3 اسباب بيخلوا الالتزام بالدايت صعب عليكى

بقلمآية حسان فيتخسيس الوزن visibility1439

اسوأ حاجة فى انك تعملى دايت او تمشى على نظام غذائى هى انك تتعبى كتير وتبذلى مجهود وفى نص الطريق ماتقدريش تلتزمى بالدايت وبالتالى ماتلاقيش النتيجة اللى انتى مستنياها فى الاخر، لكن لو كنتى بتحاولى تعملى كل اللى عليكى و برده مفيش فايدة، يبقى المقال ده ليكى.

فى المقال ده بنات حوا هتقولك على اهم 3 اسباب بيخلوا الالتزام بالدايت صعب عليكى ..لازم تعرفيهم.

3 اسباب بيخلوا الالتزام بالدايت صعب عليكى ..

1- اهدفك مش واقعية وصعب تتحقق

لما تكونى قررتى تبدأ دايت وتغيرى من طريقة اكلك و الـ life style  بتاعك يبقى مهم انك تبدأى بشكل بسيط  و”منطقى”، يعنى لازم تبقى فاهمة انه لازم يكون هدفك فى الاول انك تخسري عدد قليل من الكيلوجرامات، حتى لو لقيتى صاحبتك او قريبتك بدأت معاكى الدايت وبتخس اكتر منك، افتكرى دايما انه اجسامنا ردود فعلها بتتفاوت تجاه التغييرات المختلفة، يعنى استجابة جسمنا للرياضة والدايت مش واحدة علشان كده مهم تبقى اهدافك واقعية وسهل تتحقق،فمثلا حطى قدامك انك تخسري كيلو او اتنين كل اسبوع وبعد كده ابدأى اعلى بأهدافك.

2- بتفقدى الدافع اللى بيحمسك

لو حسيتى انك مابتتقدميش ومش لاقية النتيجة اللى انتى مستنياها، سهل تخسرى الدافع وتفقدى الامل فى انك تحققى هدفك. علشان كده افتكرى دايما انه الدايت وخسارة الوزن عملية طويلة وبتاخد وقت، لكن ده مش معناه انه الدايت مش ناجح ، افضلى ابذلى مجهود اكتر واشتغلى على نفسك لحد ماتوصلى للنتيجة اللى انتى عايزاها وماتفقديش ابدا الدافع اللى بيحمسك.

3- مابتفكريش فى الدايت صح

ممكن تكونى نويتى تعملى دايت او بدأتى فعلا بس مابتفكريش فى الدايت صح، يعنى ممكن تكونى بتفكرى انه الدايت معناه انك تجوعى نفسك وماتاكليش خالص، او تضطرى تاكلى اكلات الدايت اللى طعمها مش حلو ومابتعجبكيش. او انك مثلا تفكرى انه ممكن تاكلى اللى انتى عايزاه وبعدين تعذبى نفسك فى الجرى والتمرينات علشان تحرقى اللى كلتيه. والحقيقة انك كده بتفكرى فى الدايت غلط والطريقتين دول مش صح. مهم جدا انك تنظمى يومك ونظامك الغذائى الجديد بين الاكل الصحى والتمرينات علشان توصلى للنتيجة اللى انتى عايزاها فى وقت مناسب.

اعرفى  معانا كمان 31 نصيحة لتخسيس الوزن في الصيف ..