حيل ونصايح عشان تحافظي على جمال بشرتك في الصيف
الصيف هو موسم الانطلاق والبحر لكن بتكون المشكلة ان البشرة بتتأثر بالرطوبة والشمس وخصوصا للبنات اللي بشرتهم حساسة وبتتأثر من اقل حاجة, عشان كده البشرة بتكون محتاجة عناية خاصة, وده اللي هنعرفه مع بعض النهاردة من خلال موضوعنا هنقولك حيل ونصايح لجمال بشرتك في الصيف وايه اللي المفروض تعمليه عشان تحافظي عليها صحية وتحميها من اثار الرطوبة والحرارة.
حيل ونصايح لجمال بشرتك في الصيف:
1- حطي صن بلوك:
الصن بلوك من اول الحاجات الاساسية في الصيف عشان تحمي جلدك من ضرر اشعة الشمس اللي بتسبب غمقان البشرة وبقع الشمس, واكيد كل ما زاد عامل الحماية الSPF هيحمي بشرتك بشكل اوقى, طبقي الصن بلوك على البشرة قبل الخروج في الشمس بـ 15 – 20 دقيقة عشان تتأكدي ان بشرتك امتصته كويس.
شوفي من هنا افضل انواع الصن بلوك لكل نوع بشرة.
2- اشربي كتير:
لو عايزة تحافظي على بشرتك صحية في الصيف يبقى واحدة من اهم الحاجات اللي لازم تعمليها هي انك تشربي مية كتير, وممكن تضيفي لها نكهة عشان تغيري طعمها وتشربي منها كمية اكبر جربي اعملي ديتوكس بالفاكهة الحمضية لانها من اكتر الحاجات اللي بتطرد السموم من الجسم وبتحافظ على البشرة صحية لانها غنية بفيتامين C المهم جدا لصحة البشرة, ممكن تضيفي للمية السقعة شرايح ليمون او برتقان هتساعد جدا انها تحافظ على رطوبة البشرة وتخلي شكلها صحي.
شوفي من هنا طريقة جديدة ومفيدة هتشجعك على شرب المية اكتر.
3- طهري بشرتك:
تطهير البشرة من المكياج والاتربة اللي بتتعرض لها مهم جدا عشان نحافظ عليها, ممكن تستخدمي مار ميسيلار من غارنييه تمسحي بيه البشرة بيزيل اثار المكياج والاوساخ والاتربة ومن غير ما ينشف البشرة.
4- استخدمي تونر البشرة:
بعد تطهير البشرة زي ما قولنا في الخطوة اللي فاتت استخدمي التونر لانه يعتبر كمان من الخطوات المهمة جدا في الصيف لو عايزة تحاظفي على بشرتك صحية ومنورة وخصوصا لصاحبات البشرة الدهنية او المعرضة لحب الشباب هما اكتر اشخاص محتاجين خطوة التونر لانه بيساعد على ازالة الدهون الزيادة من البشرة, بالاضافة لده ان التونر بيساعد على منع اثار الصيف على البشرة نتيجة التراب والدهون الزيادة والبكتيريا والعرق, كمان بيساعد على تضييق المسام.
شوفي من هنا افضل انواع تونر البشرة .. وازاي تختاري اللي يناسبك.
5- التقشير:
في الصيف لازم تحافظي على تقشير البشرة بانتظام لان التقشير بيخلص بشرتك من الجلد الميت, قشريها من مرة لمرتين في الاسبوع.
ممكن تستخدمي المقشرات الجاهزة, او تعملي انتي بنفسك في البيت مقشر طبيعي, ممكن تخلطي معلقة كبيرة شاي اخضر مع كوباية سكر ابيض او بني و1/2 كوباية زيت زيتون و2 معلقة كبيرة عسل نحل و10 نقط زيت اللافندر وقلبيهم كويس مع بعض واستخدميه لتقشير البشرة والجسم.
شوفي من هنا وصفات طبيعية لتقشير الجلد.
6- الترطيب:
الترطيب كمان واحد من الخطوات المهمة جدا في الصيف وكل ما كانت البشرة جافة اكيد هتحتاجي ترطيب اكتر, حتى كمان البشرة الدهنية محتاجة ترطيب بس اختاري مرطب خفيف مناسب لنوع بشرتك, ضروري جدا انك تحافظي على تطبيق المرطب الصبح وبالليل.
ولو انتي بتحسي ان المرطب خلال فترة النهار بيخلي البشرة ملزقة او لزجة زيادة عن اللزوم وفي نفس الوقت بشرتك محتاجة ترطيب في الحالة دي ممكن تستخدمي على الاقل مرتين في الاسبوع ماسك الترطيب المكثف الليلي “ممكن تستخدموا الماسك الليلي من لوريال او اولاي” ده هيحافظ على بشرتك رطبة خلال فترة النهار وهيحافظ على بشرتك من اضرار اشعة الشمس.
