اعملي الـBleach Denim Shirt بطريقة سهلة .. وشوفي افكار ازاي تلبسيه

اكيد كلنا بنحب الموضة ودايما بندور على افكار ممكن نجدد بيها اللوك بتاعنا ونحسنه, لكن اكيد مش لازم تشتري حاجة جديدة عشان تغيري اللوك انتي ممكن تغيري وتجددي باللبس القديم اللي عندك بافكار بسيطة وسهلة, عشان كده النهاردة جايبين لكل بنات حوا فكرة سهلة جدا ممكن تغيري بيها اللوك بتاعك وتجددي بيها شكل لبسك القديم, لو انتي من محبات القميص الجينز اكيد هتنفذي فكرتنا النهاردة, هنقولك ازاي تعملي الـBleach Denim Shirt وافكار ازاي تلبسيه.

– ازاي تعملي الـBleach Denim Shirt:

الحاجات اللي محتاجينها:

1- قميص جينز.

2- مبيض “كلور”.

3- اربطة مطاطية “استك”.

4- جوانتي.

5- طبق بلاستيك.

الخطوات:

1- اول حاجة اربطي الكم بطريقة عشوائية بالرباط المطاطي “الاستك”.

2- بعد ما تربطي الكمين, اربطي القميص بنفس الطريقة كرمشية في بعضه بطريقة عشوائية واربطية بالرباط المطاطي.

3- هاتي الطبق وصبي فيه كميات متساوية من المية والمبيض “الكلور”, والبسي جوانتي عشان متاذيش جلدك من المبيض.

4- حطي القميص في المية وسيبيه منقوع من 15 – 20 دقيقة, بعد المدة دي ممكن تشوفي اللون لو وصل للون الفاتح اللي انتي عايزاه على حسب ما تفضلي طلعيه من الطبق وفكي الاربطة بتاعته واشطفيه بالمية العادية.

وبكده تبقي غيرتي شكل القميص بطريقة سهلة وبسيطة جدا ومش مكلفة وهيبقى عندك قميص بلوك مختلف كأنك اشتريتي قميص جديد.

• – في طريقة تانية ممكن تحطي مية وعليها المبيض في كوباية وتجيبي فرشة سنان وتاخدي من المية وتنقطي على القميص بشكل عشوائي وتسيبيه ينشف, وكده يبقى القميص جاهز.

الطريقة بالفيديو:

– افكار ازاي تلبسي الـBleach Denim Shirt:

ممكن تنسقي معاه جينز ابيض Ripped, او تلبسيه مع درجات الجينز المختلفة من الفاتح للغامق, ومن اللوك اللي بتطلع حلوة جدا الجينز الغامق مع القميص الفاتح.

ممكن كمان تلبسيه على جيبة او فستان, وممكن يتلبس مقفول, او مفتوح وتحته Undershirt او بادي.

طرق ازاي تلبسي الOversized Shirts والOversized T-shirts بطريقة انيقة