هيشوفها ويفتكر انتي قد ايه بتحبيه.

افكار هدايا لشريك حياتك مش مكلفة 9
افكار هدايا لشريك حياتك مش مكلفة 9

10- اشتري له ادوات شخصية:

معظم الرجالة تقريبا يمكن مش بتهتم اوي بمنتجات تصفيف الشعر او انواع الشامبو او الصابون وممكن يستخدم اي نوع مزيل عرق قدامه, وفي رجالة كتير ممكن ميحلقوش فترة طويلة, في الحالة دي انتي ممكن تهتمي بالجانب ده وتجيبي له هدية مجموعة تصفيف شعر, او طقم حلاقة, او تجيبي له اطقم ملابس داخلية وشرابات.

افكار هدايا لشريك حياتك مش مكلفة 10
افكار هدايا لشريك حياتك مش مكلفة 10

11- اشتري له فيديو جيم:

معظم الرجالة تقريبا بيحبوا الفيديو جيم والعاب البلاي ستيشن, ممكن تفاجئية وتجيبي له احدث لعبة نزلت في السوق, واتأكدي انها هتبقى هدية مثالية ومفاجئة جدا ليه وغير متوقعة بالنسبة له.

افكار هدايا لشريك حياتك مش مكلفة 11
افكار هدايا لشريك حياتك مش مكلفة 11

12- 7 ايام حب:

الفكرة دي بسيطة جدا ومش مكلفة خالص, هاتي علب صغيرة بعدد ايام الاسبوع يعني 7 علب واكتبي على كل علبة اليوم بتاعه وحطي جواها اي نوع حلويات صغيرة او مكعب شوكولاتة ومعاها رسالة مكتوبة فيها كلمة حلوة ليه, وكل يوم حطي له الرسالة بتاعتها, ممكن مرة تحطيها الصبح اول ما يصحى من النوم يشوفها, ومرة تحطيهاله بالليل في اي مكان هيشوفه عشان ينهي اليوم بكلمات حلوة منك, وهكذا لحد ما تخلصي 7 ايام الاسبوع.

افكار هدايا لشريك حياتك مش مكلفة 12
افكار هدايا لشريك حياتك مش مكلفة 12

13- اكدي له حبك دايما:

في النهاية دايما اكدي له باستمرار انك بتحبيه ومعاه مهما كانت الظروف او صعوبات الحياة, لان سماع الكلام ده بيفرق كتير اوي وهيعني له كتير لما يحس انك دايما مسانداه ومعاه وهتفضلي تحبيه في كل وقت وتحت اي ظروف دي هتعتبر احسن هدية بالنسبة له.

افكار هدايا لشريك حياتك مش مكلفة 13
افكار هدايا لشريك حياتك مش مكلفة 13

لو جوزك بيعمل ال15 حاجة دول .. يبقى افضل زوج على الاطلاق

حاجات لو جوزك بيعملها يبقى افضل زوج
حاجات لو جوزك بيعملها يبقى افضل زوج

مقالات متعلقه

11 هدية تكنولوجية ممكن تجيبيها لشريكك

11 هدية تكنولوجية ممكن تجيبيها لشريكك

افكار هدايا مختلفة تجيبيهم لاصحابك

افكار هدايا مختلفة تجيبيهم لاصحابك

احلي هدايا لانثي برج الأسد

احلي هدايا لانثي برج الأسد