شوفي من هنا انواع الكريمات المرطبة المناسبة لكل نوع بشرة.
7- اعملي ماسكات:
الاهتمام بالبشرة بالماسكات بشكل منتظم من الخطوات المهمة والمفيدة جدا جدا اللي بتحافظ على صحة البشرة, اعملي ماسكات للبشرة مرتين في الاسبوع.
ممكن تجربي ماسك الليمون والعسل اخلطي 4 معالق صغيرة ليمون مع 3 معالق كبيرة عسل نحل وقلبيهم مع بعض كويس وادهني بشرتك بالخليط وسيبيه 20 دقيقة واغسليه بالمية.
8- كلي اكل صحي:
الحقيقة ان لو كنتي بتستخدمي افضل منتجات البشرة والمكياج ومش بتاكلي اكل صحي ده هيأثر على بشرتك بشكل سلبي, لان الاكل ليه تأثير كبير على البشرة, عشان كده حاولي بقدر الامكان انك تمشي على نظام غذائي صحي ومتوازن, وحاولي بشكل خاص تاكلي الاكلات الغنية بفيتامين C و B و D لانها بتبطيء علامات الشيخوخة على البشرة, وخدي فيتامينات بانتظام عشان تعوضي اي نقص فيتامينات في الجسم واتأكدي انك لو عملتي كده هتيفرق مع بشرتك جدا وهتلاقي شكلها بقى صحي.
– الاكلات الغنية بفيتامين C الفواكة الحمضية زي البرتقان والليمون والجريب فروت, الفلفل الحار والحلو, الكيوي, البابايا, الاعشاب الطازة زي الزعتر والبقدونس, البروكلي, الفراولة, الخضروات الورقية الخضرا الداكنة.
– الاكلات الغنية بفيتامين B اللحوم الحمرا, الخضروات الورقية الخضرا الداكنة, الحبوب الكاملة, المكسرات زي اللوز والجوز, العدس, الدجاج, السمك, البيض.
– الاكلات الغنية بفيتامين D اللبن, صفار البيض, سمك السلمون, المشروم, الجبن, التونة, السمك المدخن, الكبدة.
9- التمارين:
من الحاجات المفيدة لصحة البشرة هي التمارين الرياضية لانها بتساعد على زيادة تدفق الدم في جميع انحاء الجسم وبالتالي بتغذي خلايا البشرة وده بينعكس بشكل ايجابي جدا على صحة بشرتك, لان الدم بينقل الاكسجين والمغذيات اللي محتاجها الجسم, كمان الدم بيطرد الجذور الحرة والسموم خارج الجسم وبالتالي بيساعد على نضافة الجسم الداخلية, ولو معندكيش وقت للتمرين, ممكن تجربي من التمارين اللي في الصورة دي 10 دقايق بس يوميا هتكون كافية وهتفرق جدا مع بشرتك.
10- اعملي Dewy Look:
ال Dewy Look اللي بيكون لوك خفيف وطبيعي مناسب اكتر للصيف, يعني استخدمي BB بدل كريم الاساس هيديكي ترطيب ولوك طبيعي غير لامع للبشرة.
شوفي من هنا ماركات واسعار ال BB كريم وال CC كريم.
11- استخدمي برونزر وهايلايتر:
البرونزر من الحاجات المناسبة جدا للصيف هيديكي تان طبيعي للبشرة, ولو عايزة تدي بشرتك توهج صحي يبقى الاختيار الانسب ليكي هو الهايلايتر.
12- استخدمي ميست للبشرة:
لو هتقضي يومك كله بره او على البحر اكيد بشرتك هتيجي في نص اليوم هتلاقيها محتاجة انك تنعشيها من تأثير الرطوبة وحرارة الشمس واللي هيقوم بالمهمة دي هو ميست البشرة, رشي بشرتك بالميست هيحافظ على رطوبتها طول اليوم وهينعشها.
وممكن انتي تعملي بنفسك في البيت ميست مية الورد بطريقة بسيطة جدا, اخلطي ½ معلقة صغيرة فيتامين E مع نقطتين من زيت النعناع ونقطتين من زيت شجرة الشاي و4 معالق كبيرة مية ورد و3 معالق كبيرة مية جوز هند اللي بتكون جوه ثمرة جوز الهند.
مع النصايح دي هتقدري تستمتعي بالصيف وفي نفس الوقت تحافظي على بشرتك جميلة وصحية